Hebrews 12 - De Beebaa Dabu

De haele a Tagi Maolunga

¹ Deenei ai, go hiidinga e soa mmao de gau tala hagadonu, e daumada ina ma de duuli ina gidaadeu bei denga giliiga, deenei ai, gidaadeu ga tili mee alodahi e hagalaavea ina laa gidaadeu, ma de haisala e hai ngaohie laa taadeu noodia ai. Gai gidaadeu gi llodo mmahi i de saavini e houhou ange gi de mee gu hagailonga mai gi gidaadeu.

² Gidaadeu ga daumada Iesu, taamada ma de hagaodi o odaadeu kai. Ia ne hagaduu ngae ga hagauda de laagau lui, ia tee anga ange donu gi dono hagadogaa ina, i hiidinga o de malangilangi gu dagodo laa i ono mada i mua, gai iainei ia gu noho i de baasi madau o de nohoanga o de Maadua.

³ Goodou manadua dagodo de golomagi mmao ono lodo, i de masavaa o de gau baubau ne hai baasi ange ai gi de ia, gi dee helui ai oodou llodo aabe gi lodo baageaa.

⁴ Goodou ne hai baasi ange ai gi de haisala, gai goodou tee hai baasi ange ga dae ai gi de ssali oodou dodo.

⁵ Gai goodou gu ngalo naa donu muna ne hagammahi adu ai goodou denga dama? “Dagu dama, aude hagangadi mee ina haelenga a Tagi Maolunga, aabe gi baageaa oo lodo i dana hagasee goe.

⁶ Go hiidinga Tagi Maolunga e haele ono dangada e aloha ai, gai e hagaduasala ana dama alodahi gu kave.”

⁷ Goodou golomagi ina oodou lodo i doodou hagaduasala ina; go hiidinga de Maadua e hai goodou bei ana dama donu. Gai goai tama e dee haelea laa e dono damana?

⁸ Noo goodou e dee haelea (gai dangada alodahi e haelea donu) gai goodou ni dama e deai oodou damana, gai e dee ni dama abodonu.

⁹ E dahi ange mee: odaadeu damana donu e haele gidaadeu, gai gidaadeu e hagadubu gilaadeu. Gai e kii ange mmao de hagamogomogo taadeu hagallongo ange, gi Tamana o denga hagasaalunga gi mouli ai gidaadeu!

¹⁰ Odaadeu damana e haele gidaadeu i dahi masavaa bodobodo, i tanuaa hugadoo alaadeu e mau; aagai de Maadua e haele gidaadeu, gi danuaa mai ai gi gidaadeu, gai gi dabu ai gidaadeu bei ono dagodo.

¹¹ E deai donu se haelenga e hagamalangilangi i de masavaa e hai ai, aagai e hagammae. Gai muli mai naa huu, gai gu ssula ai hua o de heohi i de nnoho paba, i daho dangada gu agoago ai.

¹² Deenei ai, langa age oodou lima gu daudau naa, ma oodou duli gu baageaa naa,

¹³ gai hagassoea haiava oodou e seesee ai, gi dee daahuli ai vae o de gau balagelage, aagai gi ieiangi.

Gi hagallongo ange gi de Maadua

¹⁴ Goodou saalaa doodou hai e nnoho paba ai madali dangada alodahi ma de hai gi dabu goodou, go hiidinga e deai donu se dangada e maua gi gidee Tagi Maolunga noo ia e dee hai gi dabu.

¹⁵ Goodou dagidiiloo gi deai se goodou, e dee maua i de kave de abodonu o de Maadua, gai gi deai se aga mmala, e sula age ai de hai ngadaa gai hai ai ga soa dangada e dee gilimalali.

¹⁶ Diiloo gi deai se goodou e hai be se manu aabe e hagangadi mee ina denga mee dabu, bei dagodo o Esau; ia ne hagao dahi gumedi gai, i de boolonga o tama madua.

¹⁷ Gai goodou e iloo bolo dana masavaa ne lodo ai e kave de manuuia laa i muli mai, gai ia tee maua. Gai ia ne hagaduu ngae ga ssala de dahuli ono lodo ma de dangi, aagai ia tee dahuli ono lodo.

¹⁸ Goodou tee loomai gi de mounga e maua laa i de poo ange aagena, ma de ula ai de ahi, ma de gohu boo dangodango, ma de gohugohu ma de madangi mmahi,

¹⁹ ma de ili ai de trumpet, ma de leo a dangada ne langona laa, gai gilaadeu ga dangidangi bolo gi duudia de basa ange gi gilaadeu,

²⁰ go hiidinga gilaadeu gu dee maua i de hagallongo muna gu tala ange laa gi gilaadeu: “Noo dahi manu dolodolo daudahi e hagabaa ange gi de mounga laa, gai e maga donu gi magau i hadu.”

²¹ Gai ne kona donu de hagamaatagu i de tilo mee laa, gai Moses ne hagadaba, “Au ne bolebole mmao i dogu madagu.”

²² Aagai goodou gu loomai gi de mounga go Zion ma de aduhale o de Maadua e mouli laa, go Jerusalem i de langi, ma de hagabuulinga soa o de gau de langi e hagabuni laa ma de malangilangi,

²³ aama de nohoanga dabu o denga ganimua, go dangada gu sisi olaadeu ingoo i de langi. Goodou gu loomai gi de Maadua, de Ia Hagamodu Muna o dangada alodahi, ma hagasaalunga o dangada e heohi ma de hoohonu abodonu olaadeu dagodo,

²⁴ ma daho Iesu, de ia e hano i magavaa o dangada ma de Maadua, i de hagatoo donu hagaheloongoi hoou, ma de hagatoo madaua ange dodo e daalaa muna e danuaa ange laa i dodo o Abel.

²⁵ Goodou dagidiiloo gi dee hagangadi mee ina e goodou de ia e basa adu nei. Go hiidinga noo tee maua gi ola dangada ne hagangadi mee ina muna a de ia ne basa ange gi gilaadeu i henua i lalo, gai e kii ange donu taadeu dee maua gi ola, noo gidaadeu e dee daudali i muna a de ia e basa mai gi gidaadeu i de langi.

²⁶ De masavaa laa gai dono leo ne hagangalungalue henua i lalo, aagai iainei ia gu lava i de hagatoo donu bolo, “E dahi ange naa hanonga aagu e hagangalungalue ai henua i lalo ma de langi.”

²⁷ De muna nei, “E dahi ange naa hanonga,” e hagaago mai bolo mee alodahi e maua laa i de hagangaalue (go mee ne hagadau i taamada) e hai naa donu ga deai, gai go mee donu huu e dee maua laa i de hagangaalue e daakodo.

²⁸ Deenei ai, go hiidinga gidaadeu e kave de nohoanga hodooligi e dee maua laa i de hagangalungalue, gidaadeu ga hagaahe ange de abodonu ma de daumaha ange gi de Maadua e hagamalangilangi ai ia, i de hagadubu ma de maatagu,

²⁹ go hiidinga taadeu Maadua e bei de ahi ula e duungia mee alodahi.