Hebrews 13 - De Beebaa Dabu

Sigidaumaha o de Maadua e malangilangi ai

¹ Goodou duudagi ina de hagadau aaloha bei dagodo o denga hai daina donu.

² Goodou gi dee ngalo de abodonu ange gi de gau henua gee, go hiidinga deenei de hai a hanu ne abodonu ange ai gi hanu dangada de langi, gai gilaadeu tee iloo donu.

³ Goodou manadua gilaadeu e nnoho i lodo hale pono, e dagodo be go goodou e nnoho donu madali gilaadeu i lo te hale pono, ma gilaadeu e vaivai haia, e dagodo be go goodou donu e vaivai haia.

⁴ Goodou alodahi gi hagadubu ina de hai bodu, gai dangada gu hai bodu gi dee dagodo haisala. Go hiidinga de Maadua e hagaduasala donu tangada hai be se manu, ma dangada alodahi e dagodo haisala.

⁵ Goodou gi dee nnoo ange gi sseene, gai gi malangilangi i oodou mee e hanu, go hiidinga de Maadua gu hagadaba; “Au e dee tili donu goe, aabe e hano gee mai i oo daha.”

⁶ Deenei ai, gidaadeu gi lo taane i de hagataba, “Go Tagi Maolunga e balea mai au; au e dee madagu donu. Ni aha naa donu a dangada e maua i de hai mai gi de au?”

⁷ Goodou manadua oodou dagi, ne agoagona adu goodou i muna a de Maadua. Manadua dagodo olaadeu mouli, gai goodou ga ago ange i olaadeu kai.

⁸ Iesu Klisdo go tagodo mau donu huu anaahi, ma anailaa nei ga hano ai e dee ngado mai.

⁹ Goodou gi dee hagasengalia i denga hagadaagangaa agoago ma agoago gee. Gai e danuaa doodou hagammahi oodou lodo i de abodonu o de Maadua, e dee go hainga ma dahulinga o denga gai. Mee nei e deai donu haigamaiana ange gi gilaadeu e daudali ai.

¹⁰ Gidaadeu e dahi odaadeu mommee o ssigidaumaha, se mommee niio dangada ne hai hegau i lo te hale malo e dee alaange i de gaimee ai.

¹¹ Gai angaanga o denga manu a tangada haimeedabu maolunga ne kave olaadeu dodo gi lo te Mommee Dabu mmao e hai ai ssigidaumaha o haisala, ne kave ga dudu i tua de mommee nnoho gaainga.

¹² Deelaa ai, Iesu ne hagaduasala hogi i tua de haitoga o de aduhale, gai ia ga hagagilimalali ai dangada i ono dodo.

¹³ Deenei ai, gidaadeu ga ssao e hulo gi ono daha i tua de mommee nnoho gaainga, ma de kave de hagadogaa aana ne hagauda laa.

¹⁴ Go hiidinga kinei e deai donu sedaadeu aduhale e dagodo ga hano ai, aagai gidaadeu e ssala de aduhale gu dai humai laa.

¹⁵ Deenei ai, gidaadeu ga duudagi taadeu gaavange gi de Maadua ssigidaumaha o de tuhi, i de ingoo o Iesu i masavaa alodahi, deenei go taadeu tala hagadonu dono ingoo.

¹⁶ Goodou gi dee ngalo de hai tanuaa ma de ngadi gaavange mee gi dangada, go hiidinga aanei denga hagadaagangaa sigidaumaha o de Maadua e malangilangi ai.

¹⁷ Hagallongo ange gi oodou dagi, ma de hagadubu gilaadeu, i hiidinga go gilaadeu e diiloo adu goodou i de baasi gi de hagasaalunga, gai gilaadeu e tala ange naa dagodo o alaadeu hegau gi de Maadua. Goodou haia gi malangilangi gilaadeu i de hai alaadeu hegau, goodou gi dee hagadaemaha ina gilaadeu, go hiidinga e dee haigamaiana adu gi goodou.

¹⁸ Goodou dalodalo i omaadeu hiidinga. Gimaadeu e iloo bolo tagi i omaadeu lodo e gilimalali, ma de llodo e hai de mee heohi i mee alodahi.

¹⁹ Au e dangidangi adu hogi goodou gi dalodalo gi moolau dogu ahe adu gi oodou daha.

Talodalo ma hagaboo hagaodi

²⁰ De Maadua o de baba, go de ia ne hagamouli ina Iesu taadeu Dagi Maolunga, de Ia Hagaloosi Maolunga o denga ssiibi, i dodo o de hagatoo donu hagaheloongoi e deai laa se ngado mai,

²¹ gi gaavadu gi goodou mee danuaa alodahi gai goodou ga hai ai ono lodo, ma de hagahai hegau i odaadeu daha mee e hagamalangilangi ina ia i daho Iesu Klisdo; gai go ia e heohi taadeu hagamahamaha ga hano ai e dee ngado mai. Amen.

²² Denga daina, au e dangidangi adu goodou gi golomagi ina oodou lodo i agu muna e bale adu ai goodou, go hiidinga e sogoisi donu huu agu muna e sisi adu.

²³ Au e lodo goodou gi iloo bolo taadeu daina go Timothy gu sao mai i lo te hale pono. Noo ia e moolau dono hanadu, gai au e hanadu naa hogi madali ia e hedae adu gi goodou.

²⁴ Dagu hagaboo ange gi oodou dagi alodahi ma dangada alodahi o de Maadua. Dangada ne loomai laa i Italy e gaavadu hogi delaadeu hagaboo gi goodou.

²⁵ De abodonu ⌊o de Maadua⌋ gi dagodo i oodou daha alodahi.