Galatians 2 - De Beebaa Dabu

Paul ma de gau tala ange laa

¹ Gai dua huu e madaangahulu ma haa ngadau, gai au ne ahe gi Jerusalem madali Barnabas, gai au ne kave hogi Titus madali au.

² Au ne hano gi kilaa i hiidinga se mee ne hagaago mai i daho de Maadua au gi haia. Gai au ne hagabuni donu huu madali denga dagi i kilaa ga tala ange gi gilaadeu dagodo o de longo danuaa aagu e agoago ange laa gi denga Gentile, gi dee ni ngadi hegau ai aagu e hai.

³ Aagai gilaadeu tee hai hogi Titus, taane madali au, gai se daane Greek, gi tuu dagaholiage.

⁴ Gai de mee nei ne hai i hiidinga o dangada e dee hagadonusia gu ulu mai laa gi odaadeu magavaa, ma e dagitilo ai dagodo o demaadeu ilaage i daho Klisdo Iesu, gai gilaadeu ga hai ai gimaadeu gi ni dangada hai hegau dee ilaage.

⁵ Gai gimaadeu tee dugu ange donu gi hai mee nei i dahi masavaa bodobodo, gi maua ai de mee abodonu o de longo danuaa gi dagodo adu gi goodou.

⁶ Gai gilaadeu e hagabinga laa bolo ni dagi — olaadeu duulanga aamua e dee ni mee dau donu i ogu daha; de Maadua e dee vae dangada donu — gai teai hogi alaadeu muna ne bale mai ai au.

⁷ Gai gilaadeu ne gidee bolo gu gaamai gi de au de hegau, go de agoago ange de longo danuaa gi denga Gentile, bei de hai gu gaavange ai laa hogi gi Peter, gi agoagona ange de longo danuaa gi de gau Ssuu.

⁸ Go hiidinga de Maadua e hai hegau laa i daho Peter, i dono agoago ange gi de gau Ssuu, e hai hegau donu hogi i ogu daha, i dogu agoago ange gi denga Gentile.

⁹ Gai ga gidee huu e James, ma Cephas, aama John, go gilaadeu e hagabinga laa bolo ni dagi, de abodonu o de Maadua gu gaamai laa gi de au, gai gilaadeu ga luuluu omaau lima ma Barnabas, ga hai gimaau gi hulo gi denga Gentile, gai gilaadeu ne hulo gi de gau Ssuu.

¹⁰ Gai gilaadeu ne llodo gimaau gi dee ngalo de gau hagaau aloha, gai se mee donu hogi niiogu e hagaduu ngae ma e hai hegau ange aagena.

De hagasee a Paul Peter

¹¹ Gai de masavaa huu o Cephas ne humai ai gi Antioch, gai au ga hagasee ia i madamada o dangada, go hiidinga ia gu dee heohi.

¹² Go hiidinga i mua de tae mai o denga daane a James ne hai laa gi loomai, gai Peter nogo gaimee madali denga Gentile; aagai ga tae mai huu denga daane laa, gai ia gu dee hagabuni ange gi denga Gentile, go hiidinga ia gu madagu i de hagabuulinga o de tuu dagaholiage.

¹³ Gai ia ne kave lodo o denga daane Ssuu ange laa gi hai hegau i de mee dee heohi, gai gilaadeu ne kave ai hogi lodo o Barnabas, gai ia ga daudali ange i alaadeu hegau dee heohi.

¹⁴ Aagai de masavaa huu aagu ne gidee ai bolo gilaadeu gu dee hai hegau i de mee heohi o de longo danuaa, gai au ga basa ange gi Cephas i madamada o dangada alodahi i kilaa, ga hai ange, “Koe se dangada Ssuu, gai koe e mouli bei dagodo o denga Gentile, e dee mouli bei dagodo o tangada Ssuu; gai gu aha gu usuusu ange ai naa goe denga Gentile gi mouli bei dagodo o de gau Ssuu?”

De gau Ssuu ma Gentile e hagamouli i de gai

¹⁵ Gimaadeu ne haanau mai ni dangada Ssuu, e dee ni dangada haisala bei denga Gentile;

¹⁶ gai gimaadeu e iloo bolo tangada e dee hagaheohi i dono daudali i de hainga, aagai go dono gai ange gi Iesu Klisdo. Gai gimaadeu alodahi gu kai ange gi Klisdo Iesu, gi hagaheohi ai gimaadeu i demaadeu kai ange gi Klisdo, e dee go demaadeu daudali i de hainga, go hiidinga de hai hegau i de hainga e dee maua donu i de hagaheohi dahi dangada daudahi.

¹⁷ Gai noo de masavaa amaadeu e ssala ai e hagaheohi gimaadeu i lodo o Klisdo, gai gu gidee bolo gimaadeu ni dangada haisala, gai go Klisdo ai ne haia gimaadeu ga haisala? E dee maua donu!

¹⁸ Noo au e ahe ange ga hagatuu age mee aagu gu oha iho, gai e hagaago mai bolo au se dangada donu e oohaa de hainga.

¹⁹ Gai go de hainga ne hidi mai ai dogu magau ange gi de hainga, gi maua ai e au i de mouli ange gi de Maadua.

²⁰ Au gu lava i de daudau i de laagau lui madali Klisdo. Gai e dee go au ai loo e mouli iainei, gai go Klisdo e mouli i ogu lodo. Gai dogu masavaa e mouli ai i de angaanga nei, gai au e mouli i de gai ange gi Tama a de Maadua, go de ia ne aloha laa i de au ga gaavange dono mouli i ogu hiidinga.

²¹ Au e dee hagangadi mee de abodonu o de Maadua; go hiidinga noo gimaadeu ne hagaheohi i de hainga, aagai teai donu haigamaiana de magau o Klisdo.