Galatians 3 - De Beebaa Dabu

De gai aabe go hegau o de hainga?

¹ De gau Galatia, goodou e llodo ssenga! Goai ne helau ina naa goodou? Dagodo de daudau o Iesu Klisdo i de laagau lui gu lava donu i de hagadonu danuaa adu gi goodou.

² Gai au e ssili adu gi goodou dahi mee: goodou ne kave laa de Hagasaalunga ⌊Dabu⌋ i doodou hai hegau i de hainga, aabe go doodou langona muna o de longo danuaa ga kai ange aagena?

³ Gu kona naa donu doodou llodo ssenga? Goodou ne daamada i de Hagasaalunga ⌊Dabu⌋, aagai iainei goodou ga hai naa gi hoohonu abodonu oodou kai i oodou mahi donu huu?

⁴ Gai teai laa donu haigamaiana doodou hagaduasala ina i mee lagolago? Ni muna abodonu ne hanu donu haigamaiana!

⁵ E aha, de ia ne gaavadu gi goodou de Hagasaalunga ⌊Dabu⌋, ma de hai denga mee hagalele mouli i oodou daha, ne hai laa mee nei i dono daudali i de hainga, aabe go hiidinga doodou langona de longo danuaa ga kai ange aagena?

⁶ Gai e bei ai hogi Abraham: “Ia ne hagadonusia de Maadua, gai dono gai ne hai ia gi dau bolo se dangada e heohi.”

⁷ Deenei ai, goodou gi tonu ange bolo gilaadeu e kai go dama donu a Abraham.

⁸ Gai de Beebaa Dabu ne tala bolo de Maadua e hagaheohi naa denga Gentile i de gai, ma de agoago ange hogi de longo danuaa gi Abraham i mua, ga hai ange, “Gai denga huaahenua alodahi e manuuia naa i oo hiidinga.”

⁹ Deenei ai, dangada alodahi e kai e hagamanuuia naa madali Abraham, taane ne hagadonusia laa de Maadua.

¹⁰ Gai dangada alodahi e tali hagalodolodo ange gi hegau o de hainga gu hagamalaia donu; go hiidinga gu sisi e hai ange, “E malaia dangada alodahi e dee daohia mee alodahi gu sisi i de Beebaa o de hainga ga daudali ai.”

¹¹ Gai iainei gu sula danuaa mai bolo e deai donu se dangada e hagaheohi i daho de Maadua i dono hai hegau i de hainga; go hiidinga, “Tangada heohi e mouli i de gai.”

¹² Aagai de hainga e dee dagelo ange gi de gai; go hiidinga “Tangada e daudali i de hainga alodahi e mouli ai donu.”

¹³ Klisdo ne hagao gidaadeu ga hagaola mai i de hagamalaia o de hainga, ia ne hagamalaia i odaadeu hiidinga — go hiidinga gu sisi e hai ange, “E hagamalaia tangada e daudau i honga dahi manu somo”  —

¹⁴ gai gi maua ai hogi e denga Gentile i de kave de manuuia o Abraham i daho Klisdo Iesu, gai gi maua ai e gidaadeu i de kave de Hagasaalunga gu hagatoo donu laa i de gai.

De hainga ma de hagatoo donu

¹⁵ Denga daina, au e tala adu dahi hagadagodo i hegau e hai i daho dangada: e deai donu se dangada e maua i de hai gi dee haigamaiana de boolonga o dahi dangada, aabe e hagapuni ange hanu mee aagena, noo gu lava i de hagasauaa.

¹⁶ Denga hagatoo donu ne gaavange gi Abraham ma ono hagadiilinga. Gai tee hai ange, “ange gi denga hagadiilinga,” ni dangada soa; aagai ange gi dahi, “gai ange gi doo hagadiilinga,” go Klisdo.

¹⁷ Deenei de hagadoonunga o agu muna: de hainga ne gaamai laa i dua e 430 ngadau tee maua i de hagadeai se hagatoo donu hagaheloongoi a de Maadua gu hagasauaa laa, gi dee hai hegau ai de hagatoo donu laa.

¹⁸ Gai noo de boolonga nei ne dagelo ange gi de hainga, gai gu dee maua ai loo i de dagelo ange gi de hagatoo donu; aagai de Maadua ne hai ange de boolonga nei gi Abraham i dahi hagatoo donu.

¹⁹ Gai aahee hiidinga ne gaamai ai laa de hainga? De hainga ne gaamai i hiidinga o denga haisala, ga dae gi de masavaa e dae mai ai de hagadiilinga ne gaavee laa de hagatoo donu. Gai de hainga ne gaamai i daho de gau de langi ma tangada e hano i magavaa.

²⁰ Gai de hai gi dahi dangada e hano i magavaa e hagaago mai bolo e dee dahi donu huu baasi; aagai de Maadua e dahi donu huu.

Hiidinga o de hainga

²¹ E aha, de hainga e hai baasi ange laa gi denga hagatoo donu a de Maadua? E dee maua donu! Gai noo de hainga gu gaamai laa ne maua i de hagamouli dangada, gai de hainga ne maua donu i de hagaheohi dangada.

²² Aagai de Beebaa Dabu e hagadaba bolo dangada alodahi gu nnoho i lalo ssauaa o de haisala; gai go gilaadeu e kai ange gi Iesu Klisdo e gaavange aagena de hagatoo donu i delaadeu hagadonusia.

²³ I mua de dae mai o de gai, gai gidaadeu e noodia ma e nnoho i lalo ssauaa o de hainga, gidaadeu ne hhao gi lo te hale pono ga dae ai gi de masavaa e hagaago mai ai de gai.

²⁴ Deelaa ai, de hainga ne dagitilo gidaadeu ga dae ai gi de humai o Klisdo, gai ia ga hagaheohi ai gidaadeu i de gai.

²⁵ Aagai iainei gu dae mai donu de masavaa o de gai, gidaadeu gu dee nnoho i lalo ssauaa o de hainga.

²⁶ Go hiidinga goodou alodahi gu ni dama nii de Maadua i doodou kai ange gi Klisdo Iesu.

²⁷ Go hiidinga goodou alodahi gu babudaisi i lodo o Klisdo, e bei gu kahu i Klisdo.

²⁸ Gu deai donu se dangada Ssuu, be se dangada Greek, be se dangada hai hegau, be se dangada ilaage, be se daane aabe se hine; i hiidinga goodou gu se dagodo daudahi i lodo o Klisdo Iesu.

²⁹ Gai noo goodou ni dangada niio Klisdo, aagai goodou ni hagadiilinga niio Abraham, gai gu ni dangada e gaavee de boolonga gu lava laa i de hagatoo donu ai.