Isaiah 28 - De Beebaa Dabu

E vakaa naa Ephraim

¹ E vakaa naa de hau hagadubu a de gau ssenga o Ephraim e tuhi laa, go dono mahamaha gu dai lilo bei de huaala gu mmae laa, go de aduhale e duu laa i honga tuuduu o de geelonga iai gelegele danuaa, go de mommee a de gau ssenga i uvaini e tuhi laa.

² Tilo, de Ia Aamua e dahi ana ia sauaa ma de mmahi. Bei denga duudangaa haisi ma de madangi mmahi e oohaa laa mee, ma de langi mmahi ma de maadolu e pala iho laa, gai ia e poo ga maga iho naa gi honga de gelegele.

³ De aduhale a de gau ssenga o Ephraim e tuhi laa e dagadagahia naa gi lalo vae o dangada.

⁴ Dono mahamaha gu lilo, bei de huaala gu dai mmae laa, go de aduhale e duu laa i honga tuuduu o de geelonga iai de gelegele danuaa, e bei de fig e leu laa i mua de masavaa o de hagihagi — de masavaa naa huu a tangada e gidee ai, gai ia ga hhagi ga gai.

⁵ De laangi laa gai Tagi o denga hagabuulinga hebagi e hai naa go de hau mahamaha, gai se hau ua mahamaha ange gi ono dangada e doe laa.

⁶ Ia e gaavange naa gi de ia hagamodu muna de hagasaalunga o de hagamodu heohi, ma de hagammahi gilaadeu e aahe mai i de hebagi gi de haitoga o de aduhale.

⁷ Gilaadeu nei e ssenga hogi i denga uvaini, ma de ssee saele i de unu mee mmahi; de gau haimeedabu ma denga pelaabisi gu ssee saele i de unu mee mmahi ma uvaini; gilaadeu e ssenga ange naa i de unu mee mmahi; gilaadeu e ssee saele i delaadeu gidee denga midi, gilaadeu gu dee maua i de hagamodu muna.

⁸ Deebele alodahi gu hoohonu i denga hagalueia, gu deai donu se mommee e deai mee hakino gee iai.

⁹ ⌊Gilaadeu e ssili,⌋ “Goai aana e hagatale nei de agoago ange i de iloo mee? Gai goai aana e hagadonu ange aagena ana muna? Go denga gaagaa gu dee unu laa vai uu, go denga gaagaa gu dee unuunu laa i de gaanuunu?

¹⁰ Gai ia e dee modu de hagaaheahe age ana muna, go muna mau donu huu, go muna mau donu huu, gai e tala dagimomo mai, e tala dagimomo mai.”

¹¹ Deelaa ai, Tagi Maolunga e basa ange naa gi de huaadangada nei i muna a de gau henua gee;

¹² go gilaadeu aana gu hai ange laa, “Deenei de mommee hagammabu, e hagamabu ai gilaadeu e daalea,” gai “deenei doodou hagamaabunga” — aagai gilaadeu e dee llodo e hagallongo ange.

¹³ Deelaa ai, muna a Tagi Maolunga ange gi gilaadeu e bei naa donu: e hagaaheahe ange naa, e hagaaheahe ange naa, go muna mau donu huu, go muna mau donu huu, gai e tala dagimomo ange, e tala dagimomo ange, gi hulo ai gilaadeu gi baakuu saele, gi lagolagohia, ma de noodia i ssele, aama de noonoodia ga gaavee gee.

Tuludulu o de logunga o Zion

¹⁴ Deenei ai, denga dagi o Jerusalem e doo mee laa, goodou hagalaangona muna a Tagi Maolunga.

¹⁵ Goodou e hagataba, “Gimaadeu gu hai dahi hagatoo donu hagaheloongoi madali de magau, gimaadeu gu hagaheloongoi ange gi de mommee o de gau maakau. Gai de masavaa naa huu e dae mai ai de hagaduasala laumalie, gai e dee maua gi duu mai gi gimaadeu, go hiidinga demaadeu buibui go de muna hhadu, gai demaadeu mommee mmuni go muna hagasenga.”

¹⁶ Gai e hagadaba de Ia Aamua go Iahweh; “Tilo, au gu hagaduu dahi hadu e hai ai tagelo i Zion, se hadu gu lava i de hagadanuaa; gai go tuludulu o de logunga hagamogomogo, gai se dagelo makaga; gai be goai e hagadonusia e dee hai mee hagamoolau.

¹⁷ Au e hai naa de hagamodu muna heohi go de uga haide mee, gai de heohi go de mee e hagassoe ai muna; denga dibadibaa haisi e oha naa doodou buibui, e hai laa go muna hhadu, gai denga vai e haoli naa doodou mommee mmuni.

¹⁸ Doodou hagatoo donu hagaheloongoi madali de magau e hagadeai naa; doodou hagaheloongoi ne hai madali de mommee o de gau maakau e dee sula naa donu. Gai de masavaa naa huu e dae mai ai de hai ngadaa laumalie, gai goodou e dee pau ange donu aagena.

¹⁹ Masavaa alodahi e aheahe mai ai, gai e kave gee naa donu goodou; i daiao alodahi, ma laangi ma boo alodahi, gai e hagamaatagu mmao i doodou tonu ange gi muna nei.”

²⁰ De moenga e bodobodo, e dee oo ai tangada; de malo o tangada e gahu ai e gasogaso, e dee maua i de saabini ai tangada.

²¹ Tagi Maolunga e hidi age naa bei dono hidi age i de mounga go Perazim; ia e bole naa bei dono bole i de geelonga o Gibeon, ga hai ana hegau, go ana hegau hagalele mouli, ma de hagassula ana hegau, go ana hegau e dagodo gee.

²² Deenei ai, goodou aude doo mee, kana kii ange taemaha seeini oodou e noonoa ai; de Ia Aamua, Tagi o denga hagabuulinga hebagi, gu tala mai gi de au dagodo de oha o de henua alodahi gu hagamodu laa.

²³ Huuhuli mai hagalaangona agu muna, gai goodou aanga mai hagalaangona agu muna e tala adu.

²⁴ E aha, tangada e duudagi laa donu huu de hagabalabala dana veelenga? Ia e duudagi laa donu huu de oha ma de sua age de gelegele?

²⁵ E aha, ia e dee doo ai laa denga dill, ma cummin i kilaa, dua dana hagasoe de gelegele; ia e dee doo ange laa denga wheat gi dono duulanga, barley i dono hagatauanga, gai spelt i dono mommee?

²⁶ I hiidinga dono Maadua e tala ange ana mee e hai, ma de agoago ange ia i de mee heohi.

²⁷ Denga dill e dee duuduu donu i de mee duuduu, denga cummin e dee hai dahi hada iai hagasii gi savini laa ono elunga, aagai denga dill e hagailiili i laa manu, gai denga cummin e hagailiili i dahi laagau.

²⁸ Denga grain e mmili e hai ai denga pelaoaa, aagai tangada e dee duuduu denga hua gi daulooloa. Ia e hai denga hagasii o dana hada duuduu gi hano laa ono elunga, aagai ana hoosa e dee balabalasi huamanu laa.

²⁹ De mee nei ne humai hogi i daho Tagi o denga hagabuulinga hebagi, se ia e haia hagasaele ma de honu i de iloo mee.