Hebrews 5 - De Beebaa Dabu

¹ Tangada haimeedabu maolunga ne hili mai i magavaa o dangada, ma de dongi ange gi suuia ai dangada i mada i mua o de Maadua, ma de gaavange mee ngadi gaavange ma de hai sigidaumaha ange gi haisala.

² Gai ia e donu ange gi dagodo o dangada e llodo ssenga ma gilaadeu e daahuli gee i de muna abodonu, go hiidinga ia e baageaa donu hogi i de hai mee nei.

³ Gai go hiidinga ia e baageaa hogi, deelaa ai, ia e hai hogi ssigidaumaha e tala ai ono haisala donu aama haisala o dangada ange laa.

⁴ Gai e deai donu se dangada e maua i de kave donu huu tuulanga nei, aagai go de Maadua e hilia ange ia aagena, bei dana hai ne hili ange ai laa Aaron.

⁵ Gai e bei ai hogi Klisdo: ia tee hai donu huu ia gi se dangada haimeedabu maolunga, aagai go de Maadua ne hilia ange ia, ga hai ange gi de ia, “Go koe dagu Dama Daane, anailaa nei gai go au doo Damana.”

⁶ Ia gu hagadaba hogi i dahi mommee, “Koe se dangada haimeedabu ga hano ai, bei dagodo o Melkizedek.”

⁷ Gai de masavaa o Iesu ne mouli ai i henua i lalo, gai ia ne dalodalo aama de dangidangi i de dangi see aama de ssali ono loimada ange gi de ia e maua laa i de hagaola ia mai i de magau, gai de Maadua ne hagallongo dana dangidangi, i hiidinga ia e hai hegau i de hagadubu ma de madagu.

⁸ Ia go Tama Daane donu a De Maadua, aagai ia ne agoago de hai e daudali ai i ono lodo i de masavaa oona ne hagaduasala ai;

⁹ gai ga honu abodonu huu dono heohi, gai ia gu hai ai tagelo o de mouli e dee ngado ange gi dangada alodahi e hagallongo ange gi de ia,

¹⁰ gai de Maadua gu hili ia go tangada haimeedabu maolunga, bei dagodo o Melkizedek.

De hagakana ange gi dee daahuli gee

¹¹ Gai e lagolago ange amaadeu mee e llodo e tala adu i dagodo o de mee nei, aagai e hai ngadaa i de hagadonu adu gi goodou, go hiidinga goodou ni dangada e ago ngadaa.

¹² Iainei goodou gu maua donu i de agoago, gai e deai, goodou goi aahe ange huu ma e agoago i muna heohi a de Maadua i taamada. Goodou goi mouli donu huu i vai uu, goodou tigi maua donu i de gai mee makaga;

¹³ go hiidinga tangada e mouli laa i vai uu se gauligi donu huu, ia tigi abo i de hagahai hegau muna o de heohi.

¹⁴ Aagai denga gai makaga ni mee ange gi dangada gu maatua abodonu, i hiidinga gilaadeu gu agoago ma gu hagaabo ange gilaadeu gi de vvae mee danuaa ma mee baubau.