Habakkuk 3 - De Beebaa Dabu

Talodalo a Habakkuk

¹ Talodalo a de pelaabisi go Habakkuk, e hua bei de Shigionoth.

² Tagi Maolunga, au gu langona oo longo, Tagi Maolunga, gai au gu lele ogu mouli i au hegau. Ahe ange haia au hegau i demaadeu masavaa, haia gi iloo e gimaadeu dagodo o au hegau; gai koe manadua de lodo aloha i doo bole.

³ De Maadua ne humai i Teman, de Ia Dabu laa ne humai i de mounga go Paran. Selah Dono mahamaha e haoli de langi, gai dono tuhi e hagahonu henua i lalo alodahi.

⁴ Ia e masalaba bei dagodo o de maalama; denga uila e dabadaba mai i lo tono lima, go de mommee iai dono sauaa.

⁵ De magi hagamaakau e hano i ono mada i mua, gai mee hagamaakau e daudali ange i ono dua.

⁶ Ia ne duu age, gai henua i lalo gu ngalungalue; ia ne galo ange ga tilo, gai denga huaahenua gu bolebole. Denga mounga mai i mua gu maoha ma gu malili iho, gai denga duuduu gu daulooloa laa gu baakuu — aagai ia e noho ga hano ai.

⁷ Au ne gidee bolo dangada o Cushan gu hai ngadaa; gai dangada o Midian gu maatagu.

⁸ Tagi Maolunga, koe ne lili laa i denga leevaa? Koe ne lili laa i denga saalingaa vai? Koe ne uluhia ange laa gi tai, i de masavaa oou ne savini ai i honga au hoosa, ma honga oo hada ne kii ai?

⁹ Koe gu dada mai dau mee hholu, koe ne hagahi mai denga dao lagolago o dau mee hholu. Selah Koe ne hangahanga henua i lalo i denga saalingaa vai;

¹⁰ denga mounga ne bolebole i delaadeu gidee goe. Denga vai gu ssali iho; de moana gelo gu hagangolo gai ono beau gu kona de nnui.

¹¹ De laa ma de maasina gu tuu donu huu i lo te langi i de tili dao malamalama o dau mee hholu, ma de maalama o dau dao malamalama.

¹² Koe ne seesee i henua i lalo alodahi i doo bole, gai koe ne dagadagahi denga huaahenua i doo lili.

¹³ Koe se humai e hagaola oo dangada, ma de hagamouli de ia aau gu hagadabu i de lolo. Koe ne hagabalaginagina tagi o de henua baubau, gai ne aau malo mai i dono biho ga dae iho ai gi dono bido i lalo. Selah

¹⁴ Koe ne hai ono dao ga velo ai dono biho, i de masavaa a ono daane hebagi ne loomai ai e hagamavaevae saele gimaadeu bei dagodo o ssio; gilaadeu ne malangilangi i de vaivai hai de gau hagaau aloha gu mmuni laa.

¹⁵ Koe ne hai au hoosa gi dagadagahia honga tai, gi beabeau ai honga denga tai mmahi laa.

¹⁶ Au ne langona mee nei, gai dogu angaanga gu bolebole, luoogu malaungudu gu bolebole hogi i dagu longo mee nei; ogu ivi gu daamada de pobo, gai luoogu vae gu pole. Aagai au e noho naa ga tali de masavaa o de hai ngadaa e humai ai gi honga o dangada gu hebagi mai gi gimaadeu.

¹⁷ Gai e dee galemu naa donu teai huaala o de fig, gai gu deai hogi grape i denga grapevine, gai e dee galemu naa donu teai hua o de olive, ma teai gai e ssomo i honga denga veelenga, gai e dee galemu naa donu teai ssiibi i lodo buibui manu, ma teai kaau i lodo buibui e dugu ai manu,

¹⁸ aagai au e malangilangi donu i hiidinga o Tagi Maolunga, au e lodo danuaa naa donu i de Maadua, dogu Ia Hagaola.

¹⁹ De Ia Aamua go Iahweh go ogu mahi; ia e hai luoogu vae gi bei luu vae o dahi dia, ia e hai gi maua e au i de seesee i honga mommee maolunga. Ange gi tagi o taahili. Gai e hua madali mee hagadangidangi iai daula.