Haggai 1 - De Beebaa Dabu

De hagaahea age de hale o Tagi Maolunga

¹ De lua ngadau huu o de hodooligi go Darius, i tahi laangi o de ono malama, gai Tagi Maolunga ne hagaago ange gi de pelaabisi go Haggai ana muna ange gi Zerubbabel, tama daane a Shealtiel, de goobenaa o Judah, aama Joshua, tama daane a Jehozadak, tangada haimeedabu maolunga:

² “E hagadaba Tagi o denga hagabuulinga hebagi: De huaadangada nei e hagataba, ‘Tigi dae mai de masavaa e hagaduu age ai de hale o Tagi Maolunga.’ ”

³ Gai Tagi Maolunga ne tala ange ana muna gi dangada i daho de pelaabisi go Haggai, ga hai ange,

⁴ “E aha, se masavaa niiodou e nnoho ai i lodo oodou hale laagau danuaa, gai ga tili de hale nei gi ngadi dagodo?

⁵ E hagadaba Tagi o denga hagabuulinga hebagi: Goodou nnoho muhuu hagasaelea age dagodo o oodou hegau.

⁶ Goodou e doo manu lagolago, aagai e sogoisi donu huu oodou mee e hagihagi. Goodou e gaimee aagai e dee boobosu. Goodou e unu, aagai e goi hieunu huu. Goodou e kahu i denga malo, gai e dee maua gi mahanahana. Goodou e kave oodou hagaoanga, gai e dagodo be goodou e hhao ange gi lo te beagi e avaava tagelo.

⁷ E hagadaba Tagi o denga hagabuulinga hebagi: Goodou nnoho muhuu hagasaelea age dagodo o oodou hegau.

⁸ Goodou loage gi denga mounga ga gave iho ai, denga laagau e hagaduu ai dogu hale, e hagamalangilangi ai ma de hagadubu ai au, go Tagi Maolunga e hagadaba.

⁹ Goodou e tali bolo oodou mee e lagolago naa, aagai ne sogoisi donu oodou mee ne mau. Gai au ne hai gi deai mee oodou ne gaamai gi oodou hale. Aahee hiidinga? go Tagi o denga hagabuulinga hebagi e siilia adu. Go hiidinga dogu hale gu maoha ma e dagodo ai, gai tangada nei ma tangada nei e dee saohia donu huu i de hai dono hale.

¹⁰ Deenei ai, go oodou hiidinga tee hano iho ai de mee maluulu i de langi, ga hagadee ssomo ai manu i honga de henua.

¹¹ Au gu hagahi tau laohie gi hano iho gi honga oodou veelenga ma honga mounga, ma honga denga grain, ma grapevine, ma denga olive e hai ai laa lolo, ma honga mee alodahi e ssomo i honga de gelegele, ma honga o dangada, ma denga manu haangai, aama hegau alodahi oodou e hai.”

¹² Gai Zerubbabel, tama daane a Shealtiel, ma Joshua tama daane a Jehozadak, tangada haimeedabu maolunga, aama dangada alodahi ga hagallongo ange gi muna a Tagi Maolunga, delaadeu Maadua ma muna a de pelaabisi go Haggai, go hiidinga go Tagi Maolunga, delaadeu Maadua ne haia ia gi humai. Gai dangada gu maatagu i Tagi Maolunga.

¹³ Gai Haggai, tangada hagailoo o Tagi Maolunga, ne tala ange muna a Tagi Maolunga gi dangada, ga hai ange, “Au madali goodou,” go Tagi Maolunga e hagadaba.

¹⁴ Gai Tagi Maolunga ga hagangaalue lodo o Zerubbabel, tama daane a Shealtiel, de goobenaa o Judah, ma lodo o Joshua, tama daane a Jehozadak, tangada haimeedabu maolunga, aama lodo o dangada alodahi. Gai gilaadeu ga loomai ga daamada de hagaduu age de hale o Tagi o denga hagabuulinga hebagi, delaadeu Maadua,

¹⁵ i de madalua ma haa laangi o de ono malama, i de lua ngadau o de hodooligi go Darius.