Hebrews 6 - De Beebaa Dabu

¹ Deenei ai, gidaadeu ga dugu agoago o Klisdo i taamada, ga hai gidaadeu gi ni dangada gu maatua abodonu, gidaadeu gi dee aahe ange gi hagadagodo ina tagelo, go de dahuli o de lodo mai i adaadeu hegau e deai laa ono haigamaiana, ma de gai ange de Maadua,

² ma hainga o de babudaisi, ma de dugu ange lima gi honga o tangada, ma de mouli age o de gau maakau, ma de hagaduasala e deai laa se ngado mai.

³ Gidaadeu ga hai mee nei, noo e dugua mai i daho de Maadua.

⁴ Gai noo dangada gu maalama olaadeu lodo, gai gilaadeu gu mamia ange de mee ngadi gaavange mai i de langi, ma de kave de Hagasaalunga Dabu,

⁵ gai gu mamia ange hogi muna danuaa a de Maadua, aama ssauaa mmahi o de masavaa e humai,

⁶ gai noo gilaadeu gu daahuli gee — aagai gilaadeu gu dee maua ange i de daahuli olaadeu lodo, go hiidinga e bei donu gilaadeu gu aahe ange, ma gu daudau Tama Daane a de Maadua i de laagau lui, ma de hagangadi mee ia i madamada o dangada.

⁷ Gai de gelegele e dee modu de hagamaluulu i de langi e pala iho laa gi ono elunga, ma de ssomo ai manu e haigamaiana ange gi gilaadeu ne dooa, e hagamanuuia i daho de Maadua.

⁸ Aagai de gelegele e ssomo ai manu daladala ma manu duiduia, e deai ono haigamaiana gai gu baa ange donu gi de hagamalaia. Gai e dudu naa donu i de hagaodi.

⁹ Denga daina hagamogomogo, e dee galemu demaadeu pasa adu bee nei gi goodou, gai gimaadeu e iloo bolo e hanu donu manuuia gu hagababa adu gi goodou — go mee oodou e kave madali doodou hagamouli.

¹⁰ Gai de Maadua e dee haisala donu dana hagamodu; ia e dee ngalo naa donu oodou hegau danuaa, i doodou bale ange ono dangada dabu, i hiidinga doodou aaloha i de ia, gai goodou goi duudagi donu huu de bale ange gilaadeu iainei.

¹¹ Gai gimaadeu e llodo goodou alodahi gi duudagi ina de hai hegau hagammahi ga dae ai gi de hagaodi, gi maua abodonu ai e goodou mee oodou e tali hagalodolodo ange laa aagena,

¹² gi dee vaiduu ai goodou, aagai goodou gi ago ange i gilaadeu ne gaavee mee gu lava laa i de hagatoo donu ai, i hiidinga o de gai ma de golomagi lodo.

De hagatoo donu a de Maadua e dee haisala donu

¹³ De masavaa a de Maadua ne hagatoo donu ange ai gi Abraham, gai ia ne hagatoo donu i dono ingoo donu, go hiidinga e deai ange donu se maadua e maolunga ange i de ia, e hagatoo donu ai,

¹⁴ gai ia ne hagadaba, “Ni muna abodonu, au e hagamanuuia goe ga hai gi soa doo aamuli.”

¹⁵ Gai Abraham ne kave mee gu lava laa i de hagatoo donu, i hiidinga dana hagammahi ga golomagi ono lodo.

¹⁶ Dangada e hagatoo donu i de ingoo o dahi dangada e maolunga ange laa i gilaadeu, gai dahi hagatoo donu soe e hagadonu ai aama de hagadanuaa denga hagadaumee alodahi.

¹⁷ Gai e bei ai hogi, de masavaa a de Maadua ne lodo ai e hagaago ange gi gilaadeu aana gu hagatoo donu ange aagena, bolo dana hagatoo donu e dee sui donu, gai ia ne hagadonu de mee nei i dahi hagatoo donu soe,

¹⁸ gai luu mee nei e dee maua donu i de sui; de Maadua e dee maua donu i de hadu muna, deenei ai, gidaadeu gu mmuni laa i ono daha gu llodo mmahi i de daohi de tali hagalodolodo gu dagodo mai laa i odaadeu mada i mua.

¹⁹ De tali hagalodolodo nei e dee haisala donu gai e dee ngalungalue, gai go de ataula e hagamakaga ange aagena odaadeu lodo, gai e hano ga ulu gi lo te aabi e mua gi lodo, i baasi lodo o de malo buibui,

²⁰ go de mommee o de ia gu hano laa i odaadeu mada i mua ne ulu ai i odaadeu hiidinga, go Iesu. Gai ia gu hai gi se dangada haimeedabu maolunga ga hano ai bei dagodo o Melkizedek.