Isaiah 15 - De Beebaa Dabu

Muna hagadaemaha i dagodo o Moab

¹ Muna hagadaemaha i dagodo o Moab. De aduhale go Ar o Moab gu odi i de maoha, gai ne dahi donu huu boo ne oha ai. De aduhale go Kir o Moab gu odi i de maoha, gai ne dahi donu huu boo ne oha ai!

² Dangada o Dibon gu loage gi dono hale daumaha, ma ono mommee daumaha e tangi ai; de gau Moab gu tangi i hiidinga Nebo ma Medeba. Dangada alodahi gu dahi olaadeu biho, gai gu duuduu olaadeu gumigumi.

³ Gilaadeu gu kahu i malo daladala i honga haiava; gai dangada alodahi gu tangi ssee i honga dahuuhuu o denga hale ma lodo aduhale, ma de ino gi honga de gelegele ma e tangi ai.

⁴ Dangada o Heshbon ma Elealeh gu tangi, gai olaadeu leo gu tae loo gi Jahaz. Deelaa ai, denga daane hebagi o Moab gu tangi, gai gu manavasaa olaadeu lodo.

⁵ Au gu dangi ogu lodo i hiidinga o Moab; hanu ono dangada gu saavini ma gu hulo gi Zoar, ma Eglath Shelishiyah. Gilaadeu e tangi ma e hulo ai i delaadeu loage i de haiava e hano laa gi Luhith, gilaadeu e tangi i hiidinga mee gu maoha laa i honga de haiava e hano laa gi Horonaim.

⁶ Denga vai o Nimrim gu maamasa, gai denga helii gu mmae; denga manu ssomo gu maakau, gu deai donu manu ssomo e doe.

⁷ Gai gilaadeu e saabai naa alaadeu goloa gu hagabudu e doange, ga hulo ai laa lo te Vai o denga Willow.

⁸ De tangi o dangada gu dohu ai honga de henua go Moab; delaadeu tangi see gu tae loo gi Eglaim, delaadeu hinangalosaa gu tae hogi gi Beer Elim.

⁹ Vai o Dimon gu honu i todo, aagai tigi lava donu agu mee e hagaduasala ai Dimon — dahi laiono e daa naa dangada o Moab e saavini e mmuni, aama gilaadeu e doe i de henua.