Hosea 11 - De Beebaa Dabu

De aloha o de Maadua i Israel

¹ “De masavaa o Israel e gauligi ai, gai au ne aloha i de ia; au ne hagahi dagu dama ga hagasao mai ia i Egypt.

² Aagai ga dee modu huu dagu hagaagahi gilaadeu, gai gu kii ange donu delaadeu hulo ga hagammao gee i de au. Gilaadeu ne sigidaumaha ange gi denga Baal, ma de dudu mee maanongi ange gi denga diinonga.

³ Gai go au ne agoagona ange Ephraim gi seesee, go au ne boogia olaadeu lima; aagai gilaadeu tee iloo donu bolo go au ne hagaieiangi ina gilaadeu.

⁴ Au ne dagi gilaadeu i de abodonu ma de lodo aloha ange gi gilaadeu. Au ne aau de laagau hagahai hegau i honga olaadeu ua, ma de ino iho ga haangai ange gilaadeu.

⁵ E aha, gilaadeu e dee aahe naa gi Egypt, gai Assyria e dee dagi naa gilaadeu, i hiidinga delaadeu dee llodo e daahuli olaadeu lodo?

⁶ De gadilaasa e hano naa laa lodo olaadeu aduhale, ga oha mee hagamakaga o denga haitoga, ma de hai gi dee ssula alaadeu hagatau.

⁷ Ogu dangada e nnoho huu e daahuli gee i de au, gai ga hagahia naa donu e gilaadeu de Ia Maolunga Mmao laa, aagai ia e dee hagahiihidi age donu gilaadeu.

⁸ Ephraim, e maua e au i de tili goe? Israel, e maua e au i de dugu goe gi hano? E maua e au i de hai goe bei dagodo o Admah? E maua e au i de hai goe bei dagodo o Zeboiim? Ogu lodo gu dee baba mmao, au gu dee maua i de golomagi dogu lodo aloha.

⁹ Au e dee hagasula naa donu i dogu lili, aabe e huli ange ga oha Ephraim. Go hiidinga au go de Maadua, au e dee se dangada, go de Ia Dabu e noho laa i oodou magavaa. Au e dee hanadu naa donu ma dogu bole.

¹⁰ Gilaadeu e daudali ange naa i Tagi Maolunga, ia e oo naa bei de laiono e goo laa; uaa, ia e oo naa bei de laiono e goo laa, gai ono dangada e bolebole naa ga loomai ai i dai.

¹¹ Gilaadeu e bolebole naa ga loomai ai bei denga manu llele mai i Egypt ma denga manu kono mai i de henua go Assyria. Gai au e hagaahe mai naa gilaadeu gi delaadeu mommee,” go Tagi Maolunga e hagadaba.

Haisala o Israel

¹² Ephraim gu duuli au i denga muna hhadu, de gau Israel gu daahanga mai au; gai a Judah goi hai baasi ange huu gi de Maadua, de Ia Dabu e hai hegau laa i de mee abodonu.