Isaiah 10 - De Beebaa Dabu

¹ E vakaa naa gilaadeu e hagaduulia hainga dee heohi, ma gilaadeu e haia hainga e hagaduasala ina dangada;

² ma de kave gee de heohi o de gau hagaau aloha, ma tee hagamodu muna o ogu dangada gu duasala laa i de heohi, ma de vaivai hai denga haahine gu maakau olaadeu bodu ma de gaiaa mee o denga gauligi gu deai olaadeu damana.

³ Gai ni aha naa oodou e hai i de laangi o de hagaduasala, ma de masavaa e dae mai ai de hai ngadaa i de mommee mmao? Go daho ai oodou e hulo gi balea adu goodou? Gai go hee naa donu oodou e dugu ai oodou goloa lagolago?

⁴ Gai gu deai ange oodou mee e hai, aagai go de ino donu huu gi lalo madali gilaadeu gu noonoodia, aabe go de baakuu madali de gau maakau. Gai mee nei alodahi tee maua donu i de hagahelui dono lili, gai dono lima goi hagaabo donu huu.

De hagaduasala o Assyria

⁵ E vakaa naa Assyria, de laagau aagu ne hagahai hegau i dogu lili, dono lima go togo aagu ne hagahai hegau i dogu bole.

⁶ Au ne hai ia gi hano gi hai baasi ange gi dahi huaahenua baubau, au ne kave ia gi hai baasi ange gi dahi huaadangada oogu e lili ai laa, ma de hai gi de mahi gilaadeu ga kave olaadeu goloa, aama de dagadagahi gilaadeu bei denga bela i honga denga haiava.

⁷ Aagai e dee deenei dana hagasaele, e dee deenei hogi dana mee ne maanadu; aagai ia ne hagatau de oha, ma de hagadee kii denga huaahenua soa.

⁸ Ia ne hagadaba, “E aha, ogu dagi alodahi e dee ni hodooligi?

⁹ Calno tee bei laa dagodo o Carchemish? Hamath tee bei laa dagodo o Arpad? Gai Samaria tee bei laa dagodo o Damascus?

¹⁰ Au ne hagadee kii denga nohoanga hodooligi e daumaha ange laa gi denga diinonga; olaadeu diinonga e maolunga ange i diinonga o Jerusalem ma Samaria —

¹¹ e aha, au e dee hai naa hogi Jerusalem ma ono diinonga bei dagu hai ne hai ai laa Samaria ma ono diinonga?”

¹² Deelaa ai, de masavaa naa huu a de Ia Aamua e hagalava ai ana hagatau alodahi ange gi de mounga go Zion ma Jerusalem, gai ia e hagadaba naa, “Au e hagaduasala naa de hodooligi o Assyria, i hiidinga dono lodo maolunga ma luoono mada hagamaolunga.

¹³ Go hiidinga ia ne hagadaba, ‘Au ne maua i de hai mee nei i ogu mahi donu ma dogu iloo mee, go hiidinga de dahi ogu donu ange. Au ne aau gee goinga o denga huaadangada, ma de kave olaadeu goloa hagamogomogo; au ne hagadee kii gilaadeu e nnoho i kilaa bei dagodo hegau a dahi kaau daane.

¹⁴ Au gu haalo naa dogu lima e kave ai de lava o denga huaadangada; bei dagodo o tangada e hagabudulia denga ngago gu tili laa, gai au e hagabuni mai naa henua alodahi; gai e deai naa donu se bakau e gabagaba, aabe se manu e hhanga dono ngudu e goo.’ ”

¹⁵ E aha, e maua e taguu i de hagadaba, bolo ia e kii ange i tangada e hagaabo ina, aabe go ssoaa i de hagadaba bolo ia e kii ange i tangada e soaa ina mee? E dagodo be go dahi laagau e hagaabo ina tangada e daohia age, aabe go de laagau e daohia age tangada e dee se laagau laa!

