Isaiah 2 - De Beebaa Dabu

De mounga o Tagi Maolunga

¹ Muna ne hagaago ange gi Isaiah tama daane a Amoz i dagodo o Judah ma Jerusalem.

² Denga laangi hagaodi naa huu gai de mounga o de hale o Tagi Maolunga e hai naa ga maolunga ange i denga mounga hugadoo, ma de maolunga ange i denga duuduu. Gai denga huaahenua alodahi e daga mai naa gi kilaa,

³ gai dangada soa e loomai naa, ga hagataba: “Loomai, gidaadeu ga loage gi de mounga o Tagi Maolunga ma de hale o de Maadua o Jacob; gai ia e agoago mai naa gidaadeu i ono haiava gai gidaadeu ga seesee ai i ono haiava.” Gai de hainga e gaamai naa i Zion, gai muna a Tagi Maolunga e loomai naa i Jerusalem.

⁴ Ia e hagamodu naa muna o denga huaahenua, ma de hagaheloongoi magavaa o denga huaadangada soa. Gilaadeu e dugidugi naa alaadeu gadilaasa ga hai gi ni mee hagabalabala, gai e hai alaadeu dao gi ni naivi e velevele ai manu ssomo. Gai denga huaahenua e dee aahe ange naa donu e hebagi aabe e agoago ange gi de hebagi.

⁵ Loomai, goodou dangada o Jacob, gidaadeu ga seesee i de maalama o Tagi Maolunga!

De laangi o Tagi Maolunga

⁶ Koe gu tili doo huaadangada, go dangada o Jacob. Go hiidinga gu soa dangada e daalaa mee e dee iloo mai i denga henua i dua; gilaadeu e tala mee e dee iloo bei hegau a de gau Philistia, ma de hagaheloongoi ange gi de gau henua gee.

⁷ Delaadeu henua e honu i goolo ma selevaa, gai gu lagolago olaadeu goloa hagamogomogo. Honga delaadeu henua gu honu i denga hoosa, gai gu lagolago hogi olaadeu hada hebagi.

⁸ Delaadeu henua gu honu i denga diinonga; gilaadeu e daumaha ange gi mee alaadeu e hagatuu, ma mee ne hai i olaadeu lima donu.

⁹ Deelaa ai, dangada e hai naa ga maolalo, dangada alodahi e hagamaolalo ina naa — koe gi dee degi ange gi gilaadeu!

¹⁰ Goodou hulo ulu gi lodo hadu, ma de mmuni i lo te gelegele, i hiidinga doodou maatagu i Tagi Maolunga ma de mahamaha o dono maolunga.

¹¹ Tangada lodo maolunga e hagamaolalo ina naa, gai de gau hagamaolunga e hai naa ga maolalo, gai go Tagi Maolunga donu huu e hagaamua i de laangi laa.

¹² Tagi o denga hagabuulinga hebagi gu hagadabena dahi laangi ange gi gilaadeu alodahi e llodo maolunga ma de hagamaolunga, ma gilaadeu e hagaamua ina gilaadeu, (gai gilaadeu alodahi e hai naa ga maolalo),

¹³ gai ia e sele iho naa denga cedar o Lebanon lloa ma de maolunga, aama denga oak alodahi o Bashan,

¹⁴ ma mounga maolunga alodahi, ma denga duuduu maolunga alodahi;

¹⁵ ma denga hale dagitilo maolunga alodahi, ma denga buibui alodahi;

¹⁶ ma denga vaga alodahi o Tarshish, ma denga vaga mahamaha alodahi.

¹⁷ Gai tangada hagamaolunga e hai naa ga maolalo, de gau lodo maolunga e hai naa ga ni dangada maolalo; gai go Tagi Maolunga donu huu e maolunga i de laangi laa,

¹⁸ denga diinonga e llilo naa donu.

¹⁹ Dangada e saavini naa ga mmuni i lodo haonga i magavaa hadu ma haonga i lo te gelegele, i hiidinga delaadeu maatagu i Tagi Maolunga, ma de mahamaha o dono maolunga, i de masavaa oona e hidi age ai ga luuluu henua i lalo.

²⁰ De laangi laa gai dangada e tili ange naa olaadeu diinonga selevaa ma diinonga goolo, e daumaha ange laa aagena, gi denga mole ma gimoo llele.

²¹ Gai gilaadeu ga saavini e mmuni i lodo haonga i magavaa hadu ma lo te baba i gaogao denga mounga, i hiidinga delaadeu maatagu i Tagi Maolunga, ma de mahamaha o dono maolunga, i de masavaa oona e hidi age ai e hagamaatagu henua i lalo.

²² Aude tali hagalodolodo ange gi dangada, e manavanava laa i luoono bongaa usu. Gai ni aha naa donu aau e mau ai?