Hebrews 1 - De Beebaa Dabu

Tamana e basa i daho dana dama

¹ Madagidagi gai de Maadua ne basa ange gi odaadeu dubuna i daho denga pelaabisi, i hanonga lagolago ma hagadagodo lagolago,

² aagai denga laangi hagaodi nei, gai ia gu basa mai hogi gi gidaadeu, i daho dana Dama Daane, go de ia gu hili e bolo ange aagena mee alodahi, gai go ono daha hogi aana ne hai ai henua i lalo alodahi.

³ Gai Tama go de maalama o de mahamaha o de Maadua, ia go hagadulagi donu o de Maadua, gai ia e daohi mee alodahi i ssauaa o ana muna. Gai dua huu dana hagagilimalali denga haisala, gai ia gu noho i de baasi madau o de Ia Maolunga Mmao laa i mommee maolunga.

Tama a de Maadua e maolunga ange i de gau de langi

⁴ Ia ne hai gi maolunga ange i de gau de langi, bei de maolunga o de ingoo gu gaavange laa gi de ia, e maolunga ange ai laa i olaadeu ingoo.

⁵ Gai goai tangada de langi a de Maadua gu hai ange laa, “Go koe dagu Dama Daane; anailaa nei gai go au doo Damana”? gai ia gu hagadaba hogi, “Au e hai naa go dono Damana, gai ia e hai naa go dagu Dama”?

⁶ Gai de masavaa a de Maadua ne gaamai ai dana Dama Madua gi henua i lalo, gai ia ne hagadaba, “De gau de langi alodahi o de Maadua gi daumaha ange gi de ia.”

⁷ Ia ne hagadaba hogi i dagodo o denga dangada de langi, “Ia e hai ono dangada de langi gi bei denga madangi, gai gi ni dangada hai hegau niiona e bei de ahi e ula.”

⁸ Aagai ia ne hagadaba i dagodo o dana dama daane, “De Maadua, doo nohoanga hodooligi e dagodo ga hano ai e dee ngado mai, de laagau o doo nohoanga hodooligi go de laagau o de hagamodu heohi.

⁹ Koe e lodo i de heohi gai e kino i de baubau. Deenei ai, de Maadua, doo Maadua gu hai goe gi maolunga ange i oo soa ange laa, i dana hagasulu goe i de lolo o de malangilangi.”

¹⁰ Gai ne hagadaba hogi, “Tagi Maolunga, koe ne hagadagodo tagelo o henua i lalo i taamada age, gai koe ne hai de langi i luoo lima donu.

¹¹ Mee nei e llilo naa donu, aagai koe e dee lilo donu; mee nei e bei dagodo o de malo duai.

¹² Koe e hhedu naa gilaadeu bei de malo laa daha; gai gilaadeu e bei naa de malo e sui laa. Aagai koe go tagodo mau donu huu, gai oo ngadau e dee odi donu.”

¹³ Gai goai tangada de langi a de Maadua gu hai ange laa, “Noho i dogu baasi madau, ga dae ai gi dagu hai oo hagadaumee go de mommee e dugu ange aagena luoo vae”?

¹⁴ E aha, de gau de langi e dee go hagasaalunga e hai laa gi hulo gi hai hegau ange gi gilaadeu gu hagamouli?