Ezra 10 - De Beebaa Dabu

De tala a dangada olaadeu haisala

¹ Gai de masavaa o Ezra ne dalodalo ai ga tala olaadeu haisala, ma de dangi ga ino gi honga de gelegele, i mada i mua o de hale o de Maadua, gai ne soa daane ma haahine aama gauligi o Israel gu hagabuni mai gi kilaa; gai gilaadeu alodahi gu tangi mmao.

² Gai Shecaniah tama daane a Jehiel, o de aamuli o Elam, ga hai ange gi Ezra, “Gimaadeu gu haisala ange gi taadeu Maadua, gimaadeu gu hai bodu ange gi denga haahine henua gee. Aagai e dee galemu demaadeu hai de hegau nei, gai goi dahi donu tali a de gau Israel.

³ Deenei ai, gidaadeu ga hai dahi hagatoo donu hagaheloongoi madali taadeu Maadua; gidaadeu ga dugu gi hulo denga haahine ma alaadeu dama, bei dagodo o au muna, demaadeu dangada aamua, aama muna a dangada e maatagu i muna a taadeu Maadua. Gidaadeu ga hai gi bei muna o de hainga.

⁴ Koe gi hidi age; go hiidinga niiau de hegau nei. Gai gimaadeu e hai donu gi bei au muna, gai koe gi lodo mmahi i de hai de hegau nei.”

⁵ Gai Ezra ne duu age ga hai de gau haimeedabu maolunga, ma denga daane de aamuli o Levi, ma de gau Israel alodahi gi hagatoo donu bei de hai alaadeu gu tala ange ai laa. Gai gilaadeu ga hagatoo donu.

⁶ Gai Ezra ga hano gee mai i ma te hale o de Maadua, ga ulu gi lo te aabi o Jehohanan, tama daane a Eliashib ga noho ai i de boo laa. Gai ia tee gaimee be ne unu hanu vai, go hiidinga ia gu daemaha i de hai hegau hakino gee o dangada nogo nnoho laa i dahi henua gee.

⁷ Gai de hagailoo ne hai i Judah ma Jerusalem ange gi dangada alodahi gu aahe mai laa gi de henua, bolo gilaadeu gi hagabuni mai gi Jerusalem.

⁸ Gai be goai naa huu tee humai i dua e dolu laangi, gai denga dagi, aama denga daane maatua gu hagamodu bolo ono goloa alodahi e kave gee donu mai i ono daha, gai ia e vvae gee gi dee noho madali dangada gu aahe mai laa gi de henua.

⁹ Gai e dolu donu huu laangi gai daane alodahi o Judah ma Benjamin gu hagabuni mai gi Jerusalem. Gai de madalua laangi huu o ssiva malama, gai dangada alodahi gu loomai ga nnoho i lo te duu malaelae i mada i mua o de hale o de Maadua, gai gilaadeu gu manavasaa i hiidinga o de hegau gu hai laa aama hiidinga o de langi gu pala.

¹⁰ Gai tangada haimeedabu go Ezra ga duu age ga hai ange gi gilaadeu, “Goodou gu haisala i doodou hai bodu ange gi denga haahine henua gee, gai goodou gu hai ma gu kii ange de lagolago haisala o Israel.

¹¹ Deenei ai, iainei gai goodou daalaa ange oodou haisala gi Tagi Maolunga, de Maadua o oodou dubuna madagidagi, gai goodou haia ono lodo; goodou vaaea gee goodou mai i dangada o de henua nei aama mai i denga haahine henua gee.”

¹² Gai de huaadangada alodahi ne hevaalogi ga hai ange, “Uaa, e heohi au muna! Gimaadeu e hai donu gi bei au muna.

¹³ Aagai dangada gu soa mmao, gai go de masavaa hogi e bala langi ai, gai dangada gu dee maua i de tuu gi daulooloa i de langi. Gai de hegau nei e dee dahi donu huu aabe lua laangi e hai ai, go hiidinga gu soa gimaadeu gu haisala i de mee nei.

¹⁴ Gai haia odaadeu dagi gi suuia dangada alodahi gi hagatau ina ai de hegau nei; gai dangada alodahi i denga aduhale gu hai bodu ange laa gi denga haahine henua gee, gi loomai gi olaadeu daha i de masavaa gu hagailonga, madali denga daane maatua aama de gau hagamodu muna o denga aduhale hugadoo, ga dae ai gi de helui de lili o taadeu Maadua i gidaadeu i hiidinga o de hegau nei.”

¹⁵ Gai go Jonathan, tama daane a Asahel donu huu, ma Jahzeiah tama daane a Tikvah ne hai baasi ange gi de mee laa, gai Meshullam ma Shabbethai, o de aamuli o Levi, ne buni ange gi gilaau.

