Hosea 10 - De Beebaa Dabu

¹ Israel e bei dagodo o dahi grapevine lau kohu, gu loage laa ono hua. Gai ga hagadaga ange huu de lagolago ono hua gai ia ga hagaduu gu kii ange de lagolago ono mommee o ssigidaumaha. Gai ga hagadagadaga age huu dono lava, gai ia ne hagalaagii ono duludulu hadu dabu.

² Gilaadeu gu llodo lagolago, gai gilaadeu e hagaduasala naa donu i hiidinga olaadeu baubau. Tagi Maolunga e oha naa olaadeu mommee o ssigidaumaha, ma duludulu o olaadeu diinonga.

³ Gai gilaadeu e hagataba naa: “Gimaadeu e deai donu semaadeu hodooligi, go hiidinga gimaadeu tee maatagu i Tagi Maolunga. Aagai ga dahi naa donu omaadeu hodooligi, gai ni aha naa aana e hai mai gi gimaadeu?”

⁴ Gilaadeu e tala hanu ngadi muna, ma de hai denga ngadi hagatoo donu hagaheloongoi; deelaa ai, de hagaduasala gu sula age bei dagodo o denga helii hagammau e ssomo age laa i de mommee gu hagabalabala.

⁵ Dangada e nnoho i Samaria gu maatagu i hiidinga o dahi ⌊diinonga e hagadulagi ange laa gi de⌋ kaau i Beth Aven. Dono huaadangada e tangi naa i hiidinga o delaadeu diinonga, ono dangada haimeedabu e tangi naa hogi, aama dangada ne malangilangi i de mahamaha o tiinonga laa, go hiidinga gu gaavee gee mai i olaadeu daha.

⁶ Tiinonga laa e gaavee naa gi Assyria, ga gaavange gi de hodooligi maolunga laa. Ephraim e dogaa naa, Israel e dogaa naa hogi i dono diinonga.

⁷ Samaria ma dono hodooligi e daahea naa bei de laa manu damaa mee i honga denga vai.

⁸ Denga mommee daumaha o Aven e oha naa, go de mommee o Israel ne haisala ai. Manu daladala ma manu duiduia e ssomo age naa i honga olaadeu mommee o ssigidaumaha. Gai gilaadeu e hai ange naa gi denga mounga, “Haolia gimaadeu!” gai e hai ange naa gi denga duuduu, “Baakuu mai haolia gimaadeu!”

⁹ De gau Israel, goodou ne haisala mai huu i de masavaa o Gibeah, gai gilaadeu goi duudagi donu huu de haisala. E aha, e dee dae mai naa de hebagi ga hagaduasala gilaadeu i Gibeah?

¹⁰ De masavaa naa huu oogu e lodo ai, gai au e hagaduasala naa gilaadeu; denga huaahenua e hagabuni naa ga hebagi ange gi gilaadeu ga noonooa gilaadeu i hiidinga olaadeu haisala gu lagolago.

¹¹ Ephraim e bei de kaau gu agoagona laa, ia e malangilangi i de duuduu grain; gai au e hagauda ange naa gi honga dono ua mahamaha laa de laagau hagahai hegau. Au e hai naa Ephraim gi daangia de laagau hagahai hegau, Judah gi hagabalabala ina de gelegele, gai Jacob gi oohaa age de gelegele.

¹² Goodou dooa ange de heohi gi oodou lodo, gai goodou ga hagihagi ai hua o de abodonu; hagabalabala ina de gelegele makaga i oodou lodo, go hiidinga gu dae mai de masavaa oodou e ssala ai Tagi Maolunga, ga dae ai gi dono humai ga hai gi hano iho de heohi gi oodou elunga.

¹³ Goodou ne doo de baubau, gai goodou gu hagihagi hua o de baubau, goodou ne gai hogi hua o de hadu muna. Gai go hiidinga goodou ne kai ange gi oodou mahi donu ma oodou daane hebagi soa,

¹⁴ deenei ai, de hagalongaa o de hebagi e dae mai naa gi oo dangada, gai oo mommee buibui makaga alodahi e oha naa — bei de hai a Shalman ne oha ai laa Beth Arbel i de masavaa o de hebagi, ma de masavaa o denga dinana ma alaadeu dama ne dagadagahia ai gi lo te gelegele.

¹⁵ Bethel, mee nei e hai adu naa gi de goe, go hiidinga de kona de lagolago oodou baubau. De hodooligi o Israel e daia naa ga magau i de dae mai de laangi laa.