Ezekiel 18 - De Beebaa Dabu

Tangada haisala e magau donu

¹ Gai Tagi Maolunga ne hagaago mai ana muna gi de au, ga hai mai,

² “Dee hee de hagadoonunga o de muna hagasengasenga a dangada i de henua go Israel e tala naa, i delaadeu hagataba, ‘Denga damana ne gai denga grape mmala, gai niho o denga dama gu ssae’?

³ Au e hagatoo donu i dogu mouli, go de Ia Aamua go Iahweh e hagadaba: goodou e dee aahe ange naa donu e tala de muna hagasengasenga nei i Israel.

⁴ Tilo, mouli o dangada alodahi ni mee mai i ogu daha, tamana ma tama niiagu hogi — gilaau ngaadahi niiagu. Tangada e haisala laa e magau donu.

⁵ Noo dahi se dangada heohi gai ia e hai hegau i de hagamodu heohi ma de mee heohi —

⁶ ia e dee gaimee i mommee daumaha i honga mounga gai e dee tali ange gi denga diinonga o de gau Israel. Ia e dee dagodo haisala madali de bodu o tangada e baa adu gi de ia, aabe go de hine magi haahine.

⁷ Ia e dee vaivai hai dahi dangada, aagai e hagaahe ange ana mee ne kave e hagadonu ai de hagao muli a tangada. Ia e dee gaiaa donu, aagai e gaavange ana gai gi gilaadeu e hiikai, ma de gaavange malo gi tangada e deai ono malo.

⁸ Ia e dee ngadi gaavange sseene gi maua ange ai e ia dahi sseene aabe e hai gi maua dahi sseene laumalie i ana mee gu gaavange laa. Ia e dee hai hegau i de mee dee heohi, gai e hagamodu muna o dangada i de heohi.

⁹ Ia e daudali i agu muna gu hagasauaa, ma de kana ange ga daohi agu hagamodu. Tangada bee nei se dangada heohi; ia e mouli naa donu, go de Ia Aamua go Iahweh e hagadaba.

¹⁰ Noo tangada e dahi ana dama daane vaivai dagodo, ma de daa dangada gi maakau, ma de hai denga hagadaagangaa hegau bee nei,

¹¹ (gai e dee galemu naa donu tamana e dee hai mee nei); gai ia e gaimee i mommee daumaha i honga de mounga, ia e dagodo haisala ma de bodu o tangada e baa ange gi de ia,

¹² gai e vaivai hai de gau hagaau aloha ma de duasala, ia e gaiaa, ia e dee hagaahe ange mee aana ne kave e hagadonu ai de hagao ana muli, ia e daumaha ange gi denga diinonga, gai ia e hai mee hakino gee,

¹³ gai ia e gaavange sseene e kave ai dahi mee laa honga mee aana ne gaavange laa — e aha, e heohi de mouli o tangada bee nei? E deai, ia e dee dugu donu gi mouli donu. Ia gu hai denga mee hakino gee nei alodahi; ia e daa donu gi magau, gai dono magau e dau ange donu huu gi de ia.

¹⁴ Gai noo taane nei e dahi ana dama daane, gai ia ne gidee haisala alodahi a dono damana ne hai, aagai ia e dee ago ange i mee nei, e dee galemu donu ia ne gidee mee laa:

¹⁵ ia e dee gaimee i mommee daumaha i honga denga mounga, aabe daumaha ange gi denga diinonga o de gau Israel, gai e dee dagodo haisala madali de bodu o tangada e baa ange gi de ia,

¹⁶ ia e dee vaivai hai dahi dangada, gai e dee kave dahi mee e hagadonu ai de hagao ana muli; ia e dee gaiaa, gai ia e gaavange gai gi gilaadeu e hiikai, ma de hakahu gilaadeu e deai olaadeu malo;

¹⁷ ia e dee vaivai hai tangada hagaau aloha, ia e dee gaavange sseene gi maua ai dahi mee laa honga mee laa. Ia e daohi agu hainga ma de daudali i agu mee gu hagasauaa. Ia e dee magau donu i hiidinga haisala o dono damana; gai ia e mouli.

