Isaiah 12 - De Beebaa Dabu

Dahi daahili tuhi

¹ De laangi laa gai koe e hagadaba naa: “Tagi Maolunga, au e hagaahe adu de abodonu gi de goe, go hiidinga, e dee galemu koe nogo lili i de au, gai iainei koe gu dee lili, gai gu hagaaneane ogu lodo.

² Tilo, de Maadua go dogu Ia Hagaola; au e hagadonu ia, deelaa ai, au e dee madagu. De Ia Aamua, Tagi Maolunga, go ogu mahi ma dagu daahili, gai go ia dogu Ia Hagaola.”

³ Goodou e asu naa oodou vai ma de malangilangi mai i denga saalingaa vai hagamouli.

⁴ De laangi laa gai goodou e hagataba naa: “Hagaahe ange de abodonu gi Tagi Maolunga, ma de dalodalo ange gi de ia; hagadele ina i denga huaahenua dagodo o ana hegau gu hai, ma de tala bolo gi hagaamua ina dono ingoo.

⁵ Daahili ange gi Tagi Maolunga, i hiidinga ana hegau mahamaha gu hai, haia gi iloo e henua i lalo alodahi de mee nei.

⁶ Dangada o Zion, goodou hevaalogi daahili i de malangilangi, i hiidinga de Ia Dabu o Israel i oodou magavaa e maolunga.”