Genesis 14 - De Beebaa Dabu

De hagaola a Abram Lot

¹ De masavaa laa gai Amraphel, de hodooligi o Shinar ma Ariok, de hodooligi o Ellasar, ma Kedorlaomer, de hodooligi o Elam, aama Tidal, de hodooligi o Goiim,

² ne loomai e hebagi ange gi Bera, de hodooligi o Sodom, ma Birsha, de hodooligi o Gomorrah, ma Shinab, de hodooligi o Admah, ma Shemeber, de hodooligi o Zeboiim, aama de hodooligi o Bela, e bei go Zoar.

³ Gai gilaadeu nei alodahi ne hagabuni i de geelonga o Siddim, e bei go Tai Soolo.

⁴ Gai gilaadeu nei alodahi ne hai hegau ange gi Kedorlaomer i e madaangahulu ma lua ngadau, aagai de madaangahulu ma dolu ngadau huu gai gilaadeu ga hai baasi ange gi de ia.

⁵ Gai de madaangahulu ma haa ngadau huu, gai Kedorlaomer ma denga hodooligi e dau ange laa gi de ia ga hagadee kii de gau Repha i Ashteroth Karnaim, ma de gau Zuz i Ham, ma de gau Em i Shaveh Kiriathaim,

⁶ aama de gau Hor i honga de mounga go Seir, ga dae ai loo gi El Paran, se mommee e baa ange gi de vao.

⁷ Gai gilaadeu ne aahe mai gi En Mishpat (e bei go Kadesh), ga hagadee kii ai de henua alodahi o de gau Amalek, aama de gau Amor e nnoho laa i Hazazon Tamar.

⁸ Gai de hodooligi o Sodom, ma de hodooligi o Gomorrah, ma de hodooligi o Admah, ma de hodooligi o Zeboiim, ma de hodooligi o Bela (e bei go Zoar) ne hulo e hebagi ange gi gilaadeu i de geelonga o Siddim,

⁹ gai gilaadeu ne hebagi ange gi Kedorlaomer, de hodooligi o Elam, ma Tidal, de hodooligi o Goiim, ma Amraphel, de hodooligi o Shinar, ma Ariok, de hodooligi o Ellasar. E dogohaa hodooligi e hai baasi ange gi e dogolima.

¹⁰ Gai de geelonga o Siddim e honu i denga tar, gai de masavaa huu o denga hodooligi o Sodom ma Gomorrah ne saavini ai e hulo, gai hanu gu too ange gi lodo mommee tar; gai de gau e doe ne saavini ga hulo gi denga mounga.

¹¹ Gai de gau i de baasi gee ga kave goloa alodahi o Sodom ma Gomorrah aama alaadeu gai alodahi ga hulo ai.

¹² Gai gilaadeu ne kave hogi a Lot, tama daane a taina o Abram ma ono goloa ga hulo ai, go hiidinga ia e noho i Sodom.

¹³ Gai dahi daane ne ola ga hano ga tala ange gi Abram, taane Hebrew. De masavaa laa gai Abram e noho i gaogao denga oak nnui o Mamre, taane Amor, go taina daane o Eshcol ma Aner; gilaadeu nei alodahi ne hagabuni ange gi Abram.

¹⁴ Gai ga langona huu e Abram bolo dono dangada gu noodia ma gu gaavee gee, gai ia ga dagi e 318 daane ne haanau i dono hale, gu agoago ange laa gi de hebagi, gai gilaadeu ga doolohi de gau laa ga daea adu loo i de mommee go Dan.

¹⁵ Gai Abram ne vae ono daane hebagi i de boo, ga hebagi ange gi denga daane de baasi gee, ma de doolohi gilaadeu ga hulo gu tae gi Hobah, se mommee i de bido i ngaiho o Damascus.

¹⁶ Gai ia ga hagaahe mai denga goloa alodahi, gai ia ne hagaahe mai hogi a Lot, tama daane a dono daina ma ono goloa alodahi, ma denga haahine aama de gau ange laa.

Melkizedek gu hagamanuuia Abram

¹⁷ Gai ga ahe mai huu Abram i dua dana hagadee kii Kedorlaomer, ma denga hodooligi madali ia, gai de hodooligi o Sodom ne humai ga hedae ange gi de ia, i de geelonga go Shaveh (e bei go de geelonga a de hodooligi).

¹⁸ Gai Melkizedek, de hodooligi o Salem ne humai hogi ga gaamai hanu pelaoaa ma hanu uvaini. Taane nei go tangada haimeedabu o de Maadua Maolunga Mmao laa.

¹⁹ Gai ia ne hagamanuuia Abram ga hagadaba, “De Maadua Maolunga Mmao laa e hagamanuuia Abram, go de ia ne haia de langi ma henua i lalo.

²⁰ Duuhia de Maadua Maolunga Mmao laa, go de ia ne hagaola ina goe mai i oo hagadaumee.” Gai Abram ne gaavange gi de ia tahi diba i diba e madaangahulu o mee alodahi.

²¹ Gai de hodooligi o Sodom ne hai ange gi Abram, “Hagaahea mai gi de au dangada alodahi, gai koe gaavee denga goloa moou.”

²² Aagai Abram ga hai ange gi de hodooligi o Sodom, “Au gu hagatoo donu ange gi Tagi Maolunga, go de Maadua Maolunga Mmao laa, go de ia ne haia de langi ma henua i lalo,

²³ bolo au e dee kave donu dahi deleisi, aabe se mee e nnoa ai mee vae daudahi mai i oo daha, gi dee hagadaba ai goe, ‘Go au ne haia Abram ga se dangada lava.’

²⁴ Gai au e dee kave donu dahi mee daudahi, deelaa donu huu go gai a denga daane gu gai, aama duuhanga o denga daane ne hulo madali au — go Aner, ma Eshcol, aama Mamre. Gilaadeu gi gaavee olaadeu duuhanga.”