Ezekiel 10 - De Beebaa Dabu

De mahamaha o de Maadua gu hano gee mai i de temple

¹ Gai tilo, au ne gidee dahi mee be se nohoanga, e hai i sapphire i baasi lunga de moana i honga biho o denga cherubim.

² Gai Tagi Maolunga ne basa ange gi taane e gahu laa i malo linen, ga hai ange, “Hannoo ulu gi magavaa o denga hagasii i lalo o denga cherubim. Gai koe ga hhao luoo lima gi hoohonu i denga maga ahi i magavaa o denga cherubim laa ga hagassii ange gi honga de aduhale.” Gai au ne galo ange ga tilo dono masavaa ne hano ai ga ulu.

³ Gai denga cherubim laa ne tuu i baasi i ngaage de temple, gai de masavaa o taane laa ne ulu ai gi lodo, gai dahi giliiga gu hhao ga honu lo te buibui e mua gi lodo.

⁴ Gai de mahamaha o Tagi Maolunga gu hagamalanga age mai i honga denga cherubim laa ga hano gi ma te haitoga o de temple; gai de giliiga gu hhao ga honu lo te temple, gai lo te buibui laa gu honu i de maalama o de mahamaha o Tagi Maolunga.

⁵ Gai de gabagaba o bakau o denga cherubim laa gu langona i tua de buibui, gai e bei de leo o de Maadua Mmahi Mmao laa i de masavaa oona e basa ai.

⁶ Gai de masavaa huu aana ne hai ange ai gi taane e gahu laa i malo linen, “Hannoo gaavee hanu maga ahi mai i magavaa o denga hagasii i magavaa o denga cherubim laa,” gai taane laa ne ulu ga duu i gaogao dahi hagasii laa.

⁷ Gai dahi cherubim i magavaa o denga cherubim laa ne haalo ange dono lima gi lo te ahi i olaadeu magavaa laa, gai ia ga puli hanu maga ahi ga hhao ange gi lodo luu lima o taane e gahu laa i malo linen, gai taane laa ga kave ga sao ai ga hano.

⁸ (Gai denga cherubim laa e dagodo be hanu olaadeu lima bei lima o dangada i lalo olaadeu bakau.)

⁹ Gai tilo, au ne gidee hogi e haa hagasii i gaogao denga cherubim laa, e dahi hagasii i gaogao dahi cherubim; gai denga hagasii laa e hai i chrysolite.

¹⁰ Gai denga cherubim e haa laa se dagodo daudahi donu huu; gai e dahi hagasii i lo te hagasii ange laa.

¹¹ Gai de masavaa naa huu olaadeu e ngaalue ai, gai gilaadeu e maua i de hulo gi denga baasi e haa laa, gai gilaadeu e dee huuhuli saele donu i delaadeu hulo. Gai be go hee naa huu o de hagasii i mada i mua laa e hano aagena, gai denga hagasii ange laa e hulo hogi, gai e dee huuhuli saele donu.

¹² Olaadeu angaanga alodahi, olaadeu dua, ma olaadeu lima, aama olaadeu bakau, e hoohonu i denga ganomada, gai e bei ai hogi olaadeu hagasii e haa laa.

¹³ Gai au ne langona denga hagasii laa e hagaingoo ange “go denga hagasii e tige laa”.

¹⁴ Gai dahi cherub laa e haa ono mada; luu mada i tahi biho laa e bei luu mada o de cherub, de lua e bei luu mada o tangada, tolu e bei luu mada o de laiono, gai de haa e bei luu mada o de igele.

¹⁵ Gai denga cherubim laa ne hagamaalanga age gi lunga. Aanei denga mee mouli aagu ne gidee laa hogi i gaogao ssaalingaa vai go Kebar.

¹⁶ De masavaa naa huu o denga cherubim e ngaalue ai, gai denga hagasii i olaadeu gaogao laa e ngaalue hogi; gai de masavaa naa huu o denga cherubim e doha ai olaadeu bakau ga hagamaalanga age i honga de gelegele, gai denga hagasii e dee ngaalue gee donu i olaadeu gaogao.

¹⁷ De masavaa naa huu o denga cherubim e nnoho ai, gai denga hagasii e nnoho hogi; gai ga hagamaalanga age naa huu gilaadeu, gai denga hagasii laa e maalanga age hogi madali gilaadeu; go hiidinga de hagasaalunga o denga mee mouli laa i lodo hagasii laa.

¹⁸ Gai de mahamaha o Tagi Maolunga gu hano gee mai i ma te haitoga o de hale daumaha, ga hano gi honga denga cherubim laa.

¹⁹ De masavaa aagu e tilo ai mee laa, gai denga cherubim ne doha olaadeu bakau ga hagamaalanga age mai i honga de henua, gai denga hagasii laa ne maalanga age hogi ga hulo madali gilaadeu. Gai gilaadeu ne hulo ga nnoho i gaogao de haitoga i baasi dua o de hale o Tagi Maolunga; gai de mahamaha o de Maadua o Israel i olaadeu elunga.

²⁰ Aanei denga mee mouli aagu ne gidee laa i lalo o de Maadua o Israel i gaogao ssaalingaa vai go Kebar; gai au gu iloo bolo ni cherubim.

²¹ Denga mee mouli laa alodahi e dagihaa olaadeu mada, e dagihaa olaadeu bakau, gai e hanu mee be ni lima dangada i lalo olaadeu bakau.

²² Gai olaadeu mada e bei mada o denga mee mouli laa, aagu ne gidee laa i gaogao ssaalingaa vai go Kebar. Gai dahi ma dahi e hagasoe donu huu ma e hano gi mua.