Ezekiel 31 - De Beebaa Dabu

Egypt e bei dahi cedar o Lebanon

¹ Gai de madaangahulu ma dahi ngadau huu i tahi laangi o tolu malama, gai Tagi Maolunga ne hagaago mai ana muna gi de au, ga hai mai,

² “Tama a tangada, hai ange gi de hodooligi o Egypt go Pharaoh ma ono dangada soa: Goai e bei goe i de mmahi?

³ Tilo, Assyria e bei dahi cedar i Lebanon i mua; ono laa e mahamaha gai e haoli denga manu ssomo ange laa, gai e kona donu de looloa, dono ulu e daea age denga giliiga.

⁴ Denga vai e hagamaluulu de manu somo laa, gai vai i lalo de gelegele ne hai ga somo ga looloa; denga saalingaa vai i luu baasi e hagamaluulu denga manu ssomo alodahi i lodo henua.

⁵ Deelaa ai, gu looloa ange i manu ssomo alodahi i lodo henua; gai ono laa gu ssomo ga nnui ma de lloa mmao, i hiidinga de lagolago vai i luu baasi.

⁶ Denga manu llele alodahi i lo te langi gu hoohanga i honga ono laa; gai denga manu lodo henua alodahi gu haanau alaadeu dama i kilaa. Gai denga huaahenua nnui alodahi gu nnoho i lalo dono malu.

⁷ Gai de manu laa gu mahamaha ma de laumalie, ono laa gu kona donu de lloa, gai ono aga e ssomo e loiho gi lodo vai lagolago.

⁸ E deai ange donu cedar i lo te veelenga a de Maadua e bei ono dagodo, gai e deai donu fir e bei ono laa; e deai hogi plane e bei ono laa, aabe se manu daudahi i de veelenga a de Maadua ne bei dono mahamaha.

⁹ Au ne hai ga mahamaha de manu laa i de lagolago ono laa, gai manu ssomo alodahi o Eden i lo te veelenga a de Maadua go Eden, e llodo gaiaa ange aagena.

¹⁰ Deenei ai, e hagadaba de Ia Aamua go Iahweh: go hiidinga de manu laa gu looloa mmao gai dono ulu e daea age denga giliiga, gai ia ne lodo maolunga i hiidinga dono looloa,

¹¹ au ne dugu ange ia gi lalo ssauaa o tagi o denga huaahenua, gai ia ga hagaduasala ai ia gi bei dagodo o ana hegau baubau. Au gu tili de manu somo laa,

¹² gai de huaahenua hagamaatagu laa e sele iho naa de manu laa ga tili ai. Gai de angaanga ma ono laa gu hadihadi iho ga daakodo i honga mounga alodahi aama lodo saalingaa vai o de henua. Gai dangada alodahi o henua i lalo gu hulo gee i lalo dono malu ma de tili de manu laa.

¹³ Gai manu llele alodahi gu nnoho i honga denga laa gu sele iho laa, denga manu lodo henua alodahi gu nnoho i magavaa ono laa.

¹⁴ Mee nei ne hai gi deai ai manu ssomo i gaogao vai e somo ga kona de lloa, gai olaadeu ulu gu daea age denga giliiga. Gai gi deai ange ai se manu ssomo gu hagamaluulu danuaa e somo ga looloa bee nei, gilaadeu alodahi e odi naa donu i de maakau, ga hulo gi de mommee i lalo de henua, madali dangada alodahi gu loiho laa gi lo te geelonga o de gau maakau.

¹⁵ E hagadaba de Ia Aamua go Iahweh: De laangi o de manu somo laa e hano iho ai gi de mommee o de gau maakau, gai au e hai naa denga vai i lalo de gelegele gi hinangalosaa i ono hiidinga; au e hai naa denga leevaa ma olaadeu saalingaa vai lagolago gi dee ssali. Gai au e hai naa Lebanon gi hinangalosaa i de ia, gai manu ssomo alodahi o lodo henua e mmae naa i ono hiidinga.

¹⁶ Au e hai naa denga huaahenua gi maatagu i delaadeu langona dono baguu, i de masavaa aagu e tili iho ai ia gi de mommee o de gau maakau madali gilaadeu e loiho laa gi lo te geelonga laa. Gai denga manu ssomo alodahi o Eden, ma manu ssomo danuaa hugadoo o Lebanon, go manu ssomo alodahi ne hagamaluulu danuaa laa, e hagaaneane naa olaadeu lodo i lalo de gelegele.

¹⁷ Gilaadeu e hulo naa hogi gi de mommee o de gau maakau madali de manu somo laa, gi daho dangada ne daia laa ga maakau i de gadilaasa; denga huaahenua ne nnoho laa i lalo de malu o de manu somo laa e maakau naa.

¹⁸ Gai gu dahi ange laa manu somo o Eden, e bei dagodo o doo mahamaha aama doo maolunga? Koe e hano iho naa donu madali denga manu ssomo o Eden, gi de mommee o de gau maakau; koe e dagodo naa madali dangada tigi tuu dagaholiage, ma gilaadeu ne daia laa ga maakau i de gadilaasa. Aanei dagodo o Pharaoh ma ono hagabuulinga hebagi soa, go de Ia Aamua go Iahweh e hagadaba.”