Hebrews 11 - De Beebaa Dabu

Hegau o de gai

¹ De gai go de iloo abodonu bolo mee adaadeu e tali hagalodolodo ange laa aagena e hai donu, ma de iloo abodonu bolo mee adaadeu e dee gidee laa e hanu donu.

² Gai go de gai a de gau madagidagi ne maua ai i de hagamalangilangi de Maadua.

³ Go de gai adaadeu ne maua ai i de tonu ange, bolo de langi ma henua i lalo ne hai i muna a de Maadua ne tala, gai mee adaadeu e gidee ne hai i mee e dee gidee laa.

⁴ De gai o Abel ne hai ga maua e ia de hai dahi ssigidaumaha e danuaa ange laa i ssigidaumaha a Cain. Gai ia ne hagabinga bolo se daane e heohi i hiidinga o de mee nei, gai de Maadua ne malangilangi i ana mee ngadi gaavange. Gai ia e duudagi donu de basa iainei i dono gai, e dee galemu donu ia gu magau.

⁵ De gai o Enoch ne hai ga maua e ia i de hanage gi de langi, gai ia tee magau donu; ia ne dee maleva, i hiidinga de Maadua gu kave gee ia. Gai i mua dono gaavee gee, gai ne hagabinga bolo se dangada e hagamalangilangi ina de Maadua.

⁶ Noo e deai se gai, aagai e dee maua donu i de hagamalangilangi de Maadua, go hiidinga tangada e humai gi de Maadua, gi hagadonusia bolo e dahi donu Maadua, gai ia e hagao ange gilaadeu e hagaduu ngae e saalaa ia.

⁷ De gai o Noah, i de masavaa a Maadua ne hagakana ange ai ia, i dagodo o mee tigi gidee, ne hai ga maua e ia i de hagaduu dahi vaga hale ga hagamouli ai dono huaabodu, i hiidinga dono madagu. Dono gai ne hagabaubau henua i lalo, gai ia gu hagabinga hogi bolo se daane heohi i dono gai.

⁸ De gai o Abraham ne hai ga maua e ia i de daudali i muna a de Maadua, i dono masavaa ne hagahia ai gi hano gi de mommee gu bolo ange gi de ia i muli mai; ia ne hano, gai ia tee iloo donu be go hee oona e hano laa aagena.

⁹ De gai ne hai ga maua e ia i de noho gaainga, i de henua gu lava i de hagatoo donu ange gi de ia; gai ia ne noho i lodo hale malo madali Isaac ma Jacob, go luu daane ne gaavee de boolonga madali ia i de hagatoo donu daudahi.

¹⁰ Gai ia ne ssala dahi aduhale e hanu ono dagelo, gai de labagau ma de ia ne hagaduulia go de Maadua.

¹¹ De gai o Sarah ne hai ga maua e ia i de haanau hanu dama, e dee galemu donu gu ui dono masavaa e maua ai gi hai dama, go hiidinga ia ne hagadaba bolo de ia ne haia de hagatoo donu laa, e hai hegau i de muna abodonu.

¹² Deelaa ai, mai i daho dahi daane daudahi, se daane gu bei dagodo o taane gu magau, ne loomai ai denga hagadiilinga soa, bei denga heduu i lo te langi, aama gelegele i gabugabu tai, e dee maua laa i de dau.

¹³ Gilaadeu nei alodahi ne mouli i de gai ga dae ai gi delaadeu maakau. Gilaadeu tee kave mee gu lava laa i de hagatoo donu; aagai gilaadeu ne gidee donu huu, bolo mee nei e loomai naa i muli mai ma de malangilangi ai. Gai gilaadeu ne tala bolo gilaadeu ni dangada henua gee, gai ni dangada e nnoho gaainga i henua i lalo.

¹⁴ Gai dangada e daalaa hanu muna nei e hagaago mai, bolo gilaadeu e ssala dahi henua moolaadeu.

¹⁵ Noo gilaadeu ne maanadu de henua olaadeu ne loomai ai laa, gai gilaadeu ne aahe ga hulo aagena noo ne dugua ange.

¹⁶ Aagai deenei tagodo, gilaadeu ne llodo mmao i de henua e danuaa ange — go de henua i de langi. Deelaa ai, de Maadua e dee dogaa donu i de hagabinga go delaadeu Maadua, go hiidinga ia gu hagadabena ange dahi aduhale gi gilaadeu.

¹⁷ De gai o Abraham ne hai ga maua e ia i de gaavange Isaac e hai ai ssigidaumaha, i de masavaa a de Maadua ne hagatale ai dono gai. Taane ne gaavee de hagatoo donu laa, ne baba ange donu e sigidaumaha dana dama dagidahi,

¹⁸ e dee galemu donu de Maadua gu hai ange gi de ia, “Go daho Isaac e loomai ai doo hagadiilinga.”

¹⁹ Gai Abraham ne hagadaba bolo de Maadua ne maua donu i de hagamouli age Isaac mai i de magau, gai e bei donu, ia ne hagaahe mai dana dama i de magau.

