Hebrews 8 - De Beebaa Dabu

Iesu, tangada haimeedabu maolunga o de hagatoo donu hoou

¹ De mee hagamogomogo i lodo amaadeu muna e tala adu deenei: gidaadeu e dahi odaadeu dangada haimeedabu maolunga, e noho i de baasi madau o de nohoanga o de Ia Maolunga Mmao laa i de langi,

² gai go ia e haia hegau i lo te hale dabu, go de hale malo abodonu a Tagi Maolunga ne hagaduu laa, gai tee hagaduu i lima o dangada.

³ De gau haimeedabu maolunga alodahi e hili gi gaavange denga mee ngadi gaavange ma de hai denga sigidaumaha. Deenei ai, e heohi hogi de hai a tangada haimeedabu nei dahi sigidaumaha.

⁴ Gai noo ia e noho i henua i lalo, gai ia e dee se dangada haimeedabu, go hiidinga e hanu donu dangada haimeedabu e gaavange mee ngadi gaavange bei de hai gu tala ai laa i de hainga.

⁵ Gilaadeu ne hai hegau i de mommee dabu e hagadulagi ange laa gi de mee i de langi. Go hiidinga de masavaa a Moses ne baba ange ai e hagaduu de hale malo, gai de Maadua ne tala ange, ga hai ange, “Diiloo hagatuulia mee alodahi gi bei dagodo o de hagadulagi gu hagaago adu gi de goe i honga de mounga.”

⁶ Aagai Iesu ne kave dahi duulanga hegau e maolunga ange i hegau madagidagi, go hiidinga de hagatoo donu hagaheloongoi aana e hai hegau ai e danuaa ange, i hiidinga ne hagaduu i denga hagatoo donu e danuaa ange.

⁷ Gai noo tahi hagatoo donu hagaheloongoi teai donu mee e dee heohi iai, gai tee ssala ange donu dahi hagatoo donu hagaheloongoi gee.

⁸ Aagai de Maadua ne gidee de haisalasala o dangada, gai ia ga hagadaba: “E tae mai naa laangi, go Tagi Maolunga e hagadaba, aagu e hai ai dahi hagatoo donu hagaheloongoi hoou madali dangada o Israel ma dangada o Judah,

⁹ gai e dee bei donu dagu hagatoo donu hagaheloongoi ne hai madali olaadeu dubuna madagidagi, i dagu laangi ne poo ai olaadeu lima ga hagassao mai gilaadeu i de henua go Egypt, gai gilaadeu tee duudagi de daohi dagu hagatoo donu hagaheloongoi, deelaa ai, au tee anga ange gi gilaadeu, go Tagi Maolunga e hagadaba.

¹⁰ Gai deenei dagu hagatoo donu hagaheloongoi e hai madali dangada o Israel i dua laangi laa, go Tagi Maolunga e hagadaba: au e hai naa gi daakodo agu hainga i lodo alaadeu maanadu, ma de sisi ange gi olaadeu lodo. Gai au e hai naa go delaadeu Maadua, gai gilaadeu go ogu dangada.

¹¹ Gai gu deai donu se gilaadeu e agoagona ange tangada e baa ange aabe go dono daina, ga hai ange, ‘Koe gi iloo Tagi Maolunga,’ go hiidinga gilaadeu alodahi e iloo naa donu au, mai i tamaa gauligi ga dae ai gi tangada madua.

¹² Au e degi ange naa gi olaadeu baubau, aagai au e dee ahe ange naa donu e manadua olaadeu haisala.”

¹³ De masavaa aana ne tala ai dagodo o de hagatoo donu hagaheloongoi hoou, gai ia ne hai tahi hagatoo donu hagaheloongoi gi dee hai hegau. Gai mee alodahi gu dee hai hegau ma de duai e llilo naa donu.