Hosea 7 - De Beebaa Dabu

¹ de masavaa aagu e lodo ai e hagaieiangi Israel, gai gu gidee mai baubau a Ephraim, ma hegau dee heohi a Samaria. Gilaau ne hai hegau i de hagasenga, de gau gaiaa e ulu gi lodo hale e gaiaa ai, denga hagabuulinga e gaiaa mee o dangada i honga denga haiava;

² aagai gilaadeu e tee tonu iho donu bolo au e manadua alaadeu hegau baubau alodahi. Alaadeu hegau baubau gu duuli gilaadeu, gai e daakodo donu i mada luoogu mada i masavaa alodahi.

³ Gilaadeu e hagamalangilangi denga hodooligi i alaadeu dahulinga baubau, gai e hagamalangilangi denga dagi i alaadeu muna hhadu.

⁴ Gilaadeu alodahi ni dangada dagodo haisala; gai e bei dagodo o de umu mmahi a tangada e dee ulu laa ga dae ai gi de hhua danuaa denga pelaoaa.

⁵ De laangi o taonga a de hodooligi gu hagailonga, gai denga dagi e ssenga i de unu uvaini; gai de hodooligi gu unu hogi madali gilaadeu.

⁶ Olaadeu lodo e vvela bei dahi mommee dao mee; gilaadeu e loomai ma alaadeu hagatau hagasenga. Gilaadeu e golomagi olaadeu llili i de boo; gai e bei de ahi ula i taiao age.

⁷ Gilaadeu alodahi e vvela bei de mommee dao mee; gilaadeu e daa gi maakau olaadeu dagi. Olaadeu hodooligi alodahi gu odi i de maakau; gai gu deai se gilaadeu e dangidangi mai i de bale.

⁸ Ephraim gu hilo ma denga huaahenua; gai gu bei de keege tee huli laa.

⁹ De gau henua gee gu hai gi deai ono mahi, aagai ia e dee gidee iho donu. Ia gu sinasinaa dono biho aagai ia e dee iloo donu.

¹⁰ De lodo maolunga o Israel gu hagabaubau donu huu ia; aagai mee nei alodahi tee maua i de hai ia gi ahe gi daho Tagi Maolunga dono Maadua, aabe ne hai ia gi saalaa ia.

¹¹ Ephraim gu bei dahi manu kono e lodo senga laa ma teai ana maanadu danuaa; ia e hagahi ange Egypt ma de hano gi Assyria.

¹² Au e maga naa gilaadeu i dagu galauna, i de masavaa olaadeu e hulo ai; au e dada iho naa gilaadeu bei denga manu llele i lo te moana. Au e haele naa gilaadeu bei dagodo muna gu tala ange gi delaadeu hagabuulingaa dangada.

¹³ E vakaa naa gilaadeu, go hiidinga gilaadeu gu daahuli gee i de au! Daia gilaadeu gi maakau, go hiidinga gilaadeu gu hai baasi mai gi de au! Au ne lodo mmao e hagaola gilaadeu, aagai gilaadeu e hadu muna i de au.

¹⁴ Gilaadeu tee dalodalo mai i de lodo abodonu, aagai e tangi see i honga olaadeu moenga. Gilaadeu ne hagalagolagohia gilaadeu i hiidinga denga grain ma uvaini hoou; aagai gilaadeu ne daahuli gee mai i de au.

¹⁵ Au ne agoago ange gilaadeu ma de hagammahi ange gilaadeu, aagai gilaadeu ne hai denga hagatau e hai baasi mai ai gi de au.

¹⁶ Gilaadeu e aahe mai, aagai tee aahe mai gi de au, de Ia Maolunga Mmao laa: gilaadeu e bei de mee hholu e deai mee e kii ange ai. Olaadeu dagi e maakau naa i de gadilaasa i hiidinga o alaadeu muna hagamaolunga. Gilaadeu e hagadookaa ina naa i de henua go Egypt i hiidinga o de mee nei.