Galatians 1 - De Beebaa Dabu

De hagaboo

¹ Mai i daho Paul, dahi dangada tala — tee hili laa i daho dangada aabe go ssauaa o dangada, aagai ne hili i daho Iesu Klisdo ma de Maadua Tamana, ne hagamouli ina age laa Iesu i de magau,

² ma mai hogi i daho denga daina alodahi madali au. Ange gi denga nohoanga dabu i Galatia.

³ De abodonu ma de baba mai i daho de Maadua taadeu Damana aama Tagi Maolunga go Iesu Klisdo gi dagodo i oodou daha.

⁴ Iesu Klisdo ne gaavange dono mouli i hiidinga odaadeu haisala, gai ia ga hagaola ai gidaadeu mai i de masavaa o de baubau go iainei, bei dagodo lodo o taadeu Maadua ma Tamana.

⁵ Gai gi hagamahamaha ina ai ia ga hano ai e dee ngado mai. Amen.

E deai ange donu se longo danuaa abodonu

⁶ Au gu lele ogu mouli i de moolau doodou hulo gee mai i de ia ne hagahia goodou i de abodonu o Klisdo, ga daudali ange i dahi longo danuaa gee —

⁷ e dee se longo danuaa abodonu. Hanu dangada gu hai ma gu dee paba oodou lodo ma de hagatale de sui de longo danuaa o Klisdo.

⁸ Aagai e dee galemu donu be go gimaadeu aabe se dangada de langi, e agoagona adu goodou i dahi longo danuaa gee ma de mee amaadeu gu lava i de agoago adu ai goodou, gai ia gi malaia!

⁹ Au e ahe ange e tala adu gi goodou, bei demaadeu hai gu tala adu ai gi goodou i mua: noo dahi dangada e agoago adu goodou i dahi longo danuaa gee ma mee oodou gu lava naa i de daohi, gai ia gi malaia.

¹⁰ E aha, go dangada aagu e hagatale nei de hai gi malangilangi, aabe go de Maadua? Noo au goi hagatale huu de hagamalangilangi dangada, aagai au e dee se dangada hai hegau abodonu niio Klisdo.

De hagahi o Paul gi daalaa de longo danuaa

¹¹ Denga daina, au e lodo goodou gi tonu ange bolo de longo danuaa aagu gu agoago adu ai goodou, e dee se mee mai i daho dangada.

¹² Gai au tee kave mai i daho dangada, aabe se mee niiagu ne agoago ai i daho dahi dangada; aagai se mee ne hagaago mai gi de au i daho Iesu Klisdo.

¹³ Gai goodou gu langona dagodo o dogu mouli i de masavaa oogu nogo daumaha ai bei dagodo o de gau Ssuu: au ne kona donu dagu vaivai hai de nohoanga dabu o de Maadua ma de hagatale de oha de nohoanga dabu.

¹⁴ Gai au ne kii ange donu dogu hagammahi i denga hai daumaha a de gau Ssuu i ogu soa ange laa, ma de daudali i tahulinga a odaadeu damana madagidagi.

¹⁵ Aagai de masavaa huu a de ia ne vaaea gee au i mua dogu haanau, ma de hagahi au i dono abodonu,

¹⁶ ne malangilangi ai i de hagaago mai dana Dama Daane gi de au, gi maua ai e au i de agoago ange ia gi denga Gentile, gai au tee hano donu e kave de bale mai i daho dahi dangada daudahi.

¹⁷ Au tee hano hogi gi Jerusalem e hedae ange ai gi gilaadeu gu ni dangada tala laa i ogu mua, aagai au ne hano gi Arabia, muli mai gai au ne ahe ga hano gi Damascus.

¹⁸ Aagai dua huu e dolu ngadau gai au ne hano e hedae ange gi Cephas i Jerusalem, ga noho i ono daha i e madaangahulu ma lima laangi.

¹⁹ Aagai teai ange donu agu dangada tala ne gidee, go James donu huu, taina o Tagi Maolunga.

²⁰ (Gai mee aagu e sisi adu nei gi goodou ni muna abodonu, au e dee hadu muna, i mada luu mada o de Maadua.)

²¹ Dua mee laa gai au ne hano gi Syria ma Cilicia.

²² De masavaa laa gai dangada i denga nohoanga dabu o Klisdo i Judea tigi iloo e gilaadeu au.

²³ Gilaadeu ne langona donu huu de hagataba a dangada, “Taane nogo vaivai haia laa gidaadeu, gu agoago ange hogi dangada i dagodo o de gai, go de mee aana ne hagatale laa de oha.”

²⁴ Gai gilaadeu ga tuhi de Maadua i ogu hiidinga.