Hebrews 9 - De Beebaa Dabu

De hai daumaha i de mommee dabu

¹ Gai tahi hagatoo donu hagaheloongoi ne hanu donu hogi hainga ange gi de hai daumaha, aama de mommee dabu i henua i lalo.

² Gai deenei de hai ne hagaduu ai de hale malo. De aabi e mua gi daha iai de mee dugu laama, ma teebele iai pelaoaa dabu; gai e hagaingoo ange go de Mommee Dabu.

³ Gai de baasi laa o de lua malo buibui go de aabi e hagaingoo ange laa go de Aabi Dabu mmao,

⁴ gai e dugu ai de mommee o ssigidaumaha goolo e dudu ai laa mee maanongi, ma de ngavesi o de hagatoo donu hagaheloongoi e haoli alodahi laa i goolo. Gai ono lodo iai de ssaa goolo e hhao ai laa denga manna, ma togo o Aaron ne matili age laa, aama luu dibaa hadu baabaa e sisi ai laa de hagatoo donu hagaheloongoi.

⁵ Gai ono elunga iai luu cherubim o de mahamaha, olaau bakau e doha ange gi honga de pono o de tala haisala. Aagai gidaadeu e dee maua i de pasa i dagodo alodahi o mee nei.

⁶ Deenei de hai ne hagatau ai de mommee laa; gai de gau haimeedabu e ulu gi lo te aabi e mua gi daha i masavaa alodahi ga hai ai alaadeu hegau i de laa tubua.

⁷ Aagai go tangada haimeedabu maolunga donu huu e maua i de ulu gi lo te aabi e mua gi lodo, gai e dahi donu huu ono hanonga e ulu ai i de ngadau, gai ia e dee maua i de ulu gi kilaa noo e deai dodo e kave madali ia, gai ia ga hai ai ssigidaumaha i hiidinga o ono haisala aama haisala o dangada gu hai laa gai se tee hagabau.

⁸ De Hagasaalunga Dabu e hagaago mai i de mee nei, bolo de abaaba e ulu ai gi de Aabi Dabu mmao laa tigi hhuge donu, i taulooloa de duu o de hale malo e hagaduu laa i taamada.

⁹ De mee nei se ada ange gi de masavaa go iainei. Gai aanei dagodo o de hagatau nei, denga mee ngadi gaavange ma sigidaumaha e dee maua donu i de hai gi heohi abodonu lodo o tangada e daumaha i mee laa.

¹⁰ Gai mee nei ni mee ange donu huu gi denga gai, ma mee unu, aama de hai e hagagilimalali ai. Mee nei alodahi ni hainga ange gi mee e hai ange gi de angaanga ga dae ai gi de masavaa o de hagatau hoou.

De hagaola i dodo o Klisdo

¹¹ Aagai de masavaa o Klisdo ne humai ai ga hai tangada haimeedabu maolunga o mee danuaa gu daakodo laa donu iainei, gai ia ne ulu gi lo te hale malo e maolunga ange ma de heohi abodonu ono dagodo, gai e dee se hale malo ne hai i lima o dangada, e bei, e dee se mee ne hai madali mee o henua i lalo nei.

¹² Gai ia tee ulu madali dodo o denga guudi ma kaau gauligi, aagai ia ne ulu gi lo te Aabi Dabu mmao laa i e dahi donu huu hanonga madali ono dodo donu, gai ia ga hai ai gi maua de mouli e dee ngado mai.

¹³ Go hiidinga noo dodo o denga guudi ma kaau madali lehu o de kaau hahine e hagasii laa gi honga olaadeu e dee gilimalali, ne maua i de hai gi dabu ma de hagagilimalali de angaanga o tangada,

¹⁴ aagai e kii ange donu dodo o Klisdo i de maua i de hai de mee nei. Ia ne dugu ange dono angaanga gi de Maadua, e deai laa mee baubau iai, i ssauaa o de Hagasaalunga e dee ngado mai laa, gai ia ga hai ai ssigidaumaha e hagagilimalali ai tagi i odaadeu lodo mai i hegau o de magau, gi maua ai e gidaadeu i de daumaha ange gi de Maadua e mouli laa.

