Hosea 8 - De Beebaa Dabu

Israel e hagihagi donu hua o ana hegau

¹ Ilihia de hanga manu i doo ngudu! Dahi igele gu hano iho gi honga de hale o Tagi Maolunga, go hiidinga gilaadeu gu oha dagu hagatoo donu hagaheloongoi, ma de hai baasi ange gi agu hainga.

² Israel e dangi mai gi de au, “Dogu Maadua, gimaadeu e iloo goe.”

³ Aagai Israel ne hagangadi mee de mee danuaa; dahi hagadaumee e doolohi naa ia.

⁴ Gilaadeu gu hili hanu hodooligi, gai au tee iloo; gilaadeu ne hili hanu dagi o de henua, aagai au tee malangilangi ai. Gilaadeu ne hai olaadeu diinonga i alaadeu selevaa ma goolo, ga hidi mai ai delaadeu hagaduasala.

⁵ Samaria, dilia doo ⌊diinonga e hagadulagi ange laa gi de⌋ kaau! Au e kona mmao de lili i gilaadeu. Dee hee maa taulooloa delaadeu dee maua i de hai gi gilimalali gilaadeu?

⁶ Gilaadeu ni dangada mai i Israel! Tiinonga nei — go de labagau ne haia; gai e dee go de Maadua abodonu. De kaau o Samaria e oha naa ga too dagidahi.

⁷ Gilaadeu ne doo de madangi, gai e hagihagi naa hua o ssio. Alaadeu grain e deai olaadeu hua, gai e dee maua i de hai ai pelaoaa. Gai noo e hanu olaadeu hua grain, gai de gau henua gee e loomai naa ga kave.

⁸ Israel gu oohaa ma gu maoha; ono dangada gu nnoho i denga huaahenua, gilaadeu gu bei de goloa gu deai laa ono haigamaiana.

⁹ Gilaadeu gu hulo gi Assyria, bei dahi donkey aada e silivaahea saele laa. Ephraim gu hagao ange ia gi ono dau soa.

¹⁰ Gai e dee galemu donu delaadeu hagao ange gilaadeu gi denga huaahenua, gai au gu dai hagabuni mai naa gilaadeu. Gilaadeu gu hagadaga ange naa de sogoisi i delaadeu hagaduasala ina i daho denga hodooligi ma dagi.

¹¹ Ephraim ne hagatuu mommee o ssigidaumaha lagolago ange gi de haisala, aagai mommee nei gu ni mommee o ssigidaumaha e hagahaisala ina ia.

¹² Au ne sisi ange gi gilaadeu mee lagolago i dagodo agu hainga, aagai gilaadeu ne hai hainga nei bei ni mee gee.

¹³ Gilaadeu e hai denga sigidaumaha mai gi de au, ma de gai kano o manu e hai ai; aagai Tagi Maolunga e dee malangilangi i gilaadeu. Gai ia e dee ngalo naa donu olaadeu baubau, ma de hagaduasala gilaadeu i hiidinga olaadeu haisala; gilaadeu e aahe naa ga hulo gi Egypt.

¹⁴ Israel gu ngalo de ia ne haia ia, gai gu hagatuu denga hale danuaa; Judah gu hagalagolago ono aduhale buibui. Aagai au e gaamai naa de ahi gi duungia ono aduhale, gai de ahi e dudu naa ga odi denga mommee buibui makaga.