²⁰ De gai o Isaac ne hai ga maua e ia i de hagamanuuia Jacob ma Esau i mee tigi loomai.

²¹ De gai o Jacob ne hai ga maua e ia i de hagamanuuia luu dama daane a Joseph, i dono masavaa ne dai magau ai, gai ia ne ino ange gi honga dono dogo ga daumaha ai.

²² De gai o Joseph ne hai ga maua e ia i de tala, de ssao o de gau Israel ga hulo gee mai i Egypt, ma de tala ange delaadeu hai e hai ai ono ivi, i de masavaa oona ne dai magau ai.

²³ De gai o luu maadua o Moses ne hai ga maua e gilaau i de hagammuni ia, i e dolu malama i dua dono haanau, go hiidinga gilaau ne gidee bolo ia se dama mahamaha, gai gilaau tee maatagu donu i de hainga a de hodooligi.

²⁴ De gai o Moses ne hai ia ga dee lodo e hagabinga bolo se dama nii tamaa hine a Pharaoh, i de masavaa oona ne madua ai.

²⁵ Gai ia ne hilihili de hagaduasala madali dangada o de Maadua, ia tee lodo i denga mee hagamalangilangi o de haisala, e dee maua laa gi daulooloa.

²⁶ Ia ne hagadaba bolo de hagangadi mee ina i hiidinga o Klisdo, e hagamogomogo ange i de lava o Egypt, go hiidinga ia ne galo ange gi de hagaoanga i muli mai.

²⁷ Gai dono gai ne hai ga maua e ia i de hano gee mai i Egypt, ia tee madagu donu i de lili o de hodooligi; ia ne lodo mmahi i de golomagi ono lodo, go hiidinga ia gu gidee de ia e dee gidee laa.

²⁸ Go de gai ne haia ga maua e ia i de dao Taonga Hagasili, ma de hulu ange dodo gi denga haitoga, gi dee poo ange ai tangada de langi o de magau gi denga ganimua daane a de gau Israel.

²⁹ De gai o de gau Israel ne haia ga maua e gilaadeu i de seesee laa lo te Dai Mmea, bei delaadeu seesee i honga de gelegele mmasa. Aagai de masavaa huu o denga daane hebagi o Egypt ne hagatale ai de hulo laa lo te vai laa, gai gilaadeu gu odi i de maalemo.

³⁰ Go de gai ne maua ai de oha de buibui o Jericho, i dua de seesee o de gau Israel ga holiage de aduhale laa i e hidu laangi.

³¹ De gai o Rahab, de hine hai be se manu, ne hai ga tee magau ia madali dangada tee hagallongo i muna, i hiidinga ia ne abodonu ange gi denga daane mulidagi.

³² Gai ni aha ange naa aagu e maua i de tala adu? Gu deai sagu masavaa e tala adu ai dagodo o Gideon, ma Barak, ma Samson, ma Jephthah, ma David, ma Samuel aama denga pelaabisi.

³³ Go de gai ne haia ga maua e gilaadeu i de hagadee kii denga nohoanga hodooligi, ma de hagamodu muna i de heohi, ma de kave mee gu lava laa i de hagatoo donu; gilaadeu ne pono ngudu o denga laiono,

³⁴ ma de diinei denga ahi ula, ma de ola mai i de gadilaasa, gilaadeu e baageaa gai gu hai ma gu ni dangada mmahi; gilaadeu ne mmahi i de hebagi, ga hagadee kii ai denga hagabuulinga hebagi o de gau henua gee.

³⁵ Denga haahine ne gidee de mouli age o olaadeu dangada maakau. Hanu ne hagaduasala, gai tee llodo e hagaola gilaadeu, gi maua ai e gilaadeu i de kave de mouli age e kii ange laa tanuaa.

³⁶ Hanu ne hagammae manava ina ma de hagailiilia, gai hanu ne noonoodia ga hhao gi lo te hale pono.

³⁷ Gilaadeu ne magaa ga maakau i hadu; hanu ne soaa ga modumodu lua, hanu ne daia ga maakau i de gadilaasa. Gai gilaadeu ne kahu i gili o denga ssiibi ma guudi ga hulo saele ai, ne duasala ma de vaivai haia,

³⁸ gai gilaadeu tee hagadubulia donu i henua i lalo! Gilaadeu ne silivaahea saele i lodo henua ma honga mounga, ma lodo haonga i magavaa hadu, aama haonga i lo te gelegele.

³⁹ De gau nei alodahi ne hagabinga bolo e danuaa, i hiidinga olaadeu kai, aagai teai donu se gilaadeu ne gaavee mee a de Maadua gu hagatoo donu laa,

⁴⁰ go hiidinga de Maadua gu hai dahi hagatau e danuaa ange i mee nei mai gi gidaadeu alodahi, gai ia ga hai ai gilaadeu alodahi gi heohi abodonu madali gidaadeu.