Galatians 6 - De Beebaa Dabu

De hagadau hagauda daemaha

¹ Denga daina, noo dahi dangada gu haisala, aagai goodou gu maatua abodonu laa i de hagasaalunga gi balea ange gi hagaahea mai ia i de lodo maolalo. Gai goodou dagidiiloo gi dee hagataalea hogi goodou.

² Goodou gi hagadau hagauda ina oodou daemaha; noo goodou e hai de mee nei, gai goodou gu daudali i de hainga a Klisdo.

³ Go hiidinga noo tangada e maanadu bolo ia se mee dau, gai ia e dee dau donu, aagai ia e hagasenga donu huu ia.

⁴ Aagai dahi ma dahi gi hagataalea ange dagodo o ana hegau, gi hanu ai hiidinga aana e tuhi ai ia i ana hegau, e dee hagahedae ange ia gi dahi dangada gee.

⁵ Go hiidinga dahi ma dahi e hanu donu ana mee daemaha e hagauda.

⁶ Gai tangada e agoagona muna a de Maadua i daho dahi dangada, gi balea ange hogi tangada laa i ana mee danuaa alodahi e hanu.

⁷ Aude hagasengalia donu huu goodou; e deai donu se dangada e maua i de hagangadi mee de Maadua, go hiidinga be se aha naa huu a tangada e doo, gai ia e hagihagi hogi hua o ana mee ne doo.

⁸ Go hiidinga tangada e dooa laa mee o de angaanga e hagihagi naa de magau; aagai tangada e dooa laa mee o de Hagasaalunga ⌊Dabu⌋ e hagihagi naa de mouli e dee ngado mai i daho de Hagasaalunga.

⁹ Gidaadeu gi dee llodo baageaa i de hai tanuaa: go hiidinga gidaadeu e hagihagi naa donu hua o adaadeu hegau i de masavaa heohi, noo e dee duugia odaadeu lodo.

¹⁰ Deenei ai, noo gu dahi masavaa danuaa, gai gidaadeu gi haia ange tanuaa gi dangada alodahi, gai go huaabodu donu o dangada gu hagadonusia e hai ange mee nei aagena.

Muna ma hagaboo hagaodi

¹¹ Goodou kalo ange diiloo de nnui agu siianga e sisi adu ai gi goodou i dogu lima donu.

¹² Gai go dangada e llodo laa gi duuhia alaadeu hegau e usuusuhia adu goodou gi tuu dagaholiage, gi dee vaivai haia ai gilaadeu i hiidinga o de laagau lui o Klisdo.

¹³ Gai go dangada donu gu tuu dagaholiage laa e dee daohia de hainga, aagai gilaadeu e llodo hogi goodou gi tuu dagaholiage, gai gilaadeu ga tuhi ai delaadeu hai goodou ga tuu dagaholiage.

¹⁴ Aagai de Maadua e dee dugu mai donu au gi duuhia donu huu au i dahi mee daudahi, aagai au e tuhi donu huu de laagau lui o taadeu Dagi Maolunga go Iesu Klisdo, go de laagau lui oogu ne magau ange ai henua i lalo, ma lodo o henua i lalo.

¹⁵ Gai e deai donu haigamaiana taadeu tuu dagaholiage aabe go taadeu dee tuu dagaholiage, gai de mee hagamogomogo go de mouli hoou.

¹⁶ De baba ma de abodonu gi dagodo i daho dangada e hai hegau i mee nei, ma daho dangada o de Maadua go de gau Israel.

¹⁷ Mai iainei ga hano ai, gai gi deai dangada e haia gi hai ngadaa au; go hiidinga au e hagauda denga maaga o Iesu i dogu angaanga.

¹⁸ Denga daina, de abodonu o Iesu Klisdo taadeu Dagi Maolunga gi madali oodou hagasaalunga. Amen.