Genesis 49 - De Beebaa Dabu

Jacob e hagamanuuia ana dama

¹ Gai Jacob ga hagahi ana dama daane, ga hai ange, “Goodou hagabuni mai, gai au ga tala adu gi goodou mee e hai adu gi goodou i muli.

² Dama a Jacob, goodou nnoho mai hagalaangona; goodou hagalaangona muna a doodou damana go Israel.

³ Reuben, go koe dagu dama madua; go tama aagu ne hagadili i de masavaa oogu e mmahi ai, gai go koe hugadoo e maolunga ma de mmahi.

⁴ Koe e bei denga vai e dee maua laa gi malino, gai koe e dee maua naa donu gi maolunga, go hiidinga koe ne hano ga gage ange gi honga de moenga o doo damana ga hai gu hakino gee.

⁵ Simeon ma Levi ni hai daina, gai alaau gadilaasa e vaivai hai dangada.

⁶ Au e dee buni ange gi alaau hagasaele; au e dee daudali ange gi alaau hagatau, go hiidinga gilaau ne daa dangada ga maakau i delaau llili, gai ne vaivai hai denga kaau daane ga dee vaa seesee.

⁷ Delaau llili gi hagamalaia, i hiidinga delaau llili e kona mmao, i delaau vaivai hai dangada! Au e hai naa olaau hagadiilinga gi mavaevae saele i magavaa o dangada o Jacob ma magavaa o dangada o Israel.

⁸ Judah, oo daina e tuhi naa goe; gai koe e hagadee kii naa oo hagadaumee, gai dama a doo damana e ino adu naa gi de goe.

⁹ Judah e bei de laiono mmahi; dagu dama, koe e bei de manu gu daa laa dahi manu ma gu gai. Ia e bei de laiono e dogoduli laa ma e noho ai, ma de laiono hahine — goai e bau ange gi de hai ia gi hidi age?

¹⁰ De laagau hodooligi e dee aau gee naa donu i daho Judah, aabe e aau gee togo o tagi mai i magavaa luoono vae, ga dae ai gi de humai o de ia niiona togo laa; gai denga huaahenua e hagallongo ange gi de ia.

¹¹ E nnoa ange naa dana donkey gi dahi grapevine, gai dana donkey gauligi gi de laa manu danuaa mmao, gai ia e taa naa ono malo i denga uvaini, gai ono malo i vai o denga grape.

¹² Luoono mada e mmea naa i dana unu uvaini, gai ono niho e tea naa i dana unu denga vai uu.

¹³ Zebulun e noho naa i tagudai; gai e hai naa go taulanga o denga vaga, ono goinga e hano naa ga tae gi Sidon.

¹⁴ Issachar e bei dahi donkey mmahi, e dogoduli laa i magavaa buibui o denga ssiibi.

¹⁵ De masavaa naa huu aana e gidee ai tanuaa o dono hagamaabunga, ma de danuaa o de henua laa, gai ia e ino naa ga saabai dana mee hagauda ma de hai ia gi se dangada e hagahai hegau ina.

¹⁶ Dan e hagamodu naa muna o ono dangada; ia go dahi aamuli donu o Israel.

¹⁷ Dan e bei de labodo i honga de haiava laa, gai se labodo hagammau i gaogao dahi dao haiava, e gadigadia laa muli luu vae o de hoosa gai tangada e gage laa i honga de hoosa e doo iho naa.

¹⁸ Tagi Maolunga, au e tali dau hagaola.

¹⁹ Hanu hagabuulinga o de gau gaiaa e hebagi ange naa gi a Gad, aagai ia e doolohi naa gilaadeu ga daa.

²⁰ Asher e gai naa gai moomuna ma de mmammami, gai e hai gai moomuna e heohi ange gi denga hodooligi.

²¹ Naphtali e bei dahi dia hahine gu tala gi hano, gai e hagadili naa hanu dama mahamaha.

²² Joseph e bei de grapevine hua lagolago, gai se grapevine hua lagolago i gaogao dahi saalingaa vai; ono laa e ssinga ange naa laa honga de buibui.

²³ Dangada e dilia mee hholu e kona de hebagi ange naa gi de ia, e hagammahi naa ga tili ia,

²⁴ aagai dana mee hholu e dee ngalungalue naa donu, luoono lima e hai ga mmahi i hiidinga o de Ia Mmahi o Jacob, go de Ia Hagaloosi, ma de Baba mmahi o Israel.

²⁵ Gai de Maadua o doo damana e bale adu naa goe, gai de Ia Mmahi Mmao laa e hagamanuuia naa goe i denga manuuia i lo te langi i lunga, ma manuuia i lo te gelegele i lalo de henua, ma denga manuuia o de gaanuunu ma de mommee o denga dama.

²⁶ Denga manuuia a doo damana e danuaa ange i denga manuuia mai i denga mounga e dee ngado mai, ma de lava o denga duuduu gu daakodo mai laa huu madagidagi. Denga manuuia nei gi hagamanuuia ai Joseph, ma honga de biho o de ia gu hili laa mai i magavaa o ono daina daane.

²⁷ Benjamin se wolf alasala, ia e daa ga gai dahi manu i taiao, gai e vaevae mee aana e mau i de ahiahi.”

²⁸ Aanei hagadiilinga alodahi e dinoangahulu ma dogolua o Israel, gai aanei muna a delaadeu damana ne tala ange gi gilaadeu, i de masavaa aana ne hagamanuuia ai gilaadeu. Ia ne hagamanuuia dahi ma dahi i de manuuia e heohi ange gi de ia.

De magau o Jacob

²⁹ Gai ia ga bolo ange gi gilaadeu ga hai ange, “Au gu dai magau naa, gai goodou gaavee au danumia i daho ogu dubuna madagidagi i lo te haonga i de alahenua o Ephron, taane Heth,

³⁰ i lo te haonga i honga de alahenua i Machpelah, i baasi dua o Mamre i de henua go Canaan, go de alahenua a Abraham ne hagao mai i daho Ephron, taane Heth e hai ai de mommee o ana daanunga.

³¹ Go kilaa ne danu ai Abraham, ma dono bodu go Sarah, ma Isaac ma dono bodu go Rebekah. Gai go kilaa hogi aagu ne danu ai Leah;

³² go de alahenua ma de haonga ne hagao laa i daho de gau Heth.”

³³ Gai de masavaa huu ne lava ai muna a Jacob ange gi ana dama, gai ia ga hagapogo mai luoono vae gi honga de moenga, ga hai ana manava hagaodi, gai ia ga hagabuni madali ono dangada.