Isaiah 19 - De Beebaa Dabu

Muna hagadaemaha i dagodo o Egypt

¹ Muna hagadaemaha i dagodo o Egypt. Tilo, Tagi Maolunga e gage i honga dahi giliiga gemo, gai ia e humai naa gi Egypt. Denga diinonga o Egypt e bolebole naa i mada luoono mada, gai dangada o Egypt e manavasaa naa olaadeu lodo.

² “Au e hai naa de gau Egypt gi hagadau hebagi: dahi dangada e hebagi ange naa gi dono daina, dahi dangada e hebagi ange naa gi tangada e baa ange gi de ia, dahi aduhale e hebagi ange gi de aduhale ange laa, dahi nohoanga hodooligi e hebagi ange gi de nohoanga hodooligi ange laa.

³ De gau Egypt e baageaa naa olaadeu lodo, gai au e hai naa gi dee ssula alaadeu hagatau; gilaadeu e ssala naa de bale mai i daho denga diinonga ma hagasaalunga o de gau maakau, ma denga hilohilo ma eidu aama gilaadeu e pasa ange gi denga hagasaalunga.

⁴ Au e dugu ange naa de gau Egypt gi dahi dagi e vaivai haia laa dangada gai dahi hodooligi hagamaatagu e dagi naa gilaadeu,” go de Ia Aamua, Tagi o denga hagabuulinga hebagi e hagadaba.

⁵ Denga vai o Nile e masa naa, gai lo te vai laa e masa bagubagu naa.

⁶ Gai ono aasanga e pilo naa; denga saalingaa vai o Egypt e maamasa naa. Denga aalege ma helii i kilaa e mmae naa,

⁷ aama denga manu ssomo e doo i luu baasi de Nile, ma manu i de gabugabu o de Nile. Veelenga alodahi i luu baasi o de Nile e mmae naa ga ilihia saele.

⁸ Denga daane haangoda e tangi naa ma de hinangalosaa, dangada alodahi e haangoda i lo te saalingaa vai go Nile; ma gilaadeu e magaa tae i honga de vai e mmade ange naa olaadeu aalanga.

⁹ Dangada e haia malo i denga flax ma gilaadeu e laangaa denga malo tea e deai naa selaadeu tali.

¹⁰ Dangada e laangaa malo e lodo baageaa naa; gai de gau hai hegau alodahi e manavasaa naa.

¹¹ Denga dagi o Zoan ni dangada donu ssenga; de gau heiangi e balea ange hagasaele a Pharaoh, ni ngadi hagasaele alaadeu e bale ange ai ia. Gai dee hee ai naa doodou hai e maua ai i de hai ange gi Pharaoh, “Au go dahi daane heiangi, go dahi daane hai hegau o denga hodooligi madagidagi”?

¹² Gai i hee iai oo daane heiangi iainei? Gilaadeu gi hagaagona adu ma de hai gi iloo e goe mee a Tagi o denga hagabuulinga hebagi gu hagamodu e hai baasi ange ai gi Egypt.

¹³ Denga dagi o Zoan ni dangada donu ssenga, gai dagi o Memphis gu hagasengalia; go gilaadeu duludulu o dangada, aagai gilaadeu gu dagi gee Egypt.

¹⁴ Tagi Maolunga gu gaavange de hagasaalunga e haia laa gilaadeu gi ssenga ange; gilaadeu gu hai Egypt gi bei dagodo o tangada senga e ssee saele laa i lodo ono hagalueia.

¹⁵ Egypt gu deai ana mee e maua i de hai; go de biho be go ssugi, go de lau o de palm be go de aalege gu ni ngadi mee.

¹⁶ De masavaa laa gai de gau Egypt e bei naa dagodo o denga haahine. Gilaadeu e bolebole naa ma de maatagu i de hagaabo de lima o Tagi o denga hagabuulinga hebagi e hai baasi ange ai gi gilaadeu.

¹⁷ Gai de henua o Judah e hai naa ga maatagu de gau Egypt. Dangada alodahi e langona dagodo o Judah e maatagu naa, i hiidinga mee a Tagi o denga hagabuulinga hebagi gu hagatau e hai baasi ange gi gilaadeu.

¹⁸ De laangi laa gai e lima aduhale o Egypt e pasa i muna Canaan, ma de hagaheloongoi ange gi Tagi o denga hagabuulinga hebagi. Dahi aduhale laa e hagaingoo ange naa go de Aduhale o de Oha.

¹⁹ De laangi laa gai e dahi naa mommee o ssigidaumaha ange gi Tagi Maolunga i Egypt, ma dahi mee e hagamaanadu ai Tagi Maolunga i de ngaadonga o de henua.

²⁰ Gai de mee laa se hagailonga gai se mee e tala ai dagodo o Tagi o denga hagabuulinga hebagi i de henua go Egypt. Gai de masavaa naa huu olaadeu e tangi ange ai gi Tagi Maolunga i hiidinga delaadeu vaivai haia, gai ia e gaamai naa dahi gi balea ange ma de hagaola gilaadeu.

²¹ Gai Tagi Maolunga e hai naa gi iloo e de gau Egypt ono dagodo, gai gilaadeu e iloo naa Tagi Maolunga i de laangi laa. Gilaadeu e daumaha naa ma de hai denga sigidaumaha dudu ma sigidaumaha o grain; gilaadeu e hagatoo donu ange naa gi Tagi Maolunga ma de hagassula alaadeu hagatoo donu.

²² Gai Tagi Maolunga e gaamai naa dahi mee hagamaakau gi Egypt; ia e hagammae naa gilaadeu ga lava ga hagaieiangi gilaadeu. Gai gilaadeu e aahe mai naa gi Tagi Maolunga, gai ia ga basa ange gi alaadeu dangidangi ga hagaieiangi gilaadeu.

²³ De masavaa laa gai e dahi haiava laumalie e humai naa i Egypt ga hano gi Assyria. De gau Assyria e loomai gi Egypt, gai de gau Egypt e hulo gi Assyria. Gai de gau Assyria ma de gau Egypt e hagabuni naa ga daumaha.

²⁴ De masavaa laa gai Israel e hai naa go togodolu, madali Egypt ma Assyria, gai e hai naa ga se manuuia niio henua i lalo.

²⁵ Gai Tagi o denga hagabuulinga hebagi gu hagamanuuia naa gilaadeu, ga hai ange, “E manuuia ogu dangada go de gau Egypt, ma de gau Assyria aagu ne hai laa i luoogu lima donu, aama de gau Israel, dogu boolonga.”