Galatians 4 - De Beebaa Dabu

¹ Gai dagodo o tama e gaavee de boolonga, dono masavaa se gauligi ai, gai ia e bei donu huu dagodo o tangada hai hegau dee ilaage, e dee galemu donu niiana mee alodahi.

² Gai ia e noho i lalo o dangada e diiloo ange laa ia ma dangada e diiloo ange ana mee, ga dae ai gi de laangi a dono damana gu lava laa i de hagamodu.

³ Gai e bei ai hogi odaadeu dagodo: de masavaa odaadeu tigi maatua abodonu ai, gai gidaadeu e nnoho i lalo ssauaa o denga hagasaalunga e dagina laa henua i lalo.

⁴ Aagai ga dae huu de masavaa gu lava laa i de hagamodu, gai de Maadua ne hai gi humai dana Dama Daane gi haanau i daho de hine, i lalo de hainga a Moses,

⁵ gai ia ga hagaola ai gilaadeu goi nnoho laa i lalo ssauaa o de hainga, gi maua ai e gidaadeu i de hai gi ni dama daohi nii de Maadua.

⁶ Gai go hiidinga goodou ni dama niiana, deelaa ai, de Maadua gu hai gi humai de Hagasaalunga o dana Dama Daane gi noho i odaadeu lodo, gai goodou ga hagahi ange ai, “Abba! Tamana!”

⁷ Deenei ai, koe gu dee se dangada hai hegau, aagai gu se dama donu, gai noo koe se dama, gai koe gu dau hogi i de boolonga o de Maadua.

De manavasaa lodo o Paul i de gau Galatia

⁸ I mua gai goodou e dee iloo de Maadua, goodou ni dangada hai hegau niio mee e dee ni Maadua abodonu.

⁹ Gai iainei goodou gu iloo de Maadua, gai de Maadua gu iloo goodou; gai gu aha gu aahe ange ai naa goodou e hai hegau ange gi denga hagasaalunga baageaa o henua i lalo nei e deai laa olaadeu haigamaiana? Goodou gu llodo naa donu e hai gi ni dangada hai hegau niiolaadeu?

¹⁰ Goodou e dao denga laangi, ma malama, ma masavaa, aama ngadau!

¹¹ Au gu manavasaa kana ni ngadi hegau aagu ne hai.

¹² Denga daina, au e dangidangi adu goodou gi bei ogu dagodo, go hiidinga au e bei hogi oodou dagodo. Tigi ai donu se mee dee heohi oodou ne hai mai gi de au.

¹³ Goodou e manadua bolo go hiidinga o dogu magi aagu ne daamada ai de agoago adu de longo danuaa gi goodou.

¹⁴ Gai e dee galemu donu dogu magi ne hai ga hai ngadaa goodou, aagai goodou tee kino donu aabe ne hagangadi mee au, aagai goodou ne hai au bei dagodo o dahi dangada de langi o de Maadua, gai e dagodo be go au donu go Klisdo Iesu.

¹⁵ Gai i hee ai de malangilangi nogo dagodo laa i oodou lodo? Gai au e tala hagadonu bolo noo goodou ne maua, gai goodou ne malangilangi donu i de llao mai oodou hadu mada ga gaamai gi de au.

¹⁶ Au gu se hagadaumee nei niiodou i hiidinga dagu tala adu gi goodou de muna abodonu?

¹⁷ Gilaadeu ne llodo mmao gi maua e gilaadeu goodou, aagai e dee se hiidinga danuaa. Gilaadeu e llodo e vvae gee goodou mai i de au, gi kona ai doodou llodo i gilaadeu.

¹⁸ Gai se mee danuaa donu de llodo o dangada i goodou noo se hiidinga danuaa, gai e dee go dogu masavaa donu huu e noho ai i oodou daha.

¹⁹ Agu dama, au gu ahe ange hogi ma gu mmae i oodou hiidinga, bei dagodo o de hine e hai ono hagalangona, ga dae ai gi de honu danuaa dagodo o Klisdo i oodou lodo!

²⁰ Mee naa au gi noho i oodou daha iainei, gai au ga sui ai dogu leo e basa adu ai, go hiidinga au gu manavasaa i oodou hiidinga.

De mee hagasengasenga o Hagar ma Sarah

²¹ Au e ssili adu gi goodou e llodo laa e nnoho i lalo de hainga, goodou tigi langona naa donu muna gu tala laa i de hainga?

²² Gai gu sisi i de Beebaa Dabu bolo Abraham e dogolua ana dama daane, dahi se dama nii de hine hai hegau, gai dahi se dama nii de hine ilaage.

²³ Tama a de hine hai hegau ne haanau bei dagodo hagatau a dangada, aagai tama a de hine ilaage ne haanau bei dagodo de hagatoo donu a de Maadua.

²⁴ De mee nei se mee hagasengasenga: luu haahine nei ni hagatoo donu hagaheloongoi e lua. Dahi ne hai i honga de mounga go Sinai, gai ana dama ni dangada hai hegau; deenei de hine go Hagar.

²⁵ Hagar go de mounga go Sinai i Arabia; ia e hagasengasenga ange gi Jerusalem, go hiidinga gilaadeu ma ana dama ni dangada hai hegau.

²⁶ Aagai Jerusalem i de langi laa e ilaage, deenei tinana odaadeu alodahi.

²⁷ Go hiidinga gu sisi e hai ange, “De hine dee hua, koe gi malangilangi; de hine tigi langona iho de mmae i de haanau, koe gi oo mage malangilangi; go hiidinga de hine gu dilia e soa ange naa ana dama i dama a de hine e dahi laa ono bodu.”

²⁸ Denga daina, goodou e bei dagodo o Isaac, goodou go dama ne haanau bei dagodo o de hagatoo donu.

²⁹ De masavaa laa gai tama ne haanau bei de hagatau a dangada ne vaivai hai tama ne haanau laa i lodo o de Hagasaalunga ⌊Dabu⌋, gai e bei ai hogi mee e hai iainei.

³⁰ Aagai aahee muna a de Beebaa Dabu? “Alualumia gi hano de hine hai hegau ma dana dama; go hiidinga tama a de hine hai hegau e dee bolo madali tama a de hine ilaage.”

³¹ Deenei ai, denga daina, gidaadeu e dee ni dama nii de hine hai hegau, aagai ni dama nii de hine ilaage.