Genesis 5 - De Beebaa Dabu

De aamuli o Adam

¹ Deenei de beebaa e tala ai dagodo o de aamuli o Adam. De masavaa a de Maadua ne hai ai tangada, gai ia ne hai tangada gi bei ono hagadulagi.

² Ia ne hai taane ma de hine, gai ia ne hagamanuuia gilaau ga hagaingoo ange gilaau go Tangada, i de laangi aana ne hai ai gilaau.

³ Gai ga 130 huu ngadau o Adam, gai ia ga hagadili dahi dama daane bei ono hagadulagi aama ono dagodo; gai ia ga hagaingoo ange ia go Seth.

⁴ Gai ne 800 ange ngadau o Adam ne mouli ai, i dua dana hagadili a Seth, gai ne hanu ange dama daane ma damaa hine aana ne hagadili.

⁵ Gai ne 930 ngadau o Adam ne mouli ai, gai ia ga magau.

⁶ Gai ga 105 huu ngadau o Seth, gai ia ga hagadili Enos.

⁷ Gai ne 807 ange ngadau o Seth ne mouli ai. I dua dana hagadili Enos, gai ne hanu ange dama daane ma damaa hine aana ne hagadili.

⁸ Gai ne 912 ngadau o Seth ne mouli ai, gai ia ga magau.

⁹ Gai ga 90 huu ngadau o Enos, gai ia ga hagadili Kenan.

¹⁰ Gai ne 815 ange ngadau o Enos ne mouli ai, i dua dana hagadili Kenan, gai ne hanu ange dama daane ma damaa hine aana ne hagadili.

¹¹ Gai ne 905 ngadau o Enos ne mouli ai, gai ia ga magau.

¹² Gai ga 70 huu ngadau o Kenan, gai ia ga hagadili Mahalalel.

¹³ Gai ne 840 ange ngadau o Kenan ne mouli ai, i dua dana hagadili Mahalalel, gai e hanu ange ana dama daane ma damaa hine aana ne hagadili.

¹⁴ Gai ne 910 ngadau o Kenan ne mouli ai, gai ia ga magau.

¹⁵ Gai ga 65 huu ngadau o Mahalalel, gai ia ga hagadili Jared.

¹⁶ Gai ne 830 ange ngadau o Mahalalel ne mouli ange ai, i dua dana hagadili Jared, gai ne hanu ange ana dama daane ma damaa hine ne hagadili.

¹⁷ Gai ne 895 ngadau o Mahalalel ne mouli ai, gai ia ga magau.

¹⁸ Gai ga 162 huu ngadau o Jared, gai ia ga hagadili Enoch.

¹⁹ Gai ne 800 ange ngadau o Jared ne mouli ai, i dua dana hagadili Enoch, gai ne hanu ange dama daane ma damaa hine aana ne hagadili.

²⁰ Gai ne 962 ngadau o Jared ne mouli ai, gai ia ga magau.

²¹ Gai ga 65 huu ngadau o Enoch, gai ia ga hagadili Methuselah.

²² Gai Enoch ne seesee madali de Maadua i e 300 ngadau, i dua dana hagadili Methuselah, gai ne hanu ange dama daane ma damaa hine aana ne hagadili.

²³ Gai ne 365 ngadau o Enoch ne mouli ai.

²⁴ Gai Enoch ne seesee madali de Maadua, gai ia gu dee maleva, i hiidinga de Maadua gu kave gee ia.

²⁵ Gai ga 187 huu ngadau o Methuselah, gai ia ga hagadili Lamek.

²⁶ Gai ne 782 ange ngadau o Methuselah ne mouli ai, i dua dana hagadili Lamek, gai ne hanu ange dama daane ma damaa hine aana ne hagadili.

²⁷ Gai ne 969 ngadau o Methuselah ne mouli ai, gai ia gu magau.

²⁸ Gai ga 182 huu ngadau o Lamek, gai ia ga hagadili dahi dama daane,

²⁹ ga hagaingoo ange ia go Noah, i hiidinga ia ne hagadaba, “Tama nei e hagaaneane mai naa gidaadeu, i adaadeu hegau hai ngadaa e hai, i honga de gelegele a Tagi Maolunga gu hagamalaia laa.”

³⁰ Gai ne 595 ange ngadau o Lamek ne mouli ai, i dua dana hagadili Noah, gai ne hanu ange dama daane ma damaa hine aana ne hagadili.

³¹ Gai ne 777 ngadau o Lamek ne mouli ai, gai ia gu magau.

³² Gai ga 500 huu ngadau o Noah, gai ia ga hagadili a Shem ma Ham aama Japheth.