Ezekiel 4 - De Beebaa Dabu

De hagaago de duuli luu baasi o Jerusalem

¹ “Gai koe, tama a tangada, hannoo gaamai dahi hadu baabaa hagaduulia i oo mada i mua, ga maaga ange aagena de ada o de aduhale go Jerusalem.

² Gai koe ga hagatuu mee e oha ai, ma de hagaduu dahi bae e kage age ai, ma de hagabudubudu age denga gelegele i gaogao de ada o de aduhale laa, ga hagaduu de mommee nnoho gaainga i luu baasi, aama de hagadaabena denga laagau i luu baasi e oha ai de buibui o de aduhale.

³ Gai koe gaavee dahi gumedi baalanga ga dugu i ooluu magavaa ma de ada o de aduhale, bei dagodo o dahi buibui baalanga; gai koe ga noho ga huli ange gi de aduhale, e dagodo be koe e lodo e duuli luu baasi de aduhale e hebagi ange aagena. De mee nei se hagailonga ange gi de gau Israel.

⁴ Gai koe ga dagodo gi lalo ga huli ange gi doo baasi masui, gai koe ga hagauda anga haisala o de gau Israel gi honga doo gaogao, gai koe ga hagauda ai delaadeu hagaduasala i denga laangi oou e dagodo ai laa ga huli hakaogao.

⁵ Gai au e hagamodu adu naa taelodo o denga laangi gi bei taelodo o denga ngadau o olaadeu haisala. Gai e 390 laangi aau e hagauda ai haisala o Israel.

⁶ Gai de masavaa naa huu aau e hagaodi ange ai laangi nei, gai koe ga ahe ange ga dagodo ga huli ange gi doo baasi madau, ga hagauda de hagaduasala o de nohoanga hodooligi o Judah; au gu gaavadu e madahaa laangi e dagodo ai goe, dahi laangi e bei se dahi ngadau.

⁷ Gai koe ga dagodo ga huli ange gi de aduhale go Jerusalem gu duuli ina laa luu baasi, gai luoo lima e dee haoli, gai koe ga basa pelaabisi ga hai baasi ange gi de aduhale laa.

⁸ Gai tilo, au e nnoa naa goe i hanu daula, gi dee maua ai e goe i de huli ga dae ai gi de odi ange laangi oou e duuli ai.

⁹ Gai koe ga kave hanu wheat ma barley, ma bean, ma lentil, ma millet aama spelt, ga hhao ange gi dahi gumedi hadu ga labu ai hanu pelaoaa e gai goe. Gai koe ga gaimee ai i denga laangi e 390 oou e dagodo ai laa ga huli hakaogao.

¹⁰ Gai de hagabaaunga o au gai e hagabau ange gi madalua shekel i dahi laangi, gai koe e gai mee nei i denga masavaa gu hagailonga i de laangi.

¹¹ Gai koe e hagabau hogi au vai e unu; koe e unu e dahi diba i diba e ono o dahi hin i dahi laangi. Gai koe e unu vai nei i denga masavaa gu hagailonga i de laangi.

¹² Gai koe ga gai mee nei bei dau hai e gai ai dahi keege barley; gai koe ga dao mee nei i madamada o dangada, ga hai duudae o dangada ga hai ai dau ahi.”

¹³ Gai Tagi Maolunga ne hai mai, “Deenei de hai a de gau Israel, e gai ai denga gai dee gilimalali, i de masavaa olaadeu e nnoho ai i magavaa o denga huaahenua, i denga mommee aagu e hai gilaadeu gi hulo aagena.”

¹⁴ Gai au ne hai ange, “Dogu Ia Aamua go Iahweh! Tilo, au tigi gai donu hanu mee e hai ai gi hakino gee au. Mai i dogu gauligi ga dae mai ai gi iainei, gai au tigi gai donu hanu manu maakau, aabe ni manu dolodolo ne daia ga maakau i hanu manu alasala. Tigi ai hogi giidagi dee gilimalali ne hhao gi lo togu ngudu.”

¹⁵ Gai ia ne hai mai gi de au, “Au e dugu adu goe gi dao ina au gai i denga duudae kaau, e dee go duudae o dangada.”

¹⁶ Ia ne hai mai hogi gi de au, “Tama a tangada, tilo, au e hai naa gi onge Jerusalem; gai dangada e hagabau naa alaadeu pelaoaa e gai ma de maatagu, aama de hagabau alaadeu vai e unu ma teai selaadeu tali,

¹⁷ gai e deai naa gai ma vai. Gai gilaadeu e hagadau kalo ange ma de manavasaa, gilaadeu e hagadaga mai naa i hiidinga olaadeu haisala.