Isaiah 21 - De Beebaa Dabu

De oha o Babylon

¹ Muna hagadaemaha i dagodo o de Vao i gaogao Tai. Dahi hagadaumee e humai naa i de vao, ma mai i dahi henua hagamaatagu, bei denga sio e ssau mai laa i de Negev.

² Dahi midi hagaduasala ne hagaago mai gi de au: tangada adi longo e hagabaubau dangada, tangada e gaavee goloa e kave goloa e maua i de hebagi. Elam, hanage oohaa! Media, duuli ina luu baasi! Au e hai naa gi tuu hagaduasala alodahi.

³ Deenei ai, au gu kona mmao dogu manavasaa ma de mmae, au gu mmae, bei de hine gu hai laa ono hagalangona; au gu ino gi lalo i hiidinga o agu mee gu langona, ma de madagu i agu mee gu gidee.

⁴ Ogu lodo gu manavasaa, gai au gu bolebole i dogu madagu; de maalama aagu e tali laa gu sui ma gu se mee hagamadagu mai gi de au.

⁵ Gilaadeu gu hagadabena denga deebele, gilaadeu gu hhola mee e nnoho ai dangada, gilaadeu gu gaimee ma de unu! Denga dagi, goodou hiihidi age, hagalollolo ina denga mee hungihungi!

⁶ Gai de Ia Aamua laa ne hai mai gi de au, “Hannoo haia dahi dangada gi duu gi dagitilo, gai ia gi hagailoo ina mee aana e gidee.

⁷ De masavaa naa huu aana e gidee ai denga hada hebagi ma denga hagabuulingaa hoosa, ma gilaadeu e kage i honga donkey, ma gilaadeu e kage i honga gamelo, gai ia gi kana ange gi dagidiiloo, ia gi kana ange gi dagidiiloo.”

⁸ Gai tangada dagitilo ne oo ga hagadaba, “Dogu dangada aamua, laangi alodahi, gai au e duu i de mommee dagitilo; boo alodahi gai au e duu i dogu mommee.

⁹ Tilo, hanu dangada e kage i honga hoosa gu loomai, gai denga hoosa e hagatau dagilua.” Gai tangada dagitilo ne basa ange, “Babylon gu maoha, Babylon gu maoha! Denga diinonga alodahi o olaadeu maadua gu maoha ma gu daakodo i honga de gelegele.”

¹⁰ Ogu dangada gu dagadagahia ma de nonu i de mommee hili huamanu, au e hagailoo adu gi goodou agu muna gu langona mai i daho Tagi o denga hagabuulinga hebagi, de Maadua o Israel.

Muna hagadaemaha i dagodo o Edom

¹¹ Muna hagadaemaha i dagodo o Dumah. Dahi dangada e oo mai i Seir, ma e hai mai, “Tangada dagitilo, go aahee maa e ao ai de mee? Tangada dagitilo, go aahee maa e ao ai de mee?”

¹² Gai tangada dagitilo ne hai ange, “Gu baa ange donu gi de ao de mee, gai de boo e dae mai naa donu hogi. Noo koe e lodo e ssili, gai koe siilia; ahe mai ange siilia!”

Muna hagadaemaha i dagodo o Arabia

¹³ Muna hagadaemaha i dagodo o Arabia. Goodou de gau Dedan e hagadaga saele laa, goodou e nnoho i de vao o Arabia i de boo.

¹⁴ Dangada e nnoho i de henua go Tema, goodou gaamai vai e unu gilaadeu e hieunu, ma pelaoaa e gaimee ai gilaadeu e silivaahea saele.

¹⁵ Gilaadeu e saavini ga hulo gee i de gadilaasa, ma mai i de gadilaasa gu dada mai laa e daa ai gilaadeu gi maakau, ma mai i de mee hholu e tili ai laa tao, aama mai i de hebagi hagamaatagu.

¹⁶ Gai de Ia Aamua ne hai mai gi de au, “Dahi ngadau nei, bei de hai e dau ai laa de ngadau e hagahai hegau ai tangada, gai de mahamaha o Kedar e lilo naa hogi.

¹⁷ Gai denga daane e dilia mee hholu e ola laa, go denga daane hebagi o Kedar e sogoisi naa donu.” Go Tagi Maolunga de Maadua o Israel e hagadaba.