¹⁶ Deenei ai, de Ia Aamua, Tagi o denga hagabuulinga hebagi, e hai naa gi mmagi ono daane hebagi mmahi, gai dono hagadubu e haula naa i de ahi ula.

¹⁷ De Maalama o Israel e hai naa ga se ahi, de Ia Dabu o Israel se ahi ula; gai e dudu naa ga deai manu daladala ma manu duiduia i dahi laangi donu huu.

¹⁸ De mahamaha o lodo henua i kilaa ma de gelegele e ssomo ai manu e oha naa donu ga odi, bei tangada magi e hagadaga iho laa.

¹⁹ Gai denga manu ssomo e doe i de lodo henua e sogoisi naa; gai tamaa gauligi e maua i de sisi ga daohi.

De aahe mai o dangada o Israel e doe

²⁰ De laangi laa gai dangada o Israel e doe, ma gilaadeu ne ola i dangada o Jacob e dee tali hagalodolodo ange naa gi de ia ne oohaa laa delaadeu henua; aagai gilaadeu e hai naa Tagi Maolunga, de Ia Dabu o Israel, go delaadeu tali, i de heohi.

²¹ Dangada e doe e aahe mai naa, dangada o Jacob e doe e aahe mai naa gi de Maadua Mmahi.

²² Israel, e dee galemu naa donu de soa oo dangada bei de lagolago gelegele i gabugabu tai, gai e sogoisi naa donu huu e aahe mai. Gai gu lava donu i de hagamodu i de heohi, bolo e daa gilaadeu gi maakau.

²³ De Ia Aamua, Tagi o denga hagabuulinga hebagi, e hagasula ina de oha de henua alodahi gu tala laa.

²⁴ Deenei ai, e hagadaba de Ia Aamua, Tagi o denga hagabuulinga hebagi: “Ogu dangada e nnoho laa i Zion, goodou aude maatagu i de gau Assyria, e hagailiilihia laa goodou i de laagau, ma de hagaabo de laagau ga daa ai goodou, bei hegau a de gau Egypt.

²⁵ E dee mmule naa donu gai gu helui dogu lili i goodou, gai dogu bole gu daa gilaadeu gi maakau.

²⁶ Gai Tagi o denga hagabuulinga hebagi e hagailiili naa gilaadeu i taula, bei dana hai ne hai ai de gau Midian i de baba o Oreb; gai ia e hagaabo ange naa dono dogo gi honga de vai, bei ana hegau ne hai laa i Egypt.

²⁷ De laangi laa gai dana mee e hagauda adu gi oodou eu e aau gee naa, gai dana laagau hagahai hegau e hagauda adu e hadi naa, i hiidinga goodou gu pedi.”

²⁸ Denga daane hebagi gu tae gi Aiath, gilaadeu gu hulo ma gu ui i Migron; gilaadeu gu dugu olaadeu goloa i Mikmash.

²⁹ Gilaadeu gu hulo laa lo te mommee gelo, gilaadeu e nnoho naa i Geba i de boo. Ramah gu bolebole, Gibeah o Saul gu savini ma gu hano.

³⁰ Dangada i Gallim, goodou tangi! Laishah, goodou hagalaangona! Dangada o Anathoth, goodou pasa ange!

³¹ Madmenah gu saavini ma gu hano; dangada o Gebim gu hulo ma gu mmuni.

³² Anailaa nei gai ia e nnoho naa i Nob, ia e tugi ange naa dono lima gi tamaa hine o Zion, i de mounga o Jerusalem.

³³ Tilo, de Ia Aamua, Tagi o denga hagabuulinga hebagi e duuduu iho naa denga laa mmahi ga baakuu. Gai manu lloa e sele iho naa, gai gilaadeu e lodo maolunga e hai naa ga maolalo.

³⁴ Ia e sele naa denga manu ssomo i lodo mee muimui i taguu; denga manu lloa o Lebanon e sele iho naa donu.