Hebrews 2 - De Beebaa Dabu

De hagamouli maolunga

¹ Deenei ai, gidaadeu ga kana ange e hai hegau i mee adaadeu gu langona, kana daahuli gee gidaadeu i mee nei.

² Gai noo muna ne tala i daho denga dangada de langi e too donu, gai denga haisala alodahi ma dee hagallongo i muna ne kave donu de hagaduasala e heohi ange laa aagena,

³ gai dee hee ai taadeu hai e hagaola ai gidaadeu, noo gidaadeu e hagangadi mee de hagamouli maolunga nei? De hagamouli nei ne tala i mua i daho Tagi Maolunga, gai dangada ne langona ne tala hagadonu mai gi gidaadeu.

⁴ Gai de Maadua ne tala hagadonu hogi mee nei, i denga hagailonga ma mee hagalele mouli ma denga hagadaagangaa sauaa mmahi, aama denga duuhanga mai i daho de Hagasaalunga Dabu, bei dagodo o dana hagatau.

Tagi olaadeu gu hagamouli

⁵ Gai de Maadua tee dugu ange denga dangada de langi gi dagina henua i lalo gu dai humai laa, go de mee omaadeu e agoago ai nei.

⁶ Gai gu tala i dahi mommee i de Beebaa Dabu, e hai ange, “Se aha tangada gai koe ga maanadu ange ai ia, aabe go tama a tangada gai koe ga anga ange ai gi de ia?

⁷ Koe ne hai ia gi maolalo ange i de gau de langi i dahi masavaa bodobodo; gai koe ne hagahau ia i de mahamaha ma de hagadubu.

⁸ Koe gu dugu mee alodahi i lalo luoono vae.” Gai dagodo o de dugu ange mee alodahi gi de ia, teai donu se mee daudahi a de Maadua tee dugu i lalo dono sauaa. Aagai iainei gidaadeu tigi gidee bolo mee alodahi gu dugu i lalo luoono vae.

⁹ Aagai gidaadeu gu gidee Iesu, de ia ne hai laa ga maolalo ange i de gau de langi i dahi masavaa bodobodo, gai iainei ia gu hagahau i de mahamaha ma de hagadubu, go hiidinga ia ne hagaduasala ga magau, gai ia ga mami ange ai de magau i hiidinga o dangada alodahi, i de abodonu o de Maadua.

¹⁰ Gai e heohi donu de hai a de Maadua, de ia ne haia ma de daohia mee alodahi gu hanu, i dana gaamai gi de mahamaha hanu dama soa, de ia ne damadaa delaadeu hagamouli gi honu abodonu ono dagodo i dono hagaduasala.

¹¹ Gai de ia ne haia ga dabu dangada ma gilaadeu ne hai ga dabu ne loomai i se huaabodu daudahi. Deelaa ai, ia e dee dogaa i de hagadaba bolo gilaadeu ni daina niiona,

¹² ma de hai ange, “Au e tala ange naa doo ingoo gi ogu daina; gai au e daahili naa ga tuhi goe madali doo hagabuulingaa dangada.”

¹³ Ia e hagadaba hogi, “Au e hagadonusia ia.” Gai e hagadaba ange hogi, “Tilo, deenei au madali dama a de Maadua gu gaamai gi de au.”

¹⁴ Deenei ai, go hiidinga denga dama ni kano ma dodo, e bei ai hogi, ia ne hai gi se dangada bei olaadeu dagodo, gi maua ai e ia i de magau e hagadee kii ai de ia e daohia laa ssauaa o de magau, go de ia hagabaubau,

¹⁵ gai ia ga hagaola ai gilaadeu e dee ilaage laa i hiidinga delaadeu maatagu i de magau, i taulooloa olaadeu mouli.

¹⁶ Gai se muna abodonu, e dee go denga dangada de langi aana ne bale ange, aagai go de aamuli o Abraham.

¹⁷ Deenei ai, ia ne hai ga bei ono daina i mee alodahi, gi maua ai e ia i de hai gi se dangada haimeedabu maolunga e degi ma de hai hegau i de muna abodonu i hegau a de Maadua, gai ia ga degi ange ai gi haisala o dangada.

¹⁸ Go hiidinga ia ne kave de hagaduasala ma de hagatale, deelaa ai, ia e maua hogi i de bale ange gilaadeu e hagataalea laa.