Hebrews 10 - De Beebaa Dabu

Ssigidaumaha a Klisdo e hai i dahi hanonga

¹ De hainga se ada donu huu niio mee danuaa gu dai loomai, e dee go de mee abodonu. Deenei ai, sigidaumaha e hai laa i ngadau alodahi, e dee maua donu i de hai gi heohi abodonu gilaadeu e loomai e hagapaa ange gi de Maadua.

² Gai noo ne maua, gai tee tuu donu de hai denga sigidaumaha laa. Go hiidinga dangada ne daumaha i mee nei gu gilimalali ga hano ai, gai tagi i olaadeu lodo gu dee daemaha i haisala.

³ Aagai denga sigidaumaha laa se mee e hagamaanadu ai denga haisala i ngadau alodahi,

⁴ go hiidinga e dee maua donu e dodo o denga kaau ma guudi i de kave gee haisala o dangada.

⁵ Deelaa ai, de masavaa o Klisdo ne humai ai gi henua i lalo, gai ia ne hagadaba, “Koe e dee lodo i sigidaumaha ma mee ngadi gaavange, aagai koe ne hagadabena mai dahi angaanga gi de au;

⁶ koe tee malangilangi i denga sigidaumaha dudu ma sigidaumaha o haisala.

⁷ Gai au ne hagadaba, ‘De Maadua, tilo, au gu humai e hai oo lodo, bei de hai gu sisi ai ogu dagodo i lo te beebaa mulo.’ ”

⁸ Ia ne hagadaba i taamada, “Koe tee lodo i sigidaumaha ma mee ngadi gaavange, koe tee malangilangi i sigidaumaha dudu ma sigidaumaha o haisala” (go mee ne hai bei muna o de hainga).

⁹ Ia ne hagadaba hogi, “Tilo, au gu humai e hai oo lodo.” Ia ne hagadeai tahi hagatau gai ga hagasula de lua.

¹⁰ Gai de lua hagatau ne hai ga dabu gidaadeu i ssigidaumaha o de angaanga o Iesu Klisdo i e dahi donu huu hanonga.

¹¹ Laangi alodahi gai tangada haimeedabu e duu ga hai ana hegau daumaha; ia e aheahe ange ga hai denga sigidaumaha mau, gai ni mee e dee maua i de kave gee haisala o dangada.

¹² Aagai dua huu de hai a Klisdo ssigidaumaha i dono angaanga donu, i dahi hanonga, i hiidinga o denga haisala, gai ia gu noho i de baasi madau o de Maadua.

¹³ Mai i de masavaa laa, gai ia e tali de masavaa e hai ai ono hagadaumee go de mee e dugu ange aagena luoono vae.

¹⁴ Gai ne dahi donu huu ana sigidaumaha ne hai ga hagaheohi ai ga hano ai, gilaadeu ne hai laa ga dabu.

¹⁵ Gai de Hagasaalunga Dabu e tala hagadonu mai hogi gi gidaadeu, gai ia ne hagadaba i taamada,

¹⁶ “Deenei dagu hagatoo donu hagaheloongoi e hai madali gilaadeu i dua laangi laa, go Tagi Maolunga e hagadaba: au e hai naa gi daakodo agu hainga i olaadeu lodo, ma de sisi agu hainga i lodo alaadeu maanadu.”

¹⁷ Gai ia ne hagadaba hogi, “Au e dee ahe ange naa donu e hagamaanadu olaadeu haisala ma alaadeu hegau baubau.”

¹⁸ Gai go hee naa huu aana gu degi ange ai gi haisala, gai gu deai hogi sigidaumaha ange gi haisala.

De hagahi gi daohia de gai

¹⁹ Deenei ai, denga daina, gidaadeu gu lo taane i de ulu i de Mommee Dabu mmao laa i dodo o Iesu,

²⁰ go de haiava hoou ma de mouli, aana gu hhuge mai laa gi gidaadeu e ulu ai laa lo te malo buibui, e bei go dono angaanga.

