Isaiah 17 - De Beebaa Dabu

Muna hagadaemaha i dagodo o Syria ma Israel

¹ Muna hagadaemaha i dagodo o Damascus. “Tilo, Damascus e hai naa ga dee se aduhale, aagai e oha naa ga se mommee e ngadi dagodo.

² Denga aduhale o Aroer e deai naa dangada e nnoho ai, gai e hai naa ga se mommee niio denga hagabuulingaa ssiibi e daakodo ai, gai e deai naa donu dangada e haia gi maatagu gilaadeu.

³ Denga aduhale buibui o Ephraim e llilo naa, Damascus e deai naa sono sauaa e dagi ai; gai dangada e doe i Syria e bei naa dagodo o de mahamaha o de gau Israel, go Tagi o denga hagabuulinga hebagi e hagadaba.

⁴ De laangi laa gai de mahamaha o Jacob e lilo naa, gai dono angaanga bedi e bangabanga naa.

⁵ Gai e bei naa de masavaa a tangada e duuduu ai laa grain, gai ia ga hagihagi denga hua i dono lima — gai e bei de masavaa a tangada e ogo ai denga grain gu lava laa i de hagihagi i de geelonga go Rephaim.

⁶ Aagai e hanu hua e doe ai, bei de olive gu hagailiili iho laa ono hua, gai e lua be dolu hua e doe i denga laa i de ulu, aabe haa be lima hua i denga laa ange laa,” go Tagi Maolunga, de Maadua o Israel e hagadaba.

⁷ De laangi laa gai dangada e tali ange naa de ia ne haia gilaadeu, ma de daahuli ange naa gi de Ia Dabu o Israel.

⁸ Ia e dee galo ange naa donu gi denga mommee o ssigidaumaha, go mee ne hai i luoono lima, ia e dee daumada naa denga duludulu laagau o Asherah, ma mommee o ssigidaumaha o mee maanongi, aana ne hagatuu i luoono lima.

⁹ De laangi laa gai olaadeu aduhale mmahi, e bei naa mommee o de gau Hiv ma de gau Amor ne tili laa i hiidinga o de gau Israel; mommee alodahi e ngadi daakodo naa.

¹⁰ Goodou gu ngalo de Maadua doodou Ia Hagaola; goodou tee manadua de Baba ne buibuia goodou. Deelaa ai, e dee galemu donu doodou doo manu danuaa, ma denga grapevine ne sigi mai i denga henua gee;

¹¹ gai ga haia naa donu e goe ga ssomo i de laangi laa aau e doo ai, ma de hai ga loage olaadeu huaala i taiao aau ne doo ai, gai e deai donu mee e hagihagi ai, i de laangi o taemaha ma de mmae e dee maua laa gi ieiangi.

¹² Hagalaangona adu de hagalongaa o denga huaahenua soa; olaadeu leo e bei de saamumu o denga beau! Hagalaangona adu de hellumi o denga huaadangada; gilaadeu e haganngolo bei tai laumalie!

¹³ Gai ga hagalongaa naa donu denga huaahenua bei de haganngolo o denga vai lagolago, aagai de Maadua e hagasee gilaadeu, gai gilaadeu e saavini naa ga hulo, bei denga gili grain i honga mounga, e ilihia laa i de madangi, ma de mama o de gelegele a de madangi e ili laa ga kave.

¹⁴ Tilo, de mee hagamaatagu gu hai i de ahiahi! Gai i mua de ao de mee, gai gu ui! Deenei tuuhanga o dangada e gaavee adaadeu mee, ma hagaoanga o dangada e gaiaadia odaadeu mee.