Ezekiel 30 - De Beebaa Dabu

De hagaduasala o Egypt

¹ Gai Tagi Maolunga ne hagaago mai ana muna gi de au, ga hai mai,

² “Tama a tangada, basa pelaabisi mage hai ange: E hagadaba de Ia Aamua go Iahweh, Dangi see ma gi hai ange, ‘E vakaa naa i de laangi laa!’

³ De laangi laa gu baa mai donu, de laangi o Tagi Maolunga gu baa mai donu; se laangi e hagausinga ina, gai se laangi hagamaatagu ange gi denga huaahenua.

⁴ De gadilaasa e humai naa ga hebagi ange gi Egypt, gai Cush e manavasaa naa i de masavaa e maakau ai dangada i Egypt, gai dono lava e moolia naa ga gaavee gee, gai denga dagelo o de henua e oha naa.

⁵ Ethiopia, ma Put, ma Lud, ma Arabia alodahi, ma Libya, aama dangada i denga henua o de hagatoo donu hagaheloongoi e daia naa ga maakau i de gadilaasa.

⁶ E hagadaba Tagi Maolunga: Dangada e balea ange Egypt e daa donu gi maakau, gai mahi o Egypt e hagamaolunga ai laa e hagadeai naa. Gilaadeu e maakau naa i de gadilaasa i honga de henua, mai i Migdol ga hano ai gi Syene, go de Ia Aamua go Iahweh e hagadaba.

⁷ Gai delaadeu henua e ngadi dagodo naa madali denga henua gu ngadi daakodo laa, olaadeu aduhale alodahi e odi naa i de ngadi daakodo bei denga aduhale gu maoha laa.

⁸ Gai gi iloo ai e gilaadeu bolo go au go Iahweh, i dagu masavaa e dudu ai Egypt ma de daa gi maakau gilaadeu ne balea ange ia.

⁹ De laangi laa gai au e hai naa gi hulo de gau hagailoo, i denga vaga gi hagamaatagu ina de gau Ethiopia e nnoho paba laa. Gai gilaadeu e maatagu naa i de laangi o Egypt e hagaduasala ai. Tilo, de mee nei e hai naa donu!

¹⁰ E hagadaba de Ia Aamua go Iahweh: Au e hai naa Nebuchadnezzar, de hodooligi o Babylon gi daia gi odi dangada soa o Egypt.

¹¹ Gilaadeu ma dono hagabuulinga hebagi — go de huaahenua hugadoo alasala — e hai naa gi loomai gi oohaa de henua. Gilaadeu e dada naa alaadeu gadilaasa ga hebagi ange ai gi Egypt gai de henua e honu naa i de gau maakau.

¹² Au e hai naa hogi denga vai o Nile gi deai vai iai, ma de hagao ange de henua gi de gau baubau; gai au e hai naa de gau henua gee gi oohaa de henua ma mee alodahi iai. Go au go Iahweh ne daalaa mee nei!

¹³ E hagadaba de Ia Aamua go Iahweh: Au e oha naa denga diinonga, ma de hai gi deai diinonga i Memphis. Gai Egypt e deai naa sono dagi, gai au e hai naa gi maatagu dangada i honga de henua.

¹⁴ Au e oha naa Pathros, ga dudu Zoan i de ahi, ma de hagaduasala Thebes.

¹⁵ Gai au e hagaduasala naa Pelusium i dogu bole, go de mommee dagitilo o Egypt, ma de daa gi maakau dangada soa i Thebes.

¹⁶ Au e dudu naa Egypt i de ahi; gai Pelusium e duasala naa i dono mmae. Thebes e oha naa ga maoha; Memphis e duasala naa i laangi alodahi.

¹⁷ Denga dama daane o On ma Pi Beseth e daa naa ga maakau i de gadilaasa, gai denga aduhale e gaavee naa.

¹⁸ Tahpanhes e gohu naa i de laangi, i de masavaa aagu e hhadi ai de laagau hagahai hegau a Egypt. Gai ono mahi e hagamaolunga ai laa e lilo naa. De hagausinga e haoli naa de henua, gai ono dangada e noonoodia naa ga gaavee gi dahi henua gee.

¹⁹ Deenei dagu hai e hagaduasala ai Egypt. Gai gi iloo ai gilaadeu bolo go au donu go Iahweh.”

²⁰ Gai de madaangahulu ma dahi ngadau huu i de hidu laangi o tahi malama, gai Tagi Maolunga ga hagaago mai ana muna gi de au, ga hai mai,

²¹ “Tama a tangada, au gu hhadi de lima o Pharaoh de hodooligi o Egypt, gai tilo, tigi saabini gi mahu ai, aabe gu hhau i de laagau gi ahe ange gi mmahi, ma de maua ai i de poo de gadilaasa.

²² Deenei ai, e hagadaba de Ia Aamua go Iahweh: Tilo, au e hai baasi ange gi Pharaoh, de hodooligi o Egypt. Au e hadihadi naa luoono lima, go dono lima mmahi laa aama dono lima gu hadi laa, ma de hai gi doo de gadilaasa e poo laa i dono lima.

²³ Au e hai naa gi mavaevae saele de gau Egypt i magavaa o denga huaahenua, ma de hai gilaadeu gi nnoho saele i denga henua ange laa.

²⁴ Gai au e hai naa gi mmahi de hodooligi o Babylon, ma de hai ia gi boogia dagu gadilaasa i dono lima; aagai au e hagamaaguluaa naa luu lima o Pharaoh, gai ia ga gonogono ai naa i mada i mua o de hodooligi o Babylon, bei dagodo o tangada gu lagohia ma gu dai magau.

²⁵ Gai au e hai naa gi mmahi de hodooligi o Babylon, aagai e hai Pharaoh gi deai ono mahi. Gai gi iloo ai e gilaadeu bolo go au donu go Iahweh, i dagu masavaa e dugu ange ai dagu gadilaasa gi lo te lima o de hodooligi o Babylon, gai ia ga hebagi ange ai naa gi de henua go Egypt.

²⁶ Gai au e hai naa gi mavaevae saele de gau Egypt gi denga huaahenua, ma de hai gilaadeu gi nnoho saele i denga henua ange laa. Gai gi iloo ai e gilaadeu bolo go au donu go Iahweh.”