²¹ Gai gu dahi odaadeu dangada haimeedabu maolunga e dagina de hale o de Maadua.

²² Deenei ai, gidaadeu ga loomai e hagapaa ange gi de Maadua i de lodo se mee abodonu ma de gai e honu abodonu, gai tagi i odaadeu lodo gu hagagilimalali mai i de baubau, gai odaadeu angaanga gu gaugau i vai gilimalali.

²³ Gidaadeu ga hagammahi e daohi taadeu tali hagalodolodo gu tala hagadonu laa, gidaadeu gu dee llodo lagolago, go hiidinga de ia ne haia de hagatoo donu laa e hai hegau i de muna abodonu.

²⁴ Gai gidaadeu ga maanadu taadeu hai e hagadau hagammahi ange ai gidaadeu gi de aloha ma denga hegau danuaa,

²⁵ gidaadeu gi dee dilia taadeu hagabuni e daumaha, bei dagodo hegau a hanu, aagai gi hagadau hagammahi ina goodou, i doodou gidee bolo de Laangi laa gu baa mai donu.

²⁶ Gai noo gidaadeu se hagabau donu e haisala, i dua taadeu iloo de muna abodonu, aagai gu deai ange donu se sigidaumaha e maua i de kave gee odaadeu haisala,

²⁷ aagai go de maatagu donu huu, i taadeu tali de hagaduasala, ma de ahi mmahi e daa ai laa ga maakau hagadaumee o de Maadua.

²⁸ Tangada tee daudali laa i hainga a Moses ne daa donu ga magau, gai tee degi ange donu noo ne dogolua be ne dogodolu dangada ne tala hagadonu.

²⁹ Gai e laumalie ange donu de hagaduasala o tangada e hagangadi mee ina Tama Daane a de Maadua, ma de dagadagahia gi lalo luoono vae dodo o Klisdo, go dodo o de hagatoo donu hagaheloongoi ne haia ia ga se dangada e dabu, aama de hagadogaa de Hagasaalunga o de abodonu.

³⁰ Gai gidaadeu e iloo de ia ne hagadaba laa, “Go au e suuia ange de baubau.” Ia ne hagadaba hogi, “Tagi Maolunga e hagamodu naa muna o ono dangada.”

³¹ Gai se mee hagamaatagu mmao taadeu too ange gi lo te lima o de Maadua e mouli laa.

³² Goodou manadua oodou dagodo i denga laangi i mua, i dua de maalama oodou lodo; goodou ne golomagi oodou lodo gai ne tuu ga makaga i de masavaa ne kona ai doodou hagaduasala.

³³ Hanu masavaa goodou ne hagadookaa ina ma de vaivai haia i madamada o dangada; gai hanu masavaa goodou ne malangilangi donu i de hagaduasala madali gilaadeu ne vaivai haia laa hogi.

³⁴ Goodou ne aaloha ange gi gilaadeu i lo te hale pono, gai ne malangilangi donu i de hai gi de mahi ina oodou goloa, go hiidinga goodou e iloo bolo e hanu oodou goloa e danuaa ange i goloa laa, gai e daakodo ga hano ai.

³⁵ Deenei ai, goodou gi dee dilia doodou lodo mmahi; go hiidinga goodou e kave naa donu oodou hagaoanga.

³⁶ Gai e heohi donu de golomagi oodou lodo, gi maua ai e goodou i de hai lodo o de Maadua, gai goodou ga kave ai mee gu lava laa i de hagatoo donu.

³⁷ Go hiidinga, “E dee mmule naa donu, gai de ia e humai laa e humai donu, ia e dee mmule mai naa donu,

³⁸ aagai dogu dangada heohi e mouli donu i de gai. Gai noo ia e ahe dua, gai au e dee malangilangi i de ia.”

³⁹ Aagai gidaadeu e dee bei dagodo o dangada gu aahe dua laa gai gu maakau, aagai gilaadeu e kai e hagamouli donu olaadeu hagasaalunga.