Haggai 2 - De Beebaa Dabu

De mahamaha o de temple hoou

¹ Gai de madalua ma dahi laangi huu o de hidu malama, gai Tagi Maolunga ga hagaago ange ana muna gi de pelaabisi go Haggai, ga hai ange,

² “Basa ange gi Zerubbabel, tama daane a Shealtiel, de goobenaa o Judah, ma Joshua, tama daane a Jehozadak, tangada haimeedabu maolunga, aama dangada alodahi. Siilia ange gi gilaadeu,

³ ‘Goai i oodou magavaa ne gidee de mahamaha o de hale daumaha nei madagidagi? Gai dee hee doodou hai e tilo ai laa ono dagodo iainei? Goodou e dee maanadu laa bolo de hale nei se mee donu dee dau?

⁴ Aagai koe gi lo taane, Zerubbabel, go Tagi Maolunga e hagadaba. Joshua, tama daane a Jehozadak, tangada haimeedabu maolunga, koe gi lo taane. Dangada alodahi o de henua, goodou gi lo taane, go Tagi Maolunga e hagadaba, goodou hagammahi hai hegau. Go hiidinga au madali goodou, go Tagi o denga hagabuulinga hebagi e hagadaba.

⁵ Deenei dagu hagatoo donu hagaheloongoi ne hai adu gi goodou i de masavaa oodou ne ssao mai ai i Egypt. Dogu Hagasaalunga e noho i oodou magavaa, goodou aude maatagu!

⁶ Gai e hagadaba Tagi o denga hagabuulinga hebagi: E dee mmule naa donu, gai au ga hagangalungalue de langi ma henua i lalo, ma tai aama de henua.

⁷ Au e hagangalungalue naa denga huaahenua alodahi, gai goloa hagamogomogo o denga huaahenua e gaamai naa gi kinei, gai au e hai naa de hale nei gi mahamaha mmao, go Tagi o denga hagabuulinga hebagi e hagadaba.

⁸ Niiagu denga selevaa, gai niiagu denga goolo, go Tagi o denga hagabuulinga hebagi e hagadaba.

⁹ De mahamaha o de hale nei e hai naa ga laumalie ange i de mahamaha o de hale i mua, go Tagi o denga hagabuulinga hebagi e hagadaba. Gai au e hai naa de mommee nei gi dagodo ai de baba,’ go Tagi o denga hagabuulinga hebagi e hagadaba.”

Manuuia o dahi huaadangada dee gilimalali

¹⁰ Gai de madalua ma haa laangi huu o ssiva malama, i de lua ngadau o Darius, gai Tagi Maolunga ga hagaago ange ana muna gi de pelaabisi go Haggai, ga hai ange,

¹¹ “E hagadaba Tagi o denga hagabuulinga hebagi: Siilia ange gi de gau haimeedabu be aahee muna a de hainga:

¹² ‘Noo dahi dangada e hhao ange kano manu e hai ai ssigidaumaha gi lodo ono malo ga dagidagi ai, gai dono malo e baa ange gi pelaoaa, be go ssuba, be go uvaini, be go lolo, aabe go hanu gai ange laa, gai denga mee laa e hai naa hogi ga dabu?’ ” De gau haimeedabu ne hai ange, “Deai.”

¹³ Gai Haggai ga ssili ange hogi, “Gai noo dahi dangada e dee gilimalali i hiidinga dono hagabaa ange gi dahi magau, gai ia ga poo ange gi mee nei, gai e hai laa mee nei ga dee gilimalali?” Gai de gau haimeedabu ga hai ange, “Uaa, mee laa gu dee gilimalali.”

¹⁴ Gai Haggai ne basa ange ga hai ange, “E bei ai hogi dagodo o de huaadangada ma de huaahenua nei i mada luoogu mada, go Tagi Maolunga e hagadaba. Alaadeu hegau alodahi e hai, ma alaadeu mee e sigidaumaha e dee gilimalali donu.

¹⁵ Goodou nnoho hagasaelea dagodo o mee nei mai ailaa nei ga hano ai. I mua doodou daamada de hagatau age hadu e hagaduu ai de temple o Tagi Maolunga,

¹⁶ ma de masavaa o tangada ne hano ai gi dahi hagabuulingaa grain gu hagabau ange laa bolo se madalua hagabaaunga iai, gai gu se madaangahulu donu huu hagabaaunga i kilaa. Gai de masavaa o tangada e hano ai e asu e madalima hagabaaunga uvaini i de mommee e hhao ai uvaini, gai gu madalua donu huu i kilaa.

¹⁷ Au ne hai gi mmae ma de dongidongi oodou manu, ma de gaamai denga dibadibaa haisi gi oohaa oodou manu; aagai goodou tee aahe mai gi de au, go Tagi Maolunga e hagadaba.

¹⁸ Goodou hagasaelea gi danuaa mai ailaa nei, mai i de madalua ma haa laangi o ssiva malama, go de laangi oodou ne hagadagodo ai tagelo o de temple o Tagi Maolunga:

¹⁹ e aha, e hanu laa golee e doe i lodo oodou hale doange huamanu? Denga grapevine ma fig, ma pomegranate, aama olive tigi hhua donu ga dae mai ai gi iainei. Aagai mai ailaa nei gai au e hagamanuuia naa goodou.”

Zerubbabel, de buulei hagailonga o Tagi Maolunga

²⁰ Gai Tagi Maolunga ne hagaago ange ana muna gi Haggai i de lua hanonga, i de madalua ma haa laangi o de malama, ga hai ange,

²¹ “Daalaa ange gi Zerubbabel, de goobenaa o Judah bolo au gu dai hagangalungalue naa de langi ma henua i lalo.

²² Au e kave gee naa ssauaa ma mahi o denga nohoanga hodooligi. Au e oha naa olaadeu hada hebagi ma denga daane e saavini ai; alaadeu hoosa ma gilaadeu e kage ai e maakau naa, gai gilaadeu e hagadau daa naa donu huu gilaadeu.

²³ De laangi laa, go Tagi o denga hagabuulinga hebagi e hagadaba, gai au e hai naa goe, Zerubbabel, dogu dangada hai hegau, tama daane a Shealtiel, go Tagi Maolunga e hagadaba, gi bei dagodo o dogu buulei hagailonga, go hiidinga au gu hili goe, go Tagi o denga hagabuulinga hebagi e hagadaba.”