¹⁸ Aagai dono damana ne hai gi de mahi mee a dangada, ma de gaiaa mee a dono daina, aama de hai mee dee heohi i magavaa ono dangada; ia e magau naa i hiidinga ono haisala donu.

¹⁹ Aagai goodou e hagataba, ‘Gu aha gu dee hagaduasala ai tama i hiidinga baubau o dono damana?’ Dana dama ne hai hegau i de hagamodu heohi ma de heohi, ma de kana ange ga daohi agu mee alodahi gu hagasauaa, deelaa ai, ia e mouli donu.

²⁰ Tangada e haia de baubau e magau donu. Tama e dee hagaduasala donu i baubau o tamana, aagai tamana e dee hagaduasala i baubau o tama. Gai de heohi o tangada e aahe ange naa donu huu gi de ia, gai baubau o tangada e aahe ange naa donu huu gi de ia.

²¹ Aagai noo tangada baubau e dahuli gee i baubau alodahi aana gu hai, gai ia ga daohi agu mee gu hagasauaa ma de hai hegau i de hagamodu heohi, gai ia e mouli donu; ia e dee magau.

²² Gai e deai donu se baubau aana ne hai i mua e dau ange gi de ia. Gai ia e mouli donu i hiidinga mee heohi aana gu hai.

²³ Goodou e maanadu bolo au e malangilangi i de magau o tangada baubau? go de Ia Aamua go Iahweh e hagadaba. E dee go de dahuli gee i ana hegau gi mouli ai ia?

²⁴ Aagai noo tangada heohi e hano gee mai i de mee heohi ga hai de baubau, ga hai hegau hakino gee a tangada baubau e hai laa, gai e mouli ai naa ia? E deai, gai ana hegau danuaa alodahi gu hai laa e dee hagamaanadu naa donu, gai ia e daa naa donu ga magau i hiidinga ana hegau baubau gu hai aama ono haisala.

²⁵ Gai goodou e hagataba, ‘Hegau a de Ia Aamua e hai e dee heohi donu.’ De gau Israel, goodou hagalaangona agu muna: E aha, gu dee heohi nei agu hegau? E dee go goodou gu dee heohi naa oodou hegau?

²⁶ De masavaa naa huu o tangada e heohi laa e huli gee ai ga hai de mee dee heohi, gai ia e magau donu, i hiidinga dana baubau gu hai laa.

²⁷ Aagai noo tangada baubau e dahuli gee i dana baubau gu hai laa, ga hai hegau i de hagamodu heohi ma de mee heohi, gai ia e hagaola dono mouli.

²⁸ Go hiidinga ia ne gidee gai ia ga dahuli gee i haisala alodahi aana gu hai, gai ia e mouli donu; ia e dee magau donu.

²⁹ Aagai de gau Israel e hagataba, ‘Hegau a de Ia Aamua e hai e dee heohi donu.’ De gau Israel, e aha, gu dee heohi nei agu hegau? E dee go goodou gu dee heohi naa oodou hegau?

³⁰ Deenei ai, dangada o Israel, au e hagaduasala naa goodou, dangada alodahi e hagaduasala naa donu gi bei dagodo o alaadeu hegau, go de Ia Aamua go Iahweh e hagadaba. Goodou daahuli oodou lodo mage huuhuli gee mai i oodou haisala alodahi, kana maakau goodou i hiidinga oodou baubau.

³¹ Dilia oodou haisala alodahi gu haisala mai ai gi de au, gai hagahoou ina oodou lodo ma oodou hagasaalunga! Dangada o Israel, ni haigamaiana aha doodou maakau?

³² Au e dee malangilangi i de magau o dahi dangada daudahi, go de Ia Aamua go Iahweh e hagadaba; deenei ai, goodou daahuli oodou lodo gi mouli ai goodou.