Hosea 5 - De Beebaa Dabu

De hagaduasala gu baba ange gi Israel

¹ De gau haimeedabu, nnoho mai hagalaangona muna nei! Dangada o Israel, goodou nnoho mai hagalaangona! Huaabodu o denga hodooligi, nnoho mai hagalaangona! De hagaduasala nei e hai adu donu gi goodou; go hiidinga goodou ne hagasengalia i Mizpah, gai dahi sele gu doha i honga de mounga go Tabor.

² Gilaadeu e hai dahi geelonga gelo i Shittim; gai au e haele naa gilaadeu alodahi.

³ Au e iloo dagodo o Ephraim, gai dagodo o Israel e dee maua i de hagammuni i de au. Ephraim, koe gu hai hegau bei de hine hai be se manu, gai Israel gu dee gilimalali.

⁴ Alaadeu hegau hakino gee gu daohi gilaadeu gi dee aahe mai gi delaadeu Maadua. Go hiidinga gilaadeu e llodo mmao i de hai be se manu, gai gilaadeu gu dee iloo Tagi Maolunga.

⁵ De hagamaolunga o Israel gu hagabaubau donu huu gilaadeu; Dangada o Israel ma Ephraim gu baakuu i lodo olaau haisala; Judah gu baakuu hogi madali gilaadeu.

⁶ Gilaadeu e kave naa alaadeu hagabuulingaa ssiibi ma kaau ga hulo ai e ssala Tagi Maolunga, aagai gilaadeu e dee gidee naa donu ia; ia gu hano gee mai i olaadeu daha.

⁷ Gilaadeu tee hai hegau ange gi Tagi Maolunga i de muna abodonu; gilaadeu ne hagadili denga dama gaiaa. Gai taonga i de duu de maasina i dai, e oha naa gilaadeu ma alaadeu veelenga.

⁸ Ilihia de hanga manu i Gibeah, gai ilihia de trumpet i Ramah. Hagailoo ina de masavaa o de hebagi i Beth Aven; denga daane hebagi o Benjamin, go goodou e dagi!

⁹ Ephraim e hai naa ga se mommee ngadi dagodo i de laangi o de hagaduasala. Au e hagailoo naa mee gu hagamodu e hai ange gi denga aamuli o Israel.

¹⁰ Denga dagi o Judah e bei dangada e uea laa goinga o dangada. Au e hagaduasala naa gilaadeu i dogu bole bei dagodo o tolona.

¹¹ Ephraim gu hagahai ngadaa ina, ma de maoha i de hagaduasala, ia gu hagammahi e daudali i denga diinonga.

¹² Au e bei dagodo o dahi lengisi i daho Ephraim, gai e bei de mee bobo i daho dangada o Judah.

¹³ Gai de masavaa a Ephraim ne gidee ai dono magi, gai Judah ne gidee hogi dono maanuga, gai Ephraim ne hano gi Assyria e ssala ai dahi bale, ia ne hai hanu gi hulo gi de hodooligi maolunga laa. Aagai ia tee maua i de hagaieiangi ia, aabe go de hai gi mmahu ono maanuga.

¹⁴ Au e hebagi ange naa gi Ephraim bei dahi laiono, gai e hebagi ange gi Judah bei dahi laiono mmahi. Au e hagalagolagohia naa gilaadeu ga tili gilaadeu gai au ga hano. Au e kave gee naa gilaadeu, gai e deai donu e maua i de hagaola gilaadeu.

¹⁵ Gai au e ahe naa gi dogu mommee, ga dae ai gi delaadeu tala olaadeu haisala. Gai gilaadeu ga ssala ai au i delaadeu duasala.