Isaiah 26 - De Beebaa Dabu

Dahi daahili tuhi

¹ De laangi laa gai dangada e hua naa taahili nei i de henua o Judah: Demaadeu aduhale e makaga; de Maadua ne hagatuu ono buibui ma ono mee hagamakaga e hagaola ai.

² Huugea haitoga o de aduhale, e ulu mai ai de huaahenua heohi, go de huaahenua e hai hegau i de muna abodonu.

³ Koe e hai gi nnoho paba gilaadeu alodahi e maanadu goe i olaadeu lodo, i hiidinga gilaadeu e hagadonusia goe.

⁴ Goodou hagadonusia Tagi Maolunga ga hano ai, i hiidinga Iahweh, Tagi Maolunga, go de Baba makaga e dee ngado mai.

⁵ Ia gu hagamaolalo gilaadeu e nnoho i de mommee maolunga, ma de hai gi maolalo de aduhale maolunga; ia e oha iho naa ga hai gi dagodo i honga de gelegele, ma de maga iho gi lo te gelegele.

⁶ Vae o dangada e dagadagahi naa gi lalo — go vae o dangada e duasala ma vae o de gau hagaau aloha.

⁷ De haiava o tangada heohi e soe; gai koe e hai naa gi soe de haiava o tangada heohi.

⁸ Tagi Maolunga, de masavaa omaadeu e daudali ai i au muna gu hagamodu, gai go koe donu demaadeu tali. Gai demaadeu mee e llodo mmao ai go de hagadeledele danuaa o doo ingoo.

⁹ Ogu lodo e maanadu donu huu goe i de boo, gai dogu hagasaalunga e oho boo e ssala goe. De masavaa aau e hagamodu ai muna i henua i lalo, gai dangada e nnoho i henua i lalo gu iloo e gilaadeu de mee heohi.

¹⁰ Gai ga abodonu ange naa donu dangada gi de gau baubau, gai gilaadeu e dee maua donu i de ago de mee heohi; gai ga nnoho naa donu gilaadeu i de henua o olaadeu e heohi, gai gilaadeu e duudagi donu de hai hegau i de baubau, gilaadeu e dee anga ange donu gi de maolunga o Tagi Maolunga.

¹¹ Tagi Maolunga, doo lima gu hagaabo aagai gilaadeu e dee gidee. Haia gi gidee e gilaadeu doo lodo mmahi i hiidinga o oo dangada, ma de hai gilaadeu gi dookaa; haia de ahi gu baba ange laa gi oo hagadaumee gi duungia gilaadeu.

¹² Tagi Maolunga, koe gu hai gi nnoho paba gimaadeu; gai go koe gu hagassula mee alodahi amaadeu gu hai.

¹³ Tagi Maolunga, demaadeu Maadua, gu hanu ange donu ne dagina gimaadeu, aagai go koe donu huu amaadeu e hagadubu.

¹⁴ Gilaadeu gu maakau iainei, gu dee mouli ange; olaadeu hagasaalunga gu dee mouli age ange. Koe ne hagaduasala gilaadeu ma de hagallilo gilaadeu, koe gu hai gi deai olaadeu hagamaanadu.

¹⁵ Tagi Maolunga, koe e hai ma gu kii ange de laumalie de huaahenua, koe e hai ma gu kii ange de laumalie age de huaahenua. Koe gu hagamahamaha goe i daho dangada; koe gu hagatolo gi daha goinga alodahi o de henua.

¹⁶ Tagi Maolunga, gilaadeu ne ssala goe i delaadeu duasala; dau masavaa ne haele ai gilaadeu, gai gilaadeu ne dalodalo adu gi de goe.

¹⁷ Tagi Maolunga, omaadeu dagodo i mada luoo mada e bei dagodo o de hine hai dama gu dai haanau laa, i dono masavaa e mmae ma de dangi i de hai ono hagalangona.

¹⁸ Gimaadeu ne hai tama, ma de mmae i omaadeu hagalangona, aagai ni ngadi madangi donu huu amaadeu ne haanau. Gimaadeu tee maua i de hagaola henua i lalo, gai dangada e nnoho i henua i lalo tee hagadee kii ina donu.

¹⁹ De gau maakau e mouli age naa; olaadeu angaanga e hiihidi age naa. Goodou denga angaanga i lodo daanunga, hiihidi age daahili i doodou malangilangi. Go hiidinga oodou mouli hoou e bei de mee suungia i taiao, gai de gelegele e hagaahe age naa denga hagasaalunga o de gau maakau.

²⁰ Ogu dangada, goodou hulo ulu gi lodo oodou aabi, ma gi bonodia ange oodou haitoga, ga mmuni ai i dahi masavaa bodobodo, ga dae ai gi de ui de masavaa o de bole.

²¹ Tilo, Tagi Maolunga gu dai sao mai naa i dono mommee e hagaduasala dangada o henua i lalo i hiidinga olaadeu baubau; gai gilaadeu gu daia laa ma gu maakau e gidee mai naa i henua i lalo; henua i lalo gu dee maua i de hagammuni ana dangada ne daa ga maakau.