Galatians 5 - De Beebaa Dabu

De ilaage i lodo o Klisdo

¹ Klisdo ne hai ga ilaage gidaadeu, gai gi ilaage abodonu ai gidaadeu. Deenei ai, goodou tuu gi makaga, gai gi dee aahe ange gi haia goodou gi ni dangada hai hegau e dee ilaage.

² Go au go Paul, au e tala adu bolo noo goodou e tuu dagaholiage, gai gu deai donu haigamaiana o Klisdo adu gi goodou.

³ Au e tala hagadonu ange hogi gi tangada e tuu dagaholiage laa, bolo ia e hai donu gi daudali i denga hainga alodahi.

⁴ Goodou e daudali laa i de hainga e hagaheohi ai goodou, goodou gu vvae gee donu goodou i Klisdo; goodou gu dee maua i de kave de abodonu o de Maadua.

⁵ Gai gidaadeu e hagaduu ngae i de tali hagalodolodo ange gi taadeu hagaheohi i de Hagasaalunga ⌊Dabu⌋ i de gai.

⁶ Go hiidinga e deai donu haigamaiana de tuu dagaholiage aabe go tee tuu dagaholiage i daho Klisdo Iesu, aagai go de gai donu huu e hai hegau laa i de aloha.

⁷ Goodou nogo saavini danuaa donu; gai goai ne daohia goodou gi dee daudali i de muna abodonu?

⁸ De mee ne usuusuhia adu naa goodou e dee mai i daho de ia ne hagahia adu goodou.

⁹ Hanu momo mee hagahua e hai ga hua dahi laabungaa pelaoaa.

¹⁰ Gai au e dahi donu agu tali i daho Tagi Maolunga bolo goodou e maanadu hogi bei au; gai tangada e hakoso ina naa goodou e hagaduasala naa donu, e dee hilihili be ia goai.

¹¹ Denga daina, noo au goi agoago ange huu dangada gi tuu dagaholiage, gai gu aha goi vaivai haia ai nei huu au? E bei ai naa ssele e laavea ai laa dangada i dagodo o de laagau lui gu hagadeai.

¹² Mee naa dangada e hakoso ina naa goodou gi duuduudia donu huu gilaadeu bei dagodo o denga eunuch!

¹³ Denga daina, goodou ne hagahia ange gi de ilaage; aagai goodou gi dee haia oodou ilaage gi haia ai lodo o de angaanga, aagai goodou gi hagadau bale i de aloha.

¹⁴ Gai denga hainga e hagapuni alodahi i de muna nei, “Koe gi aloha i tangada e baa adu gi de goe bei doo aloha donu i de goe.”

¹⁵ Aagai noo goodou e hagadau hebagi ma de hagadau vaivai hai goodou, gai goodou kana ange gi dee hagadau daia donu huu goodou gi maakau.

De mouli i ssauaa o de Hagasaalunga Dabu

¹⁶ Aagai au e hai adu, goodou seesee i lodo o de Hagasaalunga ⌊Dabu⌋, gi dee hagassula ina ai e goodou lodo o de angaanga.

¹⁷ Go hiidinga lodo o de angaanga e hai baasi ange donu gi lodo o de Hagasaalunga, gai lodo o de Hagasaalunga e hai baasi ange gi lodo o de angaanga. Luu mee nei e hagadau hai baasi donu, gai e hai gi dee maua e goodou i de hai oodou mee e llodo ai.

¹⁸ Aagai noo go de Hagasaalunga ⌊Dabu⌋ e dagina goodou, aagai goodou e dee nnoho i lalo ssauaa o de hainga.

¹⁹ Gai hegau baubau o de angaanga e iloo danuaa donu: go de dagodo haisala, ma dahulinga hakino gee, ma de hai be se manu,

²⁰ ma de daumaha ange gi denga diinonga, ma de hai huuhuaa mee, ma de hagadau kino, ma de hagadau hebagi, ma de lodo gaiaa, ma de lili, ma tee anga ange gi dangada, ma tee buni, ma de hagadau hai baasi,

²¹ ma de lodo gaiaa, ma de llodo e unu gi ssenga, ma de hai daonga e unu ai ga ssenga dangada ga hagalongaa ai, aama de hai dahulinga alodahi bei mee nei. Au e tala adu gi goodou, bei dagu hai gu tala adu ai i mua, bolo dangada e haia mee nei e dee ulu donu i de nohoanga hodooligi o de Maadua.

²² Aagai de hua o de Hagasaalunga go de aloha, ma de malangilangi, ma de baba, ma de golomagi lodo, ma de abodonu, ma tanuaa, ma de hai hegau i de mee abodonu,

²³ ma de daudonu, ma dugu iho lodo o tangada; gai e deai donu se hainga e hai baasi ange gi mee nei.

²⁴ Gai dangada alodahi o Klisdo Iesu gu lava i de daa gi maakau lodo o de angaanga aama ana maanadu alodahi.

²⁵ Go hiidinga gidaadeu e mouli i de Hagasaalunga ⌊Dabu⌋, gidaadeu ga seesee hogi i lodo o de Hagasaalunga.

²⁶ Gidaadeu gi dee pasa hagassoenga, ga hagadau hagallili ai goodou, aama de hagadau llodo gaiaa i oodou magavaa.