Hebrews 3 - De Beebaa Dabu

Iesu e maolunga ange i Moses

¹ Deenei ai, denga daina dabu, go goodou gu gaavee laa de hagahi mai i de langi, goodou hagasaelea dagodo o Iesu, go tangada tala ma tangada haimeedabu maolunga adaadeu e tala hagadonu.

² Ia ne hai hegau i de muna abodonu ange gi de ia ne hilia ia, bei de hai a Moses ne hai hegau ai laa hogi i de muna abodonu i mee alodahi i hale o de Maadua.

³ Gai ia e laumalie ange dono mahamaha i Moses, bei de hai o tangada ne hagaduulia de hale e laumalie ange ai laa dono hagadubu i de hale.

⁴ (Go hiidinga hale alodahi ne hagatuu i daho dahi labagau, aagai go de Maadua ne hagatuulia mee alodahi.)

⁵ Gai Moses se dangada hai hegau ne hai hegau i de muna abodonu i de hale alodahi o de Maadua; ia ne tala hagadonu dagodo o mee e tala i muli mai.

⁶ Aagai Klisdo ne hai hegau i de muna abodonu i de tilo ange de hale o de Maadua bei dagodo o tama donu. Gai gidaadeu go dono hale donu, noo gidaadeu e daohi taadeu lo taane ma de malangilangi i taadeu tali hagalodolodo.

Gi dee hagamakaga ina oodou lodo

⁷ Deenei ai, e hagadaba de Hagasaalunga Dabu, “Anailaa nei, noo goodou gu langona dono leo,

⁸ gai goodou gi dee hagamakaga ina oodou lodo bei de masavaa o de hai baasi, i de laangi o de hagatale i de vao,

⁹ i de mommee a oodou dubuna madagidagi ne hagatale ai au, ma de gidee agu hegau ne hai i e madahaa ngadau.

¹⁰ Deelaa ai, au ne lili i de atangada laa, ga hagadaba, ‘Gilaadeu e daahuli gee i de au i olaadeu lodo; gilaadeu e dee iloo ogu dagodo.’

¹¹ Deelaa ai, au ne hagatoo donu i dogu lili, ‘Gilaadeu e dee ulu donu i dagu hagamaabunga.’ ”

¹² Denga daina, goodou dagidiiloo gi deai se goodou e daohia dahi lodo baubau be go tee hagadonusia, ga dagi gee ai goodou i de Maadua e mouli laa.

¹³ Aagai goodou hagadau hagammahi ina goodou i laangi alodahi, i de masavaa goi hagabinga ai bolo go “anailaa nei,” gai dahi ma dahi gi dee hagamakaga ina ono lodo, i dono hagasengalia i de haisala.

¹⁴ Go hiidinga gidaadeu e dau madali Klisdo, noo gidaadeu e daohi gi makaga taadeu llodo mmahi mai i taamada ga dae ai gi de hagaodi.

¹⁵ Gai e hagadaba de Beebaa Dabu, “Anailaa nei, noo goodou gu langona dono leo, gai goodou gi dee hagamakaga ina oodou lodo bei de masavaa o de hai baasi.”

¹⁶ Goai gilaadeu ne langona laa aagai ne hai baasi? E dee go dangada alodahi ne ssao laa ga hulo gee mai i Egypt i de dagi a Moses gilaadeu?

¹⁷ Gai goai o de Maadua ne lili ai laa i e madahaa ngadau? E dee go gilaadeu ne haisala laa, gai olaadeu angaanga ne maakau ga daakodo saele i de vao?

¹⁸ Gai goai a de Maadua ne hagatoo donu ange laa bolo gilaadeu e dee ulu donu i dana hagamaabunga? E dee go gilaadeu tee hagallongo ange laa gi de ia?

¹⁹ Gidaadeu gu gidee bolo gilaadeu tee maua i de ulu i hiidinga delaadeu dee hagadonu.