¹⁶ Gai dangada ne aahe mai laa i dahi henua gee ne hagasula de hagatau laa. Gai tangada haimeedabu go Ezra ne hili hanu dagi o denga hagadiilinga, e dahi daane mai i dahi aamuli, ga sisi olaadeu ingoo. Gai tahi laangi huu o de madaangahulu malama, gai denga daane nei ne hagabuni ga hagasaele dagodo o de mee nei,

¹⁷ gai tahi laangi huu o tahi malama, gai gu odi i de daohi ingoo o denga daane alodahi gu hai bodu ange laa gi denga haahine henua gee.

Daane ne hai bodu ange gi denga haahine henua gee

¹⁸ Gai hagadiilinga o de gau haimeedabu ne hai bodu ange gi denga haahine henua gee: Mai i hagadiilinga o Jeshua, tama daane a Jozadak, ma ono daina daane: go Maaseiah, ma Eliezer, ma Jarib, aama Gedaliah.

¹⁹ (Gai gilaadeu ne luuluu lima ga hagatoo donu bolo gilaadeu e maavae ange gi olaadeu bodu, ma de hai ssigidaumaha o tagasala i dahi ssiibi daane mai i denga ssiibi.)

²⁰ Mai i hagadiilinga o Immer: go Hanani ma Zebadiah.

²¹ Mai i hagadiilinga o Harim: go Maaseiah, ma Elijah, ma Shemaiah, ma Jehiel, aama Uzziah.

²² Mai i hagadiilinga o Pashhur: go Elioenai, ma Maaseiah, ma Ishmael, ma Nethanel, ma Jozabad, aama Elasah.

²³ Mai i hagadiilinga o Levi: go Jozabad, ma Shimei, ma Kelaiah (e bei go Kelita), ma Pethahiah, ma Judah, aama Eliezer.

²⁴ Mai i de gau daahili: go Eliashib. Mai i de gau hagaloosi: go Shallum, ma Telem, aama Uri.

²⁵ Gai mai i de gau Israel ange laa: mai i hagadiilinga o Parosh: go Ramiah, ma Izziah, ma Malkijah, ma Mijamin, ma Eleazar, ma Malkijah, aama Benaiah.

²⁶ Mai i hagadiilinga o Elam: go Mattaniah, ma Zechariah, ma Jehiel, ma Abdi, ma Jeremoth, aama Elijah.

²⁷ Mai i hagadiilinga o Zattu: go Elioenai, ma Eliashib, ma Mattaniah, ma Jeremoth, ma Zabad, aama Aziza.

²⁸ Mai i hagadiilinga o Bebai: go Jehohanan, ma Hananiah, ma Zabbai, aama Athlai.

²⁹ Mai i hagadiilinga o Bani: go Meshullam, ma Malluk, ma Adaiah, ma Jashub, ma Sheal, aama Jeremoth.

³⁰ Mai i hagadiilinga o Pahath-Moab: go Adna, ma Kelal, ma Benaiah, ma Maaseiah, ma Mattaniah, ma Bezalel, ma Binnui, aama Manasseh.

³¹ Mai i hagadiilinga o Harim: go Eliezer, ma Isshijah, ma Malkijah, ma Shemaiah, ma Simeon,

³² ma Benjamin, ma Malluk, aama Shemariah.

³³ Mai i hagadiilinga o Hashum: go Mattenai, ma Mattattah, ma Zabad, ma Eliphelet, ma Jeremai, ma Manasseh, aama Shimei.

³⁴ Mai i hagadiilinga o Bani: go Maadai, go Amram, ma Uel,

³⁵ ma Benaiah, ma Bedeiah, ma Keluhi,

³⁶ ma Vaniah, ma Meremoth, ma Eliashib,

³⁷ ma Mattaniah, ma Mattenai, aama Jaasu.

³⁸ Mai i hagadiilinga o Binnui: go Shimei,

³⁹ ma Shelemiah, ma Nathan, ma Adaiah,

⁴⁰ ma Macnadebai, ma Shashai, ma Sharai,

⁴¹ ma Azarel, ma Shelemiah, ma Shemariah,

⁴² ma Shallum, ma Amariah, aama Joseph.

⁴³ Gai mai i denga hagadiilinga o Nebo: go Jeiel, ma Mattithiah, ma Zabad, ma Zebina, ma Jaddai, ma Joel, aama Benaiah.

⁴⁴ Gilaadeu nei alodahi ne hai bodu ange gi hanu haahine henua gee; gai hanu gilaadeu gu hanu donu alaadeu dama ange gi denga haahine laa.