Isaiah 23 - De Beebaa Dabu

Muna hagadaemaha i dagodo o Tyre

¹ Muna hagadaemaha i dagodo o Tyre. Denga vaga o Tarshish, goodou tangi see! Go hiidinga Tyre gu maoha ma gu ngadi dagodo, gu deai donu se hale be se ava i kilaa. Gai ne hagailoo mai gi gilaadeu mee nei i de henua go Cyprus.

² Dangada e nnoho i tagudai, goodou nnoho ma gi dee mmuu, gai goodou de gau hagao mee o Sidon, go dangada e hulo saele i de moana gu hai goodou ma gu lava.

³ Gai go honga denga dai nnui e loomai ai oodou grain o Shihor; mee ne hagihagi i gaogao o Nile gu hagadanuaa ai a Tyre, gai gu hai ai de mommee hagao mee o denga huaahenua.

⁴ Sidon, de aduhale buibui makaga i gaogao tai, koe gu dogaa, go hiidinga tai gu hagadaba: “Au tee hai hanu hagalangona aabe ne haanau; au tee haele hogi hanu dama daane aabe ni damaa hine.”

⁵ De masavaa e dae ai de longo gi Egypt gai dangada e manavasaa naa i hiidinga longo o Tyre.

⁶ Hagadae adu gi Tarshish; dangada e nnoho i tagudai, goodou tangi see!

⁷ E aha, e dee deenei doodou aduhale e malangilangi ai laa, se aduhale duai, gai gu dagodo mai huu madagidagi, gai luoono vae gu kave ia gi nnoho i denga henua mmao?

⁸ Goai ne haia de hagatau e hai baasi ange ai gi Tyre, go de aduhale hodooligi laa, ono gau hagao mee go dagi o de henua, gai ni dangada hagadubulia i henua i lalo?

⁹ De hagatau nei nii Tagi o denga hagabuulinga hebagi gai ia ga oha ai de mahamaha alodahi o Tyre e hagamaolunga ai laa, ma de hai gi hagangadi mee ina gilaadeu alodahi e hagadubulia laa i henua i lalo.

¹⁰ Dangada o Tarshish, hagadohu ina honga doodou henua bei dagodo o de Nile, gu deai donu dangada e daohia goodou.

¹¹ Tagi Maolunga gu haalo dono lima gi honga tai, ia gu hagangalungalue denga nohoanga hodooligi; ia gu hagadaba bolo e oha Phoenicia, ma ono mommee buibui makaga.

¹² Ia ne hagadaba, “Koe gu dee ahe ange naa donu e malangilangi, tamaa hine o Sidon, koe gu haia gi de mahi. Hidi age hannoo gi Cyprus; gai koe e dee gidee naa donu dahi hagamaabunga i kilaa.”

¹³ Galo ange diiloo dagodo o de henua o de gau Babylon; deenei de huaadangada nogo deai laa. De gau Assyria ne hai de henua gi se mommee e nnoho ai denga manu lodo henua; gilaadeu ne hagatuu denga mee ne hagatuu e oha ai, gilaadeu ne oha ga maoha ono hale maolunga.

¹⁴ Denga vaga o Tarshish, goodou tangi see, i hiidinga doodou mommee buibui makaga gu maoha!

¹⁵ De masavaa laa gai dangada e ngalo naa Tyre i e madahidu ngadau, go ngadau o dahi e hodooligi ai. Aagai ga odi ange naa huu de madahidu ngadau, gai Tyre e hai naa ga bei muna o taahili o de hine hai be se manu:

¹⁶ “De hine hai be se manu gu hagangalo laa, gaavee dahi harp mage seesee saele ai i lo te aduhale. Daalea gi danuaa dau harp, ma de daahili i denga daahili lagolago, gi manadua ai e dangada goe.”

¹⁷ Gai ga odi ange naa huu de madahidu ngadau, gai Tagi Maolunga e ahe ange ga abodonu ange gi Tyre. Gai Tyre e ahe ange naa ga hagao mee, gai ia ga hai hegau naa bei de hine hai be se manu, madali denga nohoanga hodooligi alodahi o henua i lalo.

¹⁸ Gai ana mee e mau ai ma dono hagaoanga e vvae ange naa gi Tagi Maolunga. Tyre e dee maua naa i de hagabudu e doange dono lava. Gai ana mee e maua e gaavange naa e gaimee ai ma de kahu ai gilaadeu e nnoho i mada luu mada o Tagi Maolunga.