Habakkuk 2 - De Beebaa Dabu

¹ Au e duu naa ga dagitilo, au e noho naa i honga de mommee dagitilo; e tilo ai be aahee ana muna e tala mai gi de au, ma dagu hai e basa ange ai gi agu muna e nanu ai.

Muna a Tagi Maolunga ne basa ange ai

² Gai Tagi Maolunga ne hai mai gi de au: “Siia de midi hagaago ange nei, ma de sisi gi daakodo danuaa i honga denga duu hadu, gi maua ai e tangada e savini mai laa kilaa i de dau.

³ Gai de midi hagaago ange e tali dono masavaa; de masavaa gu dae mai donu, gai e dee mmule naa donu. Gai ga mmule naa donu, gai koe daalia donu huu; e dae mai naa donu, e dee mmule naa donu.

⁴ Tilo, ia e lodo maolunga, gai ono lodo e dee heohi; aagai tangada heohi e mouli donu i dono gai.

⁵ E dahi ange mee, denga uvaini e hagasenga ia; ia e lodo maolunga gai e dee hagamabu donu. Go hiidinga dono nnoo hagamau mee e bei de mommee o de gau maakau, gai e bei de magau e dee maua laa gi lava ana dangada e kave; ia e hagabudu denga huaahenua alodahi, ma de hagadee kii denga huaadangada alodahi.

⁶ E aha, dangada alodahi e dee hagammae manava naa ma de hakadanga i de ia ga hagataba, ‘E vakaa naa tangada e hagabudulia denga goloa gaiaa ma de hai gi lava ia i de mee ne hai gi de mahi! Dee hee maa taulooloa de hai mee nei?’

⁷ E aha, dangada oou e muli ange aagena e dee moolau naa de loomai? Gilaadeu e dee loomai naa ga hagamadagu goe? Gai gilaadeu e hai naa goe bei goloa e haia laa gi de mahi.

⁸ Koe ne hai gi de mahi mee a denga huaahenua soa, deelaa ai, dangada e doe i denga huaadangada e hai naa gi de mahi oo goloa. Go hiidinga koe ne daa dangada ga maakau; koe ne oha denga henua ma aduhale aama dangada alodahi e nnoho ai.

⁹ E vakaa tangada e hagaduulia dono hale i mee e maua i hegau baubau, ma de hili dono hoohanga i de mommee maolunga, gi noho baba ai ia!

¹⁰ Koe ne hagatau dau hai e oha ai denga huaadangada soa, ga hagadogaa ai doo huaabodu ma de hagahai ngadaa ai doo mouli donu.

¹¹ Denga hadu o de buibui e oo naa ga hagabaubau goe, gai denga laagau e hagaahe age naa muna laa.

¹² E vakaa naa tangada e hagaduulia dahi aduhale i de daa dangada ga maakau, ma de hagaduu dahi aduhale i hegau baubau!

¹³ Tilo, e aha, tee hagatau ina e Tagi o denga hagabuulinga hebagi bolo hegau a dangada ni mee donu huu e dudu i de ahi, gai denga huaahenua gi hagadaalea ange gi hanu ngadi mee?

¹⁴ Go hiidinga henua i lalo e hhao naa ga honu i de iloo mee o de mahamaha o Tagi Maolunga, bei de hagahonu o tai i denga lausedi.

¹⁵ E vakaa naa tangada e gaavange mee vii gi dangada e paa ange gi de ia, ma de hagaunu gilaadeu gi ssenga, gai koe ga tilo ai delaadeu gilisau!

¹⁶ Koe e dogaa naa, e dee hagadubulia. Koe gi hagaunu ina donu huu goe, ma de hai gi gilisau goe! De ubu mai i de lima madau o Tagi Maolunga e hagadige mai naa gi de goe, gai doo hagadubu e sui naa ga se hagangadi mee!

¹⁷ Au hegau alasala ne hai ange gi Lebanon e hai naa ga manavasaa oo lodo, gai dau daa ga maakau denga manu dolodolo e hai naa goe ga madagu, i hiidinga dodo o dangada ma dau vaivai hai denga henua ma aduhale aama dangada alodahi e nnoho ai.

¹⁸ Ni haigamaiana aha o dahi diinonga, noo se mee nii tangada ne hagaduu; gai se diinonga baalanga e agoagona denga muna hhadu? Gai tangada ne haia e tali hagalodolodo ange gi dana mee ne hagaduu; gai denga diinonga aana e hai e dee maua i de pasa!

¹⁹ E vakaa naa tangada e hai ange gi de laagau, ‘Alahage!’ gai e hai ange gi de hadu, ‘Hidi age!’ E aha, e maua de mee nei i de agoago ange ia? Tilo, de hadu laa e haoli i goolo ma selevaa, gai e dee manamanava.

²⁰ Aagai Tagi Maolunga e noho i dono temple dabu; henua i lalo alodahi gi dee mmuu i ono mada i mua.”