Isaiah 25 - De Beebaa Dabu

Taahili tuhi ange gi Tagi Maolunga

¹ Tagi Maolunga, go koe dogu Maadua; au e hagaamua goe ma de tuhi doo ingoo; koe gu hai denga mee hagalele mouli, ma mee aau gu hagatau e hai madagidagi loo, i hiidinga koe e hai hegau i de mee abodonu ma de heohi.

² Koe gu hai de aduhale ma gu se hagabuudungaa gainga, gai de aduhale buibui gu se mommee maoha, denga hale buibui makaga o de gau henua gee gu deai donu, gai e dee ahe ange naa donu e hagatuu age ange.

³ Deenei ai, denga huaadangada mmahi e hagadubu naa goe; gai denga aduhale o denga huaahenua e vaivai haia dangada e maatagu naa i de goe.

⁴ Go koe de mommee mmuni o de gau hagaau aloha, gai go de mommee mmuni o dangada e duasala laa; koe se buibui i de masavaa o de madangi mmahi, gai go de malu i de masavaa e mmahi ai de laa. Go hiidinga manava o de gau e vaivai haia dangada e bei de madangi e dau laa i dahi buibui,

⁵ gai e bei de hagavvela o de laa i de vao. Koe e hai gi dee langona leo o de gau henua gee; taahili a de gau e vaivai haia dangada gu dee langona, bei de haoli a de hagausinga de vvela o de laa.

Taonga ange gi denga huaahenua alodahi

⁶ Gai Tagi o denga hagabuulinga hebagi e hagadabena naa i honga de mounga nei dahi daonga i gai mammami ange gi denga huaadangada alodahi, se daonga e hai i uvaini gu doange i ngadau lagolago — ma giidagi moomuna ma uvaini danuaa hugadoo.

⁷ Gai go honga de mounga nei a Tagi Maolunga e aau gee ai de mee e haolia denga huaadangada alodahi, go de mee e haolia denga huaahenua alodahi.

⁸ Ia e hai naa gi deai se magau ga hano ai. De Ia Aamua go Iahweh e ssolo naa loimada i ganomada alodahi; ia e kave gee naa de hagadogaa o ono dangada mai i henua i lalo alodahi. Go Tagi Maolunga e hagadaba.

⁹ De laangi laa gai gilaadeu e hagataba naa, “Tilo, deenei donu taadeu Maadua; gidaadeu ne tali ange ia gi hagaola ina gilaadeu. Deenei Tagi Maolunga adaadeu ne hagadonusia laa; gidaadeu ga malangilangi ma de lodo danuaa i dana hagaola.”

¹⁰ De lima mmahi o Tagi Maolunga e buibui de mounga nei, aagai ia e dagadagahi naa Moab gi lalo luoono vae, bei denga lau helii mmasa e dagadagahia laa gi lodo duudae.

¹¹ Gai Moab e haalo ange naa luoono lima i de masavaa laa bei de haalo a tangada luoono lima e kau. Gai de Maadua e kave gee naa mee olaadeu e hagamaolunga ai laa ma de hai gi deai haigamaiana hegau e hai i olaadeu lima.

¹² Gai de Maadua e oha naa doo buibui makaga ga hai gi baguu gi honga de gelegele, ga dagodo ai i lodo gelegele.