Hebrews 4 - De Beebaa Dabu

De hagamaabunga o dangada o de Maadua

¹ Deenei ai, go hiidinga goi dagodo huu de hagatoo donu e ulu ai i de hagamaabunga laa, gidaadeu gi maatagu, kana dee maua e dahi goodou i de ulu ai.

² Gai de longo danuaa ne gaamai gi gimaadeu bei de hai ne gaavange ai laa hogi gi gilaadeu; aagai agoago alaadeu ne langona teai haigamaiana ange gi gilaadeu, go hiidinga gilaadeu tee kave i de gai.

³ Gai gidaadeu gu hagadonusia laa e ulu donu i de hagamaabunga laa, bei dana hai gu hagadaba ai laa, “Au e hagatoo donu i dogu lili, ‘Gilaadeu e dee ulu donu i dagu hagamaabunga,’ ” gai hegau alodahi a de Maadua gu lava huu i taamada de hai o henua i lalo.

⁴ Go hiidinga ia gu tala hogi dagodo o de hagahidu laangi i dahi mommee i muna nei, “Gai de Maadua ne hagamabu i de hagahidu laangi mai i ana hegau alodahi.”

⁵ Gai ia ne hagadaba hogi i de mommee mau, “Gilaadeu e dee ulu donu i dagu hagamaabunga.”

⁶ Deenei ai, go hiidinga goi maua huu e hanu i de ulu i de hagamaabunga laa, gai gilaadeu ne langona de longo danuaa i mua tee maua i de ulu ai, i hiidinga delaadeu dee hagallongo i muna.

⁷ Gai de Maadua gu hagailonga hogi dahi laangi, ma gu hagaingoo ange go “anailaa nei”. Ia ne hagadaba hogi i daho David i muli mai, bei muna gu lava laa i de tala, “Anailaa nei, noo goodou gu langona dono leo, aagai goodou gi dee hagamakaga ina oodou lodo.”

⁸ Go hiidinga noo Joshua ne maua i de gaavange gi dangada de hagamaabunga nei, gai de Maadua tee hagamodu dahi laangi gi muli mai.

⁹ Deelaa ai, goi dahi huu Sabbath e hagammabu ai dangada o de Maadua;

¹⁰ go hiidinga tangada gu ulu i de hagamaabunga a de Maadua gu hagamabu mai hogi i ana hegau, bei de hai o de Maadua ne hagamabu ai laa i ana hegau.

¹¹ Deenei ai, gidaadeu ga hagammahi gi ulu gidaadeu i de hagamaabunga laa, kana dee maua e gidaadeu i de ulu ai i taadeu dee hagallongo ange gi de Maadua.

¹² Go hiidinga muna a de Maadua e mouli ma de mmahi, e kangi ange i de gadilaasa baasi lua, gai e vvae de lodo ma de hagasaalunga, ma denga sugusuguinga ma mee i lodo ivi; gai e hagamodu dagodo maanadu ma hagatau alodahi i de lodo.

¹³ Gai e deai donu se mee daudahi e lilo i mada luu mada o de Maadua, aagai mee alodahi e maahuge ma tee maua i de hagammuni i mada luu mada o de ia adaadeu e tala ange mee alodahi aagena.

Iesu tangada haimeedabu maolunga

¹⁴ Go hiidinga e dahi odaadeu dangada haimeedabu maolunga gu hano gi de langi, go Iesu, Tama Daane a de Maadua, deenei ai, gidaadeu ga hagammahi e daohi de gai adaadeu e tala hagadonu laa.

¹⁵ Go hiidinga taadeu dangada haimeedabu maolunga e lodo aloha mai gi odaadeu mee e baageaa ai, i hiidinga ia gu lava i de hagatale i mee alodahi bei odaadeu dagodo, aagai ia tee haisala donu.

¹⁶ Deenei ai, gidaadeu gi lo taane i de loomai e hagapaa ange gi de nohoanga o de abodonu laa, gi maua ai e gidaadeu i de kave de abodonu ma tegi e bale mai ai gidaadeu i de masavaa odaadeu e duasala ai.