Isaiah 13 - De Beebaa Dabu

Muna hagadaemaha i dagodo o Babylon

¹ Muna hagadaemaha i dagodo o Babylon ne hagaago ange gi Isaiah tama daane a Amoz.

² Hagaduulia age dahi hagailonga i honga dahi duuduu malaelae, gai oo ange gi gilaadeu, ma de aloalohagi ange gilaadeu gi loomai gi ulu i haitoga o de gau aamua.

³ Au gu tala ange gi ogu dangada dabu; au gu hagahi ogu daane hebagi gilaadeu gi hagasula ina dogu bole — go gilaadeu e malangilangi i dogu kii.

⁴ Hagalaangona adu, de hagalongaa mai honga denga mounga, bei de hevaalogi o dangada soa mmao! Hagalaangona adu, de hellumi o denga nohoanga hodooligi, bei de hagabuni o denga huaahenua! Tagi o denga hagabuulinga hebagi gu hagabuni dono hagabuulinga e hebagi.

⁵ Gilaadeu e loomai i denga henua mmao, ma mai i mommee alodahi i lalo de langi — go Tagi Maolunga ma denga goloa hebagi o dono lili, gai gilaadeu ga oha ai de henua alodahi.

⁶ Goodou tangi see, go hiidinga de laangi o Tagi Maolunga gu baa mai donu; gai e dae mai naa bei de hai a de Ia Mmahi Mmao laa e oha ai laa!

⁷ Gai dangada alodahi e pole naa olaadeu lima, gai dangada alodahi e maatagu naa.

⁸ Gilaadeu e kona naa de maatagu, gilaadeu e mmae naa ma de manavasaa, bei de hine gu hai laa ono hagalangona. Gilaadeu e hagadau kalo ange naa ma de llele mouli, gai olaadeu mada e mmea naa.

⁹ Tilo, de laangi o Tagi Maolunga gu dae mai donu, gai se laangi hagaduasala, ma de bole aama de lili laumalie, e oha ai de henua ga hai gu se ngadi mommee, gai e daa naa gi maakau de gau haisala i kilaa.

¹⁰ Denga heduu i lo te langi ma olaadeu hagabuulinga e dee maalama naa. De laa e gohu naa i de masavaa e hanage ai, gai de maasina e dee maalama naa hogi.

¹¹ Au e hagaduasala naa henua i lalo, ma de gau baubau i hiidinga olaadeu haisala. Au e hai naa gi dee llodo maolunga de gau hagamaolunga, ma de hai gi maolalo de gau alasala e llodo maolunga laa.

¹² Au e hai naa dangada gi sogoisi ange i denga goolo danuaa, ma de sogoisi ange i goolo o Ophir.

¹³ Deelaa ai, au e hai naa gi ngalungalue de langi; gai henua i lalo gi ngalue gee mai i dono duulanga, i de laangi o de bole o Tagi o denga hagabuulinga hebagi, ma de laangi o dono lili laumalie.

¹⁴ Dangada e bei naa dahi dia e dolohia laa, aabe go denga ssiibi e deai selaadeu ia hagaloosi, gai dahi ma dahi e ahe naa gi daho ono dangada, dahi ma dahi e ahe naa gi dono henua donu.

¹⁵ Gai be goai naa huu e boogia mai, gai e velo gi magau, gai dangada alodahi e boogia mai e daa naa ga magau i de gadilaasa.

¹⁶ Alaadeu gaagaa e dagadagahia naa ga maakau i olaadeu mada i mua; gai goloa i lodo olaadeu hale e gaavee naa, gai alaadeu haahine dau bodu e haia naa gi de mahi.

¹⁷ Tilo, au e hai naa gi loomai de gau Media gi hebagi ange gi gilaadeu, go dangada e dee anga ange gi denga selevaa, gai e dee malangilangi i denga goolo.

¹⁸ Alaadeu mee hholu e daa naa ga maakau denga dama daane, gilaadeu e dee abodonu ange naa gi denga gaagaa, aabe e llodo aaloha ange gi denga gauligi.

¹⁹ Babylon, de hadu hagamogomogo a denga nohoanga hodooligi, gai go de mahamaha o de gau Babylon e hagamaolunga ai laa, e oohaa naa e de Maadua, bei dagodo o Sodom ma Gomorrah.

²⁰ Gai e deai naa donu dangada e nnoho ai i denga atangada e loomai; e deai hogi se dangada Arab e hagaduulia dono hale malo i kilaa, aabe ni dangada hagaloosi ssiibi e haia alaadeu hagabuulingaa ssiibi gi hagammabu i kilaa.

²¹ Aagai denga manu lodo henua e nnoho naa i kilaa, denga jackal e hhao naa lodo olaadeu hale ga hoohonu; denga owl e nnoho naa i kilaa, gai denga guudi de vao e saavini saele naa i kilaa.

²² Denga hyena e koo naa i lodo ono hale buibui makaga, gai denga jackal i lodo ono hale danuaa. Dono masavaa gu dae mai donu, gai ono laangi e dee daulooloa naa donu.