Ephesians 6 - De Beebaa Dabu

Denga dama ma maadua

¹ Denga dama, goodou hagallongo ange gi oodou maadua i lodo o Tagi Maolunga, go hiidinga deenei de mee heohi.

² “Hagadubu ina doo damana ma doo dinana,” deenei tahi hainga ne gaamai madali dahi hagatoo donu:

³ “gi danuaa adu ai gi de goe, ma de daulooloa ai doo mouli i honga de henua.”

⁴ Denga damana, goodou gi dee haia gi llili oodou dama, gai haelea gilaadeu ma de agoago ange gilaadeu i lodo o Tagi Maolunga.

De gau hai hegau ma de gau aamua

⁵ De gau hai hegau, goodou hagallongo ange gi oodou dangada aamua i henua i lalo nei, i de maatagu ma de bolebole, i de lodo se muna abodonu, bei doodou hagallongo ange gi Klisdo.

⁶ Gai gi dee hagallongo ange donu huu i de masavaa alaadeu e gidee ai goodou, gi malangilangi ai gilaadeu i goodou, aagai hai hegau gi bei dagodo o de gau hai hegau o Klisdo, e haia lodo o de Maadua i de lodo se muna abodonu.

⁷ Goodou hai hegau i de malangilangi, e dagodo be goodou e hai hegau ange gi Tagi Maolunga, e dee ange gi dangada,

⁸ i doodou iloo bolo Tagi Maolunga e hagao ange naa hegau danuaa a dahi e hai, e dee hilihili be ia se dangada hai hegau aabe se dangada ilaage.

⁹ De gau aamua, goodou hai hegau ange hogi bee nei gi oodou dangada hai hegau. Goodou gi dee hagamaatagu ina gilaadeu, i doodou tonu iho bolo goodou ma oodou dangada hai hegau e dahi donu huu oodou Dagi Aamua i de langi, gai ia e dee vae dangada donu.

De malo ma goloa hebagi a de Maadua

¹⁰ Denga daina, aanei agu muna hagaodi, hagammahi ina goodou i mahi o Tagi Maolunga ma dono sauaa mmahi.

¹¹ Gai hagauda ina de malo ma goloa hebagi alodahi o de Maadua, gi maua ai e goodou i de tuu e hai baasi ange gi denga hagadaagangaa hagatale a de ia hagabaubau laa.

¹² Go hiidinga gidaadeu e dee hebagi ange gi dangada, aagai e hebagi ange gi denga hagasaalunga ni dagi laa, ma hagasaalunga iai ssauaa, ma denga hagasaalunga mmahi e dagina laa henua i lalo gohu nei, aama hagasaalunga baubau i lo te langi i lunga.

¹³ Deenei ai, goodou kahu i de malo ma hagauda goloa hebagi alodahi o de Maadua, gi maua ai e goodou i de tuu ga hebagi i denga laangi baubau, gai ga lava naa donu doodou hebagi, gai goodou gi tuu ga dee ngalungaalue.

¹⁴ Deenei ai, goodou tuu gi makaga ga noonooa oodou ungaalodo i de mee abodonu, ma de dau de heohi i oodou hadahada,

¹⁵ ga ulumagi ange mee vae gi oodou vae, go de longo danuaa o de baba;

¹⁶ gai e dee go mee nei donu huu, gai goodou hagauda ina hogi de mee hungihungi go de gai, gi maua ai e goodou i de diinei denga dao kaa a de ia baubau laa;

¹⁷ ma de goobai o de hagamouli, ma de gadilaasa a de Hagasaalunga ⌊Dabu⌋, go muna a de Maadua.

¹⁸ Goodou dalodalo ma de dangidangi i ssauaa o de Hagasaalunga i masavaa alodahi. Gai goodou dagitilo i masavaa alodahi, ma de dalodalo i dangada alodahi o de Maadua.

¹⁹ Gai dalodalo hogi i ogu hiidinga, gi gaamai ai gi de au agu muna e tala ma de lo taane i dogu masavaa e agoago ai mee o de longo danuaa e dee iloo laa,

²⁰ go de longo danuaa ne haia nei au go dahi sui o de Maadua i lo te hale pono, gai gi lo taane ai au i de tala gi heohi de longo danuaa.

Hagaboo hagaodi

²¹ Gai Tychicus, taina hagamogomogo gai se daane hai hegau i de muna abodonu niio Tagi Maolunga, ga tala adu ai gi goodou mee alodahi, gi iloo ai e goodou ogu dagodo aama agu mee e hai.

²² Aanei hiidinga aagu ne hai ai nei ia gi hanadu gi oodou daha, gi iloo ai e goodou omaadeu dagodo, gai ia ga hagammahi adu ai hogi oodou lodo.

²³ Denga daina, de baba gi dagodo i oodou daha, ma de aloha madali de gai mai i daho de Maadua Tamana aama Tagi Maolunga go Iesu Klisdo.

²⁴ De abodonu gi dagodo i daho dangada alodahi, e aaloha laa i taadeu Dagi Maolunga go Iesu Klisdo, i de aloha e deai laa se helui.