Habakkuk 1 - De Beebaa Dabu

¹ Muna hagadaemaha ne hagaago ange gi de pelaabisi go Habakkuk.

De nanu o Habakkuk

² Tagi Maolunga, dee hee maa taulooloa dogu dangidangi adu i de bale, aagai koe e dee anga mai e hagallongo? Aabe go dagu hai adu gi de goe, “Gu vaivai haia dangada!” aagai koe e dee hagaola gilaadeu?

³ Gu aha gu hai ai naa goe gi gidee e au hegau baubau? Gu aha gu noho ai naa donu huu goe e tilo denga hegau dee heohi? Au e gidee de oha ma de vaivai haia o dangada i masavaa alodahi; dangada gu hagadau hebagi ma de hagadaumee.

⁴ Deenei ai, de hainga gu dee hai hegau, gai de hagamodu heohi gu dee sula age. De gau baubau gu soa ange i gilaadeu e heohi, de hagamodu heohi gu dee hai hegau.

Muna a Tagi Maolunga ne basa ange ai

⁵ “Galo ange diiloo dagodo o denga huaahenua, gi kona ai de llele oodou mouli. Go hiidinga au e hai naa dahi hegau i doodou masavaa, gai goodou e dee hagadonusia naa donu, e dee galemu donu dagu tala adu gi goodou.

⁶ Gai tilo, au e hai naa gi mmahi de gau Babylon, go de huaahenua hagamaatagu ma de moolau olaadeu lodo, gilaadeu e hagadaga naa i henua i lalo alodahi, ga kave denga mommee nnoho e dee niiolaadeu.

⁷ Gilaadeu e hagamaatagu ma de maatagu ai o dangada; gilaadeu e hai donu huu olaadeu mee e llodo ai.

⁸ Alaadeu hoosa e kemo ange i denga leopard, gai e hagamaatagu ange i denga wolf i de ahiahi boo. Olaadeu hagabuulinga hebagi e hagassoe mai donu huu; olaadeu daane i honga hoosa e loomai i de mommee mmao. Gilaadeu e bei de igele e hagatili iho laa ga kadi dahi manu;

⁹ gilaadeu alodahi e loomai e vaivai hai dangada. Olaadeu hagabuulinga e loomai bei de madangi mai i de vao, ga hagabudu de gau dee kii soa, bei de lagolago o denga gelegele.

¹⁰ Gilaadeu e doo mee i denga hodooligi, ma de hakadanga i denga dagi. Gilaadeu e kada i denga mommee buibui makaga, gilaadeu e hagabudubudu age denga gelegele e hagadee kii ai de aduhale.

¹¹ Gai gilaadeu e bei dagodo o de madangi e ssau mai laa ga hano ga ui — gilaadeu ni daane baubau, gai delaadeu maadua go olaadeu mahi!”

De ahe ange o Habakkuk ga nanu

¹² Tagi Maolunga, e aha, koe tee noho mai laa i taamada? Go koe dogu Maadua, dogu Ia Dabu, gimaadeu e dee maakau donu. Tagi Maolunga, koe ne hagatau bolo gilaadeu gi hagaduasala ina gimaadeu; gai go koe, de Baba, ne hagamodu ina ange gilaadeu gi haelea gimaadeu.

¹³ Luoo mada e gilimalali mmao, e dee maua i de tilo de baubau; koe e dee maua i de galo ange e tilo de mee dee heohi. Gai gu aha gu dugu ai naa donu huu goe gilaadeu e hai hegau i de hagasenga? Gai gu aha gu dee muu ai naa goe i de masavaa a de gau baubau e daa ai dangada e heohi ange i gilaadeu?

¹⁴ Koe gu hai dangada gi bei denga mamu i lausedi, ma manu vaaligiligi e deai laa selaadeu dagi.

¹⁵ De hagadaumee e hhudi gilaadeu alodahi i denga maadau, ia e buulou gilaadeu i dana galauna, ma de hhudi mai gilaadeu i dana galauna; deelaa ai, ia gu malangilangi ma de lodo danuaa.

¹⁶ Deenei ai, ia e hai ange naa sigidaumaha gi dana galauna ma de dudu denga mee maanongi ange gi dana gubenga, i hiidinga ia e mouli danuaa i dana galauna, ma de gai denga gai mammami hugadoo.

¹⁷ E aha, ia e aheahe ange naa ga llingi dana galauna, i dana vaivai daa denga huaahenua ga hano ai?