¹⁵ Deenei ai, Klisdo go de ia donu e hano i magavaa o dangada ma de Maadua i de hagatoo donu hagaheloongoi hoou, gi maua ai e gilaadeu gu hagahia laa i de kave de mouli e dee ngado mai gu hagatoo donu laa, go hiidinga ia ne magau e hagao ai gilaadeu, gai ia ga hai ai gi ilaage gilaadeu mai i olaadeu haisala ne haisala ai i lalo tahi hagatoo donu hagaheloongoi.

¹⁶ Go hiidinga de boolonga e hagasauaa donu huu noo tangada ne haia gu magau,

¹⁷ go hiidinga de boolonga e hagahai hegau donu huu i de magau o tangada; i hiidinga e dee maua i de hagahai hegau i de masavaa o tangada e mouli ai.

¹⁸ Deelaa hogi de hiidinga tee maua ai laa i de hagahai hegau tahi hagatoo donu hagaheloongoi noo teai dodo.

¹⁹ Gai ga lava huu i de tala ange a Moses muna alodahi o de hainga gi de huaadangada, gai ia ga kave dodo o hanu kaau gauligi ma dodo o hanu guudi madali hanu vai, ga hai hanu huluhulu mmea, ma laa o de hyssop ga hagassii ange ai gi honga de beebaa mulo laa, aama honga o dangada alodahi,

²⁰ ga hagadaba, “Aanei dodo o de hagatoo donu hagaheloongoi a de Maadua ne tala adu goodou gi daudali ai.”

²¹ Ia ne hagasii ange hogi hanu dodo gi de hale malo ma goloa alodahi e hai ai laa hegau dabu.

²² Gai e dai odi donu mee alodahi i de hagagilimalali i dodo i de hainga a Moses, gai e dee maua donu i de degi ange gi haisala o dahi noo e dee hagassali dodo.

Ssigidaumaha a Klisdo e kave gee haisala

²³ Gai ne heohi de hagagilimalali ada o mee o de langi i mee nei, aagai mee o de langi e danuaa ange sigidaumaha e hai ange aagena i mee nei.

²⁴ Go hiidinga Klisdo tee ulu i de mommee dabu ne hai laa i lima o dangada, go de ada o de mommee dabu abodonu; aagai ne ulu donu gi de langi, gai iainei gu i mada luu mada o de Maadua i odaadeu hiidinga.

²⁵ Ia tee hanage hogi gi de langi e gaavange ia e hai ai ssigidaumaha i hanonga lagolago, bei de hai a tangada haimeedabu maolunga e kave ai laa hanu dodo e ulu ai i de Aabi Dabu mmao laa i ngadau alodahi, gai dodo laa e dee niiona donu.

²⁶ Noo deenei tagodo, gai Klisdo ne aheahe ange ga hagaduasala mai i taamada de hai o henua i lalo. Aagai tagodo donu, ia ne humai i dahi hanonga daudahi i denga laangi hagaodi nei, e gaavange dono mouli e hai ai ssigidaumaha e kave gee ai haisala.

²⁷ Bei de hai gu hagamodu ange ai laa bolo dangada e maakau i e dahi donu huu hanonga, gai dua naa huu mee nei go de hagamodu muna,

²⁸ gai e bei ai hogi dagodo o Klisdo: ia ne gaavange dono mouli e hai ai ssigidaumaha i e dahi donu huu hanonga, e kave gee ai haisala o dangada soa, gai ia e hagasula mai naa hogi i de lua hanonga, gai e dee se humai e hagauda haisala, aagai e hagamouli gilaadeu e